ಕನ್ನಡ ಚಿತ್ರರಂಗ ಇತ್ತೀಚೆಗೆ ಪುನಃ ತನ್ನ ಸುದೀರ್ಘ ಯಶಸ್ಸಿನ ಪಥಕ್ಕೆ ಮರಳಿದೆ. ವರ್ಷದ ಆರಂಭದಲ್ಲಿ ಗಾಂಧಿನಗರದ ಹಲವು ಚಿತ್ರಮಂದಿರಗಳು ನಿರೀಕ್ಷಿತ ಪ್ರೇಕ್ಷಕರ ಕೊರತೆ ಎದುರಿಸಿದ್ದವು. ವಾರಕ್ಕೆ ಒಂದಕ್ಕಿಂತ ಹೆಚ್ಚು ಚಲನಚಿತ್ರಗಳು ಬಿಡುಗಡೆಯಾದರೂ, ಅವು ಪ್ರೇಕ್ಷಕರ ಮನ ಗೆಲ್ಲುವಲ್ಲಿ ವಿಫಲವಾಗಿದ್ದವು. ಆದರೆ ವರ್ಷದ ದ್ವಿತೀಯಾರ್ಧ, ಅದರಲ್ಲೂ ವಿಶೇಷವಾಗಿ ಹಿಟ್ ಸಿನಿಮಾಗಳ ಸರಣಿ ಕನ್ನಡ ಚಿತ್ರೋದ್ಯಮಕ್ಕೆ ಮತ್ತೆ ಸುವರ್ಣ ದಿನಗಳನ್ನು ತಂದುಕೊಟ್ಟಿದೆ. ಪ್ರಸ್ತುತ, ರಾಜ್ಯಾದ್ಯಂತ ‘ಕಾಂತಾರ ಚಾಪ್ಟರ್ -1’ ನ ಕ್ರೇಜ್ ಭಾರಿ ಮಟ್ಟದಲ್ಲಿ ಮನೆ ಮಾಡಿದೆ. ಈ ನಡುವೆಯೇ, ಒಂದು ದೊಡ್ಡ ಯಶಸ್ವಿ ಚಿತ್ರ ಕಿರುತೆರೆ ವೀಕ್ಷಕರನ್ನು ರಂಜಿಸಲು ಸಿದ್ಧವಾಗಿದೆ.
100 ಕೋಟಿ ಗಳಿಸಿದ ‘ಸು ಫ್ರಂ ಸೋ’
ನಟ, ನಿರ್ದೇಶಕ ರಾಜ್ ಬಿ. ಶೆಟ್ಟಿ ಅವರ ನಿರ್ಮಾಣದಲ್ಲಿ, ಜೆಪಿ ತುಮಿನಾಡು ಅವರ ನಿರ್ದೇಶನದಲ್ಲಿ ಮೂಡಿಬಂದ ‘ಸು ಫ್ರಂ ಸೋ’ (Su From So) ಚಿತ್ರವು ಭರ್ಜರಿ ಯಶಸ್ಸು ಕಂಡಿದ್ದು ಎಲ್ಲರಿಗೂ ತಿಳಿದಿರುವ ವಿಷಯ. ವಿಮರ್ಶಕರು ಮತ್ತು ಪ್ರೇಕ್ಷಕರಿಂದ ಸಕಾರಾತ್ಮಕ ಪ್ರತಿಕ್ರಿಯೆ ಪಡೆದ ಈ ಚಿತ್ರವು, ಸಾಮಾನ್ಯವಾಗಿ ಚಿತ್ರಮಂದಿರಗಳಿಗೆ ಬರದಿದ್ದ ಕುಟುಂಬ ವರ್ಗದ ಪ್ರೇಕ್ಷಕರನ್ನು ಕೂಡ ತನ್ನತ್ತ ಸೆಳೆದಿತ್ತು.
ಹಾಸ್ಯದ ಜೊತೆಗೆ ಗಂಭೀರವಾದ ಕೌಟುಂಬಿಕ ವಿಷಯವನ್ನು ಪರಿಣಾಮಕಾರಿಯಾಗಿ ತೆರೆ ಮೇಲೆ ತಂದ ಈ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ನೂರಕ್ಕೂ ಹೆಚ್ಚು ಕೋಟಿ ರೂಪಾಯಿಗಳನ್ನು ಗಳಿಸಿ, ಬ್ಲಾಕ್ಬಸ್ಟರ್ ಎನಿಸಿಕೊಂಡಿತು. ಕನ್ನಡದಲ್ಲಿ ಮಾತ್ರವಲ್ಲದೆ, ತೆಲುಗು ಮತ್ತು ಮಲಯಾಳಂ ಭಾಷೆಗಳಿಗೆ ಡಬ್ ಆಗಿ ಅಲ್ಲಿಯೂ ಸದ್ದು ಮಾಡಿದ್ದು, ದೇಶ ಮತ್ತು ವಿದೇಶಗಳಲ್ಲಿ ಉತ್ತಮ ಪ್ರದರ್ಶನ ಕಂಡು ಕನ್ನಡ ಚಿತ್ರದ ಕೀರ್ತಿಯನ್ನು ಹೆಚ್ಚಿಸಿತು.
ಕಿರುತೆರೆಗೆ ಬಾವನ ಆಗಮನ
ಈ ಹಿಂದೆ ಓಟಿಟಿ ವೇದಿಕೆಯಲ್ಲಿ ಬಿಡುಗಡೆಗೊಂಡು ಡಿಜಿಟಲ್ ಪ್ರೇಕ್ಷಕರ ಮನ ಗೆದ್ದಿದ್ದ ‘ಸು ಫ್ರಂ ಸೋ’ ಸಿನಿಮಾ ಈಗ ಪ್ರಪ್ರಥಮ ಬಾರಿಗೆ ಟಿವಿಯಲ್ಲಿ ಪ್ರಸಾರವಾಗಲು ಸಿದ್ಧವಾಗಿದೆ. ಈ ಚಿತ್ರದ ಟಿವಿ ಪ್ರೀಮಿಯರ್ ಹಕ್ಕನ್ನು ಜನಪ್ರಿಯ ಕನ್ನಡ ವಾಹಿನಿ ‘ಕಲರ್ಸ್ ಕನ್ನಡ’ ಪಡೆದುಕೊಂಡಿದೆ.
ವೀಕ್ಷಕರಲ್ಲಿ ಕುತೂಹಲ ಮೂಡಿಸಿರುವ ಈ ಚಿತ್ರವು, ಅಕ್ಟೋಬರ್ 12 ರಂದು ಸಂಜೆ 6 ಗಂಟೆಗೆ ‘ಕಲರ್ಸ್ ಕನ್ನಡ’ ವಾಹಿನಿಯಲ್ಲಿ ಪ್ರಸಾರವಾಗಲಿದೆ. ಈ ಕುರಿತು ವಾಹಿನಿಯು ತಮ್ಮ ಸಾಮಾಜಿಕ ಮಾಧ್ಯಮಗಳಲ್ಲಿ, “ವಿಷ್ಯ ಗೊತ್ತಾಯ್ತಾ? ಕಲರ್ಸ್ ಕನ್ನಡಕ್ಕೆ ಇದೇ ಅಕ್ಟೋಬರ್ 12 ಬಾವ ಬರ್ತಿದ್ದಾರಂತೆ” ಎಂದು ಪ್ರೀತಿಯಿಂದ ಪ್ರಕಟಿಸಿದೆ. ಕುಟುಂಬದ ವಾತಾವರಣದೊಂದಿಗೆ ನಕ್ಕು ನಲಿಯುವಂತಹ ಹಾಸ್ಯದ ಈ ಚಿತ್ರವನ್ನು ಮನೆಯಲ್ಲೇ ಆರಾಮವಾಗಿ ಕುಳಿತು ನೋಡಲು ಸಿನಿಪ್ರಿಯರು ಕಾತರರಾಗಿದ್ದಾರೆ.
ಚಿತ್ರತಂಡದಲ್ಲಿ ಪ್ರತಿಭಾವಂತ ನಟರು
‘ಸು ಫ್ರಂ ಸೋ’ ಚಿತ್ರದಲ್ಲಿ ರಾಜ್ ಬಿ. ಶೆಟ್ಟಿ ಅವರಲ್ಲದೆ, ನಿರ್ದೇಶಕ ಜೆಪಿ ತುಮಿನಾಡು, ಶನೀಲ್ ಗೌತಮ್, ಪ್ರಕಾಶ್ ತುಮಿನಾಡು, ದೀಪಕ್ ರೈ ಪಾಣಾಜೆ, ಸಂಧ್ಯಾ ಅರಕೆರೆ ಸೇರಿದಂತೆ ಹಲವು ಪ್ರತಿಭಾವಂತ ಕಲಾವಿದರು ನಟಿಸಿ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
