ಆರೋಗ್ಯಕರ ಜೀವನಶೈಲಿಗೆ ಮುಂಚಿತ ನಿದ್ರೆ ಹಾಗೂ ಮುಂಜಾವಿನ ಎಚ್ಚರ ಅವಶ್ಯಕ ಎಂದು ಹೊಸ ಅಧ್ಯಯನವೊಂದು ಪುನಃ ಜೋರಾಗಿ ಎಚ್ಚರಿಕೆ ನೀಡಿದೆ. ನಿತ್ಯ ತಡವಾಗಿ ಮಲಗುವವರು ವಯಸ್ಸು ಹೆಚ್ಚಾದಂತೆ ಮನಸ್ಸಿನ ಚುರುಕು ಕ್ಷೀಣಿಸುವ ಅಪಾಯಕ್ಕೆ ಒಳಗಾಗುವ ಸಾಧ್ಯತೆ ಹೆಚ್ಚು ಎನ್ನಲಾಗಿದೆ.
‘ದಿ ಜರ್ನಲ್ ಆಫ್ ಪ್ರಿವೆನ್ಷನ್ ಆಫ್ ಆಲ್ಸೈಮರ್ಸ್ ಡಿಸೀಸ್’ ಎಂಬ ಜರ್ನಲ್‌ನಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ತಡರಾತ್ರಿ ಎಚ್ಚರವಾಗಿರುವ ಅಭ್ಯಾಸವು, ಮುಂದಿನ ವರ್ಷಗಳಲ್ಲಿ ಮಾನಸಿಕ ಸಾಮರ್ಥ್ಯದ ಕುಸಿತಕ್ಕೆ ಕಾರಣವಾಗಬಹುದು. ನೆದರ್ಲ್ಯಾಂಡ್ಸ್‌ನ ಗೊನಿಂಗೆನ್ ವಿಶ್ವವಿದ್ಯಾಲಯದ ವೈದ್ಯಕೀಯ ಕೇಂದ್ರದ ಸಂಶೋಧಕಿ ಡಾ. ಅನ್ನಾ ವೆನ್ನರ್ ನೇತೃತ್ವದಲ್ಲಿ ಈ ಅಧ್ಯಯನ ನಡೆಸಲಾಗಿದ್ದು, 10 ವರ್ಷಗಳ ಕಾಲ 23,800 ಜನರ ಮೇಲೆ ವಿಶ್ಲೇಷಣೆ ನಡೆಯಿತು.
ಅಧ್ಯಯನವು “ಕ್ರೋನೋಟೈಪ್” ಎಂಬ ಪರಿಕಲ್ಪನೆಯನ್ನು ಆಧಾರವಾಗಿ ತೆಗೆದುಕೊಂಡಿದ್ದು, ಇದು ವ್ಯಕ್ತಿಯ ನಿದ್ರೆ ಚಕ್ರ ಹಾಗೂ ದಿನದ ಯಾವ ಸಮಯದಲ್ಲಿ ಹೆಚ್ಚು ಸಕ್ರಿಯರಾಗಿರುತ್ತಾರೆ ಎಂಬುದನ್ನು ವಿವರಿಸುತ್ತದೆ. ತಡ ರಾತ್ರಿ ಎಚ್ಚರವಾಗಿರುವವರು ಸಾಮಾನ್ಯವಾಗಿ ದಿನದ ಮೊದಲ ಭಾಗದಲ್ಲಿ ಉಜ್ವಲ ಶಕ್ತಿ ಹೊಂದಿರದೆ, ದೀರ್ಘಾವಧಿಯಲ್ಲಿ ಮೆದುಳಿನ ಚುರುಕು ಹಾಗೂ ನೆನಪು ಶಕ್ತಿ ಕುಗ್ಗುವ ಅಪಾಯಕ್ಕೆ ಒಳಗಾಗುತ್ತಾರೆ.
ಮೊಬೈಲ್‌ ನೋಡಿ, ಸಿನಿಮಾ ನೋಡಿ, ಪುಸ್ತಕ ಓದಿ ಅಥವಾ ಸಂಭಾಷಣೆ ನಡೆಸಿ ತಡರಾತ್ರಿ ತನಕ ಎಚ್ಚರವಾಗಿರುವುದು ಹಲವರಿಗೆ ಅಭ್ಯಾಸವಾಗಿರಬಹುದು. ಆದರೆ ಈ ಅಭ್ಯಾಸವು ಆರೋಗ್ಯದ ದೃಷ್ಟಿಯಿಂದ ಗಮನಾರ್ಹವಾದ ನಷ್ಟವನ್ನು ತರಬಹುದು ಎಂದು ಅಧ್ಯಯನದ ತೀವ್ರ ಎಚ್ಚರಿಕೆ ನೀಡಿದೆ.
