ಬೆಳ್ತಂಗಡಿ: ಬಹುಚರ್ಚಿತ ಧರ್ಮಸ್ಥಳ ಪ್ರಕರಣದ ದೂರುದಾರರಾದ ಚಿನ್ನಯ್ಯ ಅವರಿಗೆ ನ್ಯಾಯಾಲಯ ಜಾಮೀನು ಮಂಜೂರು ಮಾಡಿ ಒಂದು ವಾರ ಕಳೆದಿತ್ತು. ಆದರೂ, ಸೂಕ್ತ ಜಾಮೀನುದಾರರು ಮತ್ತು ಭದ್ರತಾ ಬಾಂಡ್ನ ಕೊರತೆಯಿಂದಾಗಿ ಅವರು ಇನ್ನೂ ಶಿವಮೊಗ್ಗದ ಜೈಲಿನಿಂದ ಬಿಡುಗಡೆ ಭಾಗ್ಯ ಕಂಡಿಲ್ಲ.
ನವೆಂಬರ್ 26 ರಂದು ಮಂಗಳೂರು ನ್ಯಾಯಾಲಯವು ಚಿನ್ನಯ್ಯ ಅವರಿಗೆ ಜಾಮೀನು ನೀಡಿತು. ನ್ಯಾಯಾಲಯವು ಒಟ್ಟು 10 ನಿಬಂಧನೆಗಳನ್ನು ವಿಧಿಸಿದ್ದು, ಅದರಂತೆ ಇಬ್ಬರು ಜಾಮೀನುದಾರರು ಹಾಗೂ 1 ಲಕ್ಷ ರೂಪಾಯಿಗಳ ಭದ್ರತಾ ಬಾಂಡ್ ಅನ್ನು ಕೋರ್ಟ್ನಲ್ಲಿ ಠೇವಣಿ ಇಡುವುದು ಕಡ್ಡಾಯವಾಗಿತ್ತು. ಅಗತ್ಯವಾದ ಜಾಮೀನು ಪ್ರಕ್ರಿಯೆಗಳು ಹಾಗೂ ಹಣಕಾಸಿನ ಭದ್ರತೆಯನ್ನು ಇಡಲು ಯಾರೂ ಮುಂದೆ ಬಾರದ ಕಾರಣ, ಚಿನ್ನಯ್ಯ ಅವರು ಇನ್ನೂ ನ್ಯಾಯಾಂಗ ಬಂಧನದಲ್ಲಿ ಮುಂದುವರಿಯುವಂತಾಗಿದೆ.
ಈ ಪ್ರಕರಣದ ಹಿನ್ನೆಲೆ ಗಮನಿಸುವುದಾದರೆ, ಧರ್ಮಸ್ಥಳ ಗ್ರಾಮದ ವ್ಯಾಪ್ತಿಯಲ್ಲಿ ನೂರಾರು ಶವಗಳನ್ನು ಅಕ್ರಮವಾಗಿ ಹೂತುಹಾಕಲಾಗಿದೆ ಎಂದು ಆರೋಪಿಸಿ ಚಿನ್ನಯ್ಯ ಅವರು ತಲೆಬುರುಡೆಯೊಂದಿಗೆ ನ್ಯಾಯಾಲಯದ ಮುಂದೆ ಹಾಜರಾಗಿದ್ದರು. ತಾನು ಕಾನೂನುಬಾಹಿರವಾಗಿ ಅನೇಕ ಮೃತದೇಹಗಳನ್ನು ಹೂಳಿದ್ದಾಗಿ ನ್ಯಾಯಾಧೀಶರ ಮುಂದೆ ಹೇಳಿಕೆ ನೀಡಿದ್ದರು. ಆ ಬಳಿಕ, ನ್ಯಾಯಾಲಯವು ಅವರ ಹೇಳಿಕೆಯನ್ನು ಪರಿಗಣಿಸಿ ಅವರನ್ನು ಸಾಕ್ಷಿ-ದೂರುದಾರರನ್ನಾಗಿ ಸ್ವೀಕರಿಸಿತು. ಈ ಹೇಳಿಕೆಯ ಗಂಭೀರತೆಯನ್ನು ಮನಗಂಡು ಪ್ರಕರಣದ ತನಿಖೆಗಾಗಿ ಎಸ್.ಐ.ಟಿ. (ವಿಶೇಷ ತನಿಖಾ ದಳ) ರಚಿಸಲಾಗಿತ್ತು.
ಎಸ್.ಐ.ಟಿ. ತನಿಖೆ ನಡೆಸಿದ ಸಂದರ್ಭದಲ್ಲಿ, ಚಿನ್ನಯ್ಯ ಅವರು ತೋರಿಸಿದ ಹಲವು ಸ್ಥಳಗಳಲ್ಲಿ ಅಗೆದು ಪರಿಶೀಲನೆ ನಡೆಸಲಾಯಿತು. ಇದೇ ವೇಳೆ, ಚಿನ್ನಯ್ಯ ಅವರು ತಮ್ಮ ಮೊದಲ ಹೇಳಿಕೆಯನ್ನು ಬದಲಾಯಿಸಿ, ತಾನು ಈ ಹಿಂದೆ ಸುಳ್ಳು ಸಾಕ್ಷ್ಯ ನುಡಿದಿರುವುದಾಗಿ ಎಸ್.ಐ.ಟಿ. ಅಧಿಕಾರಿಗಳ ಮುಂದೆ ಒಪ್ಪಿಕೊಂಡರು. ಇದರ ಆಧಾರದ ಮೇಲೆ ಎಸ್.ಐ.ಟಿ.ಯು ಚಿನ್ನಯ್ಯ ಅವರನ್ನು ಬಂಧಿಸಿತು.
ಎಸ್.ಐ.ಟಿ.ಯು ಪ್ರಾಥಮಿಕ ವರದಿಯನ್ನು ಬೆಳ್ತಂಗಡಿ ನ್ಯಾಯಾಲಯಕ್ಕೆ ಸಲ್ಲಿಸಿದ ಸ್ವಲ್ಪ ಸಮಯದ ನಂತರವೇ, ಕೋರ್ಟ್ ಚಿನ್ನಯ್ಯ ಅವರಿಗೆ ಜಾಮೀನು ಮಂಜೂರು ಮಾಡಿ ಆದೇಶ ಹೊರಡಿಸಿತ್ತು. ಆದರೆ, 1 ಲಕ್ಷ ರೂಪಾಯಿಯ ಬಾಂಡ್ ಮತ್ತು ಸೂಕ್ತ ಜಾಮೀನುದಾರರನ್ನು ಒದಗಿಸಲು ಸಾಧ್ಯವಾಗದ ಕಾರಣ, ಚಿನ್ನಯ್ಯ ಅವರ ಜೈಲು ವಾಸವು ಮುಂದುವರಿದಿದೆ.
