ಇಂದು ವಿಶ್ವದಾದ್ಯಂತ ಲಕ್ಷಾಂತರ ಜನರನ್ನು ಕಾಡುತ್ತಿರುವ ಥೈರಾಯ್ಡ್ ಸಮಸ್ಯೆ ಕೇವಲ ಹಾರ್ಮೋನ್ ಅಸಮತೋಲನವಲ್ಲ, ಇದು ನಮ್ಮ ದೈನಂದಿನ ಆಹಾರ ಪದ್ಧತಿಯೊಂದಿಗೆ ನೇರ ಸಂಬಂಧ ಹೊಂದಿದೆ. ಪೌಷ್ಟಿಕತಜ್ಞರ ಪ್ರಕಾರ, ನಾವು ಸೇವಿಸುವ ಕೆಲವು ಸಾಮಾನ್ಯ ಆಹಾರಗಳು ಥೈರಾಯ್ಡ್ ಗ್ರಂಥಿಯ ಕಾರ್ಯವೈಖರಿಯನ್ನು ನಿಧಾನಗೊಳಿಸಿ, ಹಾರ್ಮೋನ್ ಹೀರಿಕೊಳ್ಳುವಿಕೆಗೆ ಅಡ್ಡಿಪಡಿಸಬಹುದು. ಹೀಗಾಗಿ, ಥೈರಾಯ್ಡ್ ಲಕ್ಷಣಗಳನ್ನು ನಿಯಂತ್ರಣದಲ್ಲಿಡಲು ಮತ್ತು ಔಷಧಿಗಳು ಪರಿಣಾಮಕಾರಿಯಾಗಿ ಕೆಲಸ ಮಾಡಲು ಕೆಲವು ನಿರ್ದಿಷ್ಟ ಆಹಾರಗಳಿಂದ ದೂರವಿರುವುದು ಅತ್ಯಗತ್ಯ.
ಬಿಳಿ ಬ್ರೆಡ್ ಮತ್ತು ಮೈದಾದಿಂದ ತಯಾರಿಸಿದ ಪದಾರ್ಥಗಳು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಹೆಚ್ಚಿಸಿ ಚಯಾಪಚಯ ಕ್ರಿಯೆಯ ಮೇಲೆ ಒತ್ತಡ ಹೇರುತ್ತವೆ. ಹಾಗೆಯೇ, ಆಲೂಗಡ್ಡೆ ಚಿಪ್ಸ್ಗಳಲ್ಲಿರುವ ಟ್ರಾನ್ಸ್ ಫ್ಯಾಟ್ ದೇಹವು ಅಯೋಡಿನ್ ಹೀರಿಕೊಳ್ಳುವುದನ್ನು ತಡೆಯುತ್ತದೆ. ಪ್ರೋಟೀನ್ ಮೂಲವೆಂದು ನಾವು ಭಾವಿಸುವ ಕಡಲೆಕಾಯಿಯಲ್ಲಿ ‘ಗಾಯಿಟ್ರೋಜೆನ್’ ಎಂಬ ಸಂಯುಕ್ತವಿದ್ದು, ಇದು ಹಾರ್ಮೋನ್ ಉತ್ಪಾದನೆಗೆ ಅಡ್ಡಿಪಡಿಸುತ್ತದೆ. ಆರೋಗ್ಯಕರವೆಂದು ಪರಿಗಣಿಸಲಾಗುವ ಎಲೆಕೋಸು, ಬ್ರೊಕೊಲಿ ಮತ್ತು ಹೂಕೋಸುಗಳನ್ನು ಹಸಿಯಾಗಿ ತಿನ್ನುವುದರಿಂದ ಅಯೋಡಿನ್ ಕೊರತೆ ಉಂಟಾಗಬಹುದು; ಇವುಗಳನ್ನು ಯಾವಾಗಲೂ ಬೇಯಿಸಿ ಸೇವಿಸುವುದು ಉತ್ತಮ.
ಇನ್ನು ಸೋಯಾ ಉತ್ಪನ್ನಗಳಾದ ಟೋಫು ಮತ್ತು ಬೆಳಗಿನ ಕಾಫಿ ಕೂಡ ಥೈರಾಯ್ಡ್ ರೋಗಿಗಳಿಗೆ ಪಥ್ಯವಲ್ಲ. ಕಾಫಿಯಲ್ಲಿರುವ ಕೆಫೀನ್ ಔಷಧಿಯ ಪರಿಣಾಮವನ್ನು ಕಡಿಮೆ ಮಾಡುವುದರಿಂದ, ಮಾತ್ರೆ ತೆಗೆದುಕೊಂಡ ನಂತರ ಕನಿಷ್ಠ 45 ನಿಮಿಷಗಳ ಕಾಲ ಯಾವುದೇ ಪಾನೀಯ ಸೇವಿಸಬಾರದು. ಸೋಯಾ ಉತ್ಪನ್ನಗಳಲ್ಲಿನ ಐಸೊಫ್ಲಾವೋನ್ಗಳು ಹಾರ್ಮೋನ್ ಸಂಶ್ಲೇಷಣೆಯನ್ನು ನಿಗ್ರಹಿಸುತ್ತವೆ. ಈ ಆಹಾರಗಳ ಬಗ್ಗೆ ಜಾಗೃತಿ ವಹಿಸುವುದರಿಂದ ಥೈರಾಯ್ಡ್ ಸಮಸ್ಯೆಯನ್ನು ಸಮರ್ಥವಾಗಿ ನಿರ್ವಹಿಸಲು ಸಾಧ್ಯವಿದೆ.
ನಿಮ್ಮ ಆಹಾರದಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡುವ ಮೊದಲು, ವಿಶೇಷವಾಗಿ ನೀವು ಥೈರಾಯ್ಡ್ ಔಷಧಿಗಳನ್ನು ತೆಗೆದುಕೊಳ್ಳುತ್ತಿದ್ದರೆ ಅಥವಾ ಥೈರಾಯ್ಡ್ ಅಸ್ವಸ್ಥತೆಯನ್ನು ಹೊಂದಿದ್ದರೆ, ಯಾವಾಗಲೂ ಪ್ರಮಾಣೀಕೃತ ವೈದ್ಯರನ್ನು ಅಥವಾ ಪೌಷ್ಟಿಕತಜ್ಞರನ್ನು ಸಂಪರ್ಕಿಸಿ.
