ಕಾರ್ಕಳ: ಸ್ಥಳೀಯ ಕಾಂಗ್ರೆಸ್ ವತಿಯಿಂದ ಆಯೋಜಿಸಲಾಗಿದ್ದ ಅದ್ಧೂರಿ ಕ್ರೀಡೋತ್ಸವವು ಅತ್ಯಂತ ಯಶಸ್ವಿಯಾಗಿ ಮುಕ್ತಾಯಗೊಂಡಿದೆ. ಸುಮಾರು 136 ಕ್ಕೂ ಹೆಚ್ಚು ತಂಡಗಳ ಸಾವಿರಾರು ಕ್ರೀಡಾಪಟುಗಳು ಈ ಸ್ಪರ್ಧಾ ಕಣದಲ್ಲಿ ತಮ್ಮ ಕ್ರೀಡಾ ಕೌಶಲ್ಯವನ್ನು ಪ್ರದರ್ಶಿಸಿದರು. ಎರಡು ದಿನಗಳ ಕಾಲ ನಡೆದ ಈ ಹೊನಲು ಬೆಳಕಿನ ಕ್ರೀಡಾಕೂಟದಲ್ಲಿ ಅಥ್ಲೆಟಿಕ್ಸ್ ವಿಭಾಗವೊಂದರಲ್ಲೇ 537 ಕ್ರೀಡಾಳುಗಳು ಪಾಲ್ಗೊಂಡಿದ್ದು ವಿಶೇಷವಾಗಿತ್ತು. ವಿಜೇತ ತಂಡಗಳಿಗೆ ನಗದು ಪುರಸ್ಕಾರ, ಆಕರ್ಷಕ ಶಾಶ್ವತ ಫಲಕ ಹಾಗೂ ಪ್ರಶಸ್ತಿ ಪತ್ರಗಳನ್ನು ವಿತರಿಸಿ ಗೌರವಿಸಲಾಯಿತು.
ವಿವಿಧ ಕ್ರೀಡಾ ವಿಭಾಗಗಳ ಅಂತಿಮ ಫಲಿತಾಂಶ:
ವಾಲಿಬಾಲ್ ಪಂದ್ಯಾವಳಿ: ವಾಲಿಬಾಲ್ ವಿಭಾಗದಲ್ಲಿ ಚಾರ ಗ್ರಾಮೀಣ ಸಮಿತಿ ತಂಡವು ಪ್ರಥಮ ಸ್ಥಾನ ಅಲಂಕರಿಸುವ ಮೂಲಕ ಚಾಂಪಿಯನ್ ಆಗಿ ಹೊರಹೊಮ್ಮಿತು. ಮುಡಾರಿನ ಉದಯ್ ಶೆಟ್ಟಿ ಅಭಿಮಾನಿ ಬಳಗ ದ್ವಿತೀಯ ಸ್ಥಾನ ಪಡೆದರೆ, ಮಾಳ ಗ್ರಾಮೀಣ ಸಮಿತಿ ತೃತೀಯ ಹಾಗೂ ಪಳ್ಳಿ ನಿಂಜೂರಿನ ದಿನಕರ್ ಶೆಟ್ಟಿ ತಂಡವು ಚತುರ್ಥ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು.
ತ್ರೋಬಾಲ್ (ಮಹಿಳೆಯರು): ಮಹಿಳೆಯರ ತ್ರೋಬಾಲ್ನಲ್ಲಿ ಪೆರ್ವಾಜೆಯ ಅಪೂರ್ವ ಫ್ರೆಂಡ್ಸ್ (A ತಂಡ) ಅಗ್ರಸ್ಥಾನ ಪಡೆಯಿತು. ನೀರೆ ಬೈಲೂರು ತಂಡ ದ್ವಿತೀಯ, ಶಿವಪುರದ ದೀಕ್ಷಿ ಫ್ರೆಂಡ್ಸ್ ತೃತೀಯ ಹಾಗೂ ಪೆರ್ವಾಜೆಯ ಅಪೂರ್ವ ಫ್ರೆಂಡ್ಸ್ ಮತ್ತೊಂದು ತಂಡ ನಾಲ್ಕನೇ ಸ್ಥಾನ ಗಳಿಸಿತು.
ಹಗ್ಗಜಗ್ಗಾಟ ಸ್ಪರ್ಧೆ: ಪುರುಷರ ವಿಭಾಗದಲ್ಲಿ ಅಜೆಜಾರ್ ಫ್ರೆಂಡ್ಸ್ (A) ತಂಡವು ಅಪ್ರತಿಮ ಶಕ್ತಿ ಪ್ರದರ್ಶಿಸಿ ಪ್ರಥಮ ಸ್ಥಾನ ಪಡೆಯಿತು. ಸೂಡಾದ ಬ್ರಹ್ಮಲಿಂಗೇಶ್ವರ ತಂಡ ದ್ವಿತೀಯ ಸ್ಥಾನ ಗಳಿಸಿದರೆ, ಕೋಟಿ ಚೆನ್ನಯ (A) ಹಾಗೂ ಕುಕ್ಕುಜೆಯ ಕಡ್ತಲ ವಲಯ ತಂಡಗಳು ಕ್ರಮವಾಗಿ ನಂತರದ ಸ್ಥಾನಗಳನ್ನು ಹಂಚಿಕೊಂಡವು. ಮಹಿಳೆಯರ ವಿಭಾಗದಲ್ಲಿ ಪಳ್ಳಿ ವಲಯ ಕಾಂಗ್ರೆಸ್ ನಕ್ಷತ್ರ (A) ತಂಡವು ಪ್ರಥಮ ಸ್ಥಾನ ಗೆದ್ದರೆ, ಕೆರ್ವಾಶೆಯ ಮಂಜುಶ್ರೀ (B) ತಂಡ ದ್ವಿತೀಯ ಹಾಗೂ ಪಳ್ಳಿ ವಲಯ ಕಾಂಗ್ರೆಸ್ ನಕ್ಷತ್ರ (B) ತಂಡ ತೃತೀಯ ಸ್ಥಾನ ಪಡೆಯಿತು.
ಖೋ-ಖೋ ಪಂದ್ಯಾವಳಿ: ಪುರುಷರ ಖೋ-ಖೋ ಸ್ಪರ್ಧೆಯಲ್ಲಿ ಹಿರ್ಗಾನ ವಲಯ ಕಾಂಗ್ರೆಸ್ ಜಯಭೇರಿ ಬಾರಿಸಿತು. ಬೈಲೂರು (B) ತಂಡ ದ್ವಿತೀಯ ಹಾಗೂ ಕಾಬೆಟ್ಟಿನ MPM ಕಾಲೇಜು ತೃತೀಯ ಸ್ಥಾನ ಗಳಿಸಿತು. ಮಹಿಳೆಯರ ವಿಭಾಗದಲ್ಲಿ SB ಕಾಲೇಜು (B) ತಂಡ ಪ್ರಥಮ ಸ್ಥಾನ ಪಡೆದರೆ, ಕಾಬೆಟ್ಟಿನ MPM ಕಾಲೇಜು ದ್ವಿತೀಯ ಸ್ಥಾನಕ್ಕೆ ಭಾಜನವಾಯಿತು.
ಪಥ ಸಂಚಲನ: ಶಿಸ್ತುಬದ್ಧ ಪಥ ಸಂಚಲನದಲ್ಲಿ ಕುಕ್ಕುಂದೂರು ಗ್ರಾಮೀಣ ಕಾಂಗ್ರೆಸ್ ಸಮಿತಿ ಪ್ರಥಮ ಸ್ಥಾನ ಗಳಿಸಿ ಎಲ್ಲರ ಗಮನ ಸೆಳೆಯಿತು. ನಿಟ್ಟೆ ಶಿಕ್ಷಣ ಸಂಸ್ಥೆ ಹಾಗೂ ಕಡ್ತಲ ಗ್ರಾಮೀಣ ಕಾಂಗ್ರೆಸ್ ತಂಡಗಳು ಕ್ರಮವಾಗಿ ದ್ವಿತೀಯ ಮತ್ತು ತೃತೀಯ ಬಹುಮಾನ ಪಡೆದವು. ಭುವನೇಂದ್ರ ಕಾಲೇಜಿನ NCC ತಂಡ ಸೇರಿದಂತೆ ಹಲವು ತಂಡಗಳಿಗೆ ಸಮಾಧಾನಕರ ಬಹುಮಾನ ನೀಡಿ ಪ್ರೋತ್ಸಾಹಿಸಲಾಯಿತು.
