ಮಳೆಗಾಲದಲ್ಲಿ ವಾತಾವರಣದ ತೀವ್ರ ಬದಲಾವಣೆಗಳಿಂದಾಗಿ ಮಕ್ಕಳು ಜ್ವರ, ಶೀತ, ಕೆಮ್ಮು, ಕಫ ಹಾಗೂ ಇತರ ಸಣ್ಣ ಅನಾರೋಗ್ಯ ಸಮಸ್ಯೆಗಳಿಗೆ ಒಳಗಾಗುವುದು ಸಾಮಾನ್ಯ. ಈ ಸಮಯದಲ್ಲಿ ಮನೆಮದ್ದುಗಳ ಮೂಲಕ ಮಕ್ಕಳ ಆರೋಗ್ಯ ಕಾಪಾಡುವುದು ಕೆಲವೊಮ್ಮೆ ಅಗತ್ಯವಾಗಿರುತ್ತದೆ. ಈ ಹಿನ್ನೆಲೆಯಲ್ಲಿ ಮನೆ ಹಿತ್ತಲಲ್ಲಿ ಬೆಳೆಯುವ ದೊಡ್ಡಪತ್ರೆ ಎಲೆಗಳನ್ನು ರಾಮಬಾಣ ಮನೆಮದ್ದಾಗಿ ಪರಿಗಣಿಸಬಹುದು.
ದೊಡ್ಡಪತ್ರೆ ಎಲೆ – ಮನೆ ವೈದ್ಯನಂತೆ ಉಪಯೋಗ:
ರಾಜ್ಯಾದ್ಯಂತ ವಿಭಿನ್ನ ಹೆಸರಿನಿಂದ ಪ್ರಸಿದ್ಧವಾಗಿರುವ ದೊಡ್ಡಪತ್ರೆ ಎಲೆ (ಸಾಂಬ್ರಾಣಿ ಎಲೆ, ಕರ್ಪೂರವಳ್ಳಿ, ಚಟ್ನಿ ಸೊಪ್ಪು) ಎಲ್ಲಾ ವಾತಾವರಣದಲ್ಲಿ ಬೆಳೆದುಬರುವ ಔಷಧೀಯ ಸಸ್ಯವಾಗಿದೆ. ಇದರ ಎಲೆ ದಪ್ಪವಾಗಿದ್ದು, ನೀರಿನ ಅಂಶದಿಂದ ಕೂಡಿರುತ್ತದೆ. ಮನೆಮದ್ದಾಗಿ ಇದರ ಬಳಕೆಯಿಂದ ಮಕ್ಕಳಿಗೆ ಶೀಘ್ರ ಪರಿಹಾರ ದೊರೆಯಬಹುದು.
ವಿವಿಧ ಆರೋಗ್ಯ ಸಮಸ್ಯೆಗಳಿಗೆ ದೊಡ್ಡಪತ್ರೆ ಎಲೆಯ ಉಪಯೋಗ:
🔸 ಜ್ವರ ನಿವಾರಣೆ:
ದೊಡ್ಡಪತ್ರೆ ಎಲೆಗಳನ್ನು ಸ್ವಲ್ಪ ತಾಪದ ಹೊತ್ತಿನಲ್ಲಿ (ಬೆಕ್ಕಿ) ಜ್ವರಬಂದ ಮಕ್ಕಳ ತಲೆಯ ಮೇಲೆ ಇಟ್ಟರೆ ತಾತ್ಕಾಲಿಕ ಜ್ವರ ಇಳಿಯಬಹುದು.
🔸 ಕೆಮ್ಮು, ಕಫ, ಶೀತ ನಿವಾರಣೆ:
4-5 ಎಲೆಗಳನ್ನು ಕೆಂಡದಲ್ಲಿ ಬಾಡಿಸಿ, ರಸ ಹಿಂಡಿ, ಜೇನು ಸೇರಿಸಿ ಮಕ್ಕಳಿಗೆ ಕುಡಿಸಿದರೆ ಶೀತ-ಕೆಮ್ಮು-ಕಫ ಶೀಘ್ರವಾಗಿ ಗುಣಮುಖವಾಗುತ್ತವೆ.
🔸 ಬೇಧಿ ಹಾಗೂ ಮಲಬದ್ಧತೆ:
ಎಲೆ ರಸಕ್ಕೆ ಸ್ವಲ್ಪ ಜೇನು ಸೇರಿಸಿ ಮಕ್ಕಳಿಗೆ ನೀಡಿದರೆ ಬೇಧಿ ಸಮಸ್ಯೆ ಕಡಿಮೆಯಾಗುವುದಲ್ಲದೇ, ಶೀತದಿಂದ ಉಂಟಾಗುವ ಮಲಬದ್ಧತೆಯೂ ನಿವಾರಣೆಯಾಗುತ್ತದೆ.
🔸 ಕಣ್ಣಿನ ಉರಿಗೆ:
ದೊಡ್ಡಪತ್ರೆ ಎಲೆಯ ರಸಕ್ಕೆ ಸಮಪ್ರಮಾಣದ ಎಳ್ಳೆಣ್ಣೆ ಸೇರಿಸಿ ತಲೆಗೆ ಹಚ್ಚುವುದು ಕಣ್ಣಿನ ಉರಿಗೆ ಪರಿಣಾಮಕಾರಿ ಮದ್ದು.
🔸 ಚರ್ಮ ಸಮಸ್ಯೆ:
ತುರಿಕೆ, ಕಜ್ಜಿ ಅಥವಾ ಬೆವರುಸಾಲೆ ಕಾಣಿಸಿಕೊಂಡ ಭಾಗಕ್ಕೆ ದೊಡ್ಡಪತ್ರೆ ಎಲೆಯ ರಸ ಹಚ್ಚಿದರೆ ಶಮನವಾಗುತ್ತದೆ.
ಗಮನಿಸಿ:
ಮನೆಮದ್ದಿಗಳಿಂದ ಶೀಘ್ರ ಪರಿಹಾರ ಸಿಕ್ಕರೂ, ರೋಗ ಲಕ್ಷಣಗಳು ಉಲ್ಬಣಗೊಳ್ಳುವುದಾದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸುವುದು ಅವಶ್ಯಕ.
