ಇಂದು ಸಿನಿಮಾ ನಟರಂತೆ ಕೇಶ ವಿನ್ಯಾಸ ಮಾಡಿಸಿಕೊಳ್ಳುವುದು ಅಥವಾ ಅಂದ ಹೆಚ್ಚಿಸಿಕೊಳ್ಳಲು ಬ್ಯೂಟಿ ಪಾರ್ಲರ್ಗಳಿಗೆ ಹೋಗುವುದು ಸಾಮಾನ್ಯವಾಗಿದೆ. ಆದರೆ, ಇಂತಹ ಕ್ಷುಲ್ಲಕ ವಿಷಯಗಳ ಬಗ್ಗೆ ನಿರ್ಲಕ್ಷ್ಯ ವಹಿಸಿದರೆ, ಅದು ನಿಮ್ಮ ಪ್ರಾಣಕ್ಕೆ ಅಪಾಯ ತರಬಹುದು ಎಂದು ಸಂಶೋಧಕರು ಎಚ್ಚರಿಕೆ ನೀಡಿದ್ದಾರೆ. ಹೇರ್ವಾಶ್ ಮಾಡುವಾಗ ಕುತ್ತಿಗೆಯನ್ನು ಸರಿಯಾಗಿ ಇಟ್ಟುಕೊಳ್ಳದಿದ್ದರೆ, ಅದು ‘ಬ್ಯೂಟಿ ಪಾರ್ಲರ್ ಸ್ಟ್ರೋಕ್ ಸಿಂಡ್ರೋಮ್’ಗೆ ಕಾರಣವಾಗಬಹುದು.
ಏನಿದು ಬ್ಯೂಟಿ ಪಾರ್ಲರ್ ಸ್ಟ್ರೋಕ್ ಸಿಂಡ್ರೋಮ್?
ಕೇಶವಿನ್ಯಾಸದ ಸಮಯದಲ್ಲಿ, ಕೂದಲು ತೊಳೆಯಲು ಕುತ್ತಿಗೆಯನ್ನು ಸಿಂಕ್ನಲ್ಲಿ ಹಿಮ್ಮುಖವಾಗಿ ಇರಿಸಲಾಗುತ್ತದೆ. ಈ ಸಂದರ್ಭದಲ್ಲಿ ಕುತ್ತಿಗೆಯನ್ನು ಅಸಹಜ ಕೋನದಲ್ಲಿ ಇಟ್ಟುಕೊಂಡರೆ, ಮೆದುಳಿಗೆ ರಕ್ತ ಪೂರೈಸುವ ಪ್ರಮುಖ ರಕ್ತನಾಳಗಳಿಗೆ ಹಾನಿಯಾಗಬಹುದು. ಇದರಿಂದ ರಕ್ತದ ಹರಿವಿಗೆ ಅಡಚಣೆಯಾಗಿ ರಕ್ತ ಹೆಪ್ಪುಗಟ್ಟುತ್ತದೆ. ಇದು ಮೆದುಳಿನಲ್ಲಿರುವ ರಕ್ತನಾಳವು ಸಿಡಿಯಲು ಕಾರಣವಾಗಬಹುದು, ಇದರಿಂದಾಗಿ ಆಮ್ಲಜನಕ, ಗ್ಲೂಕೋಸ್ ಮತ್ತು ಪೋಷಕಾಂಶಗಳ ಪೂರೈಕೆ ಕಡಿಮೆಯಾಗಿ ಮೆದುಳಿನ ಕೋಶಗಳು ಹಾನಿಗೊಳಗಾಗಬಹುದು. ಇದನ್ನೇ ಪಾರ್ಶ್ವವಾಯು (Stroke) ಅಥವಾ ‘ಸಲೂನ್ ಸ್ಟ್ರೋಕ್’ ಎಂದು ಕರೆಯಲಾಗುತ್ತದೆ.
ಈ ಸ್ಥಿತಿ ತೀರಾ ವಿರಳವಾಗಿದ್ದರೂ, ತಜ್ಞರು ಮುನ್ನೆಚ್ಚರಿಕೆ ವಹಿಸುವುದು ಬಹಳ ಮುಖ್ಯ ಎಂದು ಹೇಳುತ್ತಾರೆ. ಕೂದಲನ್ನು ತೊಳೆಯುವಾಗ ನಿಮಗೆ ಕುತ್ತಿಗೆಯಲ್ಲಿ ಯಾವುದೇ ರೀತಿಯ ನೋವು ಅಥವಾ ಅಸಹಜ ಅನುಭವವಾದರೆ, ಕೂಡಲೇ ನಿಮ್ಮ ಕುತ್ತಿಗೆಯನ್ನು ಸರಿಪಡಿಸಿಕೊಳ್ಳಬೇಕು.
ಎಚ್ಚರಿಕೆ ಮತ್ತು ಜಾಗರೂಕತೆ ಇರಲಿ
ಹೇರ್ವಾಶ್ ಮಾಡಿಸಿಕೊಳ್ಳುವಾಗ ಮೈಗೆ ವಿಶ್ರಾಂತಿ ಸಿಕ್ಕಂತೆ ಅನಿಸಬಹುದು, ಆದರೆ ಸ್ವಲ್ಪ ಯಾಮಾರಿದರೆ ಇದೇ ಜೀವಕ್ಕೆ ಅಪಾಯ ತರುತ್ತದೆ. ಕೇಶವಿನ್ಯಾಸಕರು ಬಳಸುವ ಉತ್ಪನ್ನಗಳೂ ಕೆಲವೊಮ್ಮೆ ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡಬಹುದು. ಆದುದರಿಂದ, ಸಲೂನ್ಗಳಿಗೆ ಹೋದಾಗ ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡುವುದು ಅವಶ್ಯಕ.
