ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯ ಬಿ.ಸಿ.ರೋಡ್ ಕೆಎಸ್ಆರ್ಟಿಸಿ ಬಸ್ ನಿಲ್ದಾಣದಲ್ಲಿ ನಡೆದ ಲಾವಣ್ಯಾ ಹತ್ಯೆ ಪ್ರಕರಣದ ತನಿಖೆಯಲ್ಲಿ ಮಹತ್ವದ ಬೆಳವಣಿಗೆ ನಡೆದಿದೆ. ಪ್ರಕರಣದ ಆರೋಪಿ ಚೇತನ್ನನ್ನು ಪೊಲೀಸರು ಬಂಧಿಸುವಲ್ಲಿ ಸ್ಥಳೀಯ ಕೂಲಿ ಕಾರ್ಮಿಕ ಗಿರೀಶ್ ವಹಿಸಿದ ಪಾತ್ರ ಇದೀಗ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ. ತನ್ನ ಸಮಯಪ್ರಜ್ಞೆ ಮತ್ತು ಧೈರ್ಯದಿಂದ ಆರೋಪಿ ತಪ್ಪಿಸಿಕೊಳ್ಳದಂತೆ ತಡೆದ ಗಿರೀಶ್ ಇದೀಗ ಜಿಲ್ಲೆಯಾದ್ಯಂತ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.
ಕೊಲೆ ನಡೆದ ಬಳಿಕ ಆರೋಪಿ ಮಂಗಳೂರಿನತ್ತ ತೆರಳಿದ್ದಾನೆ ಎಂಬ ಮಾಹಿತಿ ತನಿಖೆಯಲ್ಲಿ ದೊರೆತಿತ್ತು. ನಂತರ ಪಚ್ಚನಾಡಿ ಡಂಪಿಂಗ್ ಯಾರ್ಡ್ ಸಮೀಪ ಆತ ಸಂಚರಿಸುತ್ತಿದ್ದ ವೇಳೆ ಸ್ಥಳೀಯರ ಕಣ್ಣಿಗೆ ಬಿದ್ದಿದ್ದಾನೆ. ಇದೇ ವೇಳೆ ಗಿರೀಶ್ ತೋರಿದ ಜಾಗರೂಕತೆಯೇ ಆರೋಪಿಯನ್ನು ಬಂಧಿಸುವ ಕಾರ್ಯವನ್ನು ಸುಲಭಗೊಳಿಸಿದೆ.
ಗಿರೀಶ್ ನೀಡಿದ ಮಾಹಿತಿ ಪ್ರಕಾರ, ಬೆಳಿಗ್ಗೆ ಅಂಗಡಿ ಎದುರು ನಿಂತಿದ್ದ ಕಾರಿನ ಚಾಲಕನ ಮುಖವನ್ನು ಗಮನಿಸಿದಾಗ, ಸಾಮಾಜಿಕ ಜಾಲತಾಣ ಹಾಗೂ ಸುದ್ದಿಗಳಲ್ಲಿ ನೋಡಿದ್ದ ಕೊಲೆ ಆರೋಪಿ ಚೇತನ್ನಂತೆಯೇ ಕಂಡಿದ್ದ. ಅನುಮಾನ ವ್ಯಕ್ತವಾದ ತಕ್ಷಣ ಆತ ನೇರವಾಗಿ ಕಾರಿನ ಬಳಿಗೆ ತೆರಳಿ ಪ್ರಶ್ನೆ ಮಾಡಿದ್ದಾನೆ.
ಪ್ರಮುಖ ಅಂಶಗಳು
- ಜು. 16ರಂದು ನಡೆದ ಲಾವಣ್ಯಾ ಹತ್ಯೆ ಪ್ರಕರಣದ ಆರೋಪಿ ಬಂಧನ.
- ಪಚ್ಚನಾಡಿ ಬಳಿ ಕಾರಿನಲ್ಲಿದ್ದ ಆರೋಪಿಯನ್ನು ಗುರುತಿಸಿದ ಸ್ಥಳೀಯ ಯುವಕ ಗಿರೀಶ್.
- ಕಾರಿನ ಕೀ ಕಸಿದು ಆರೋಪಿ ತಪ್ಪಿಸಿಕೊಳ್ಳದಂತೆ ತಡೆದ ಸಾಹಸ.
- ವಿಷ ಸೇವಿಸಲು ಯತ್ನಿಸಿದ ಆರೋಪಿಯನ್ನು ಸ್ಥಳೀಯರ ನೆರವಿನಿಂದ ಹಿಡಿದಿಟ್ಟ ಗಿರೀಶ್.
- ಸ್ಥಳಕ್ಕೆ ಬಂದ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದು ಆಸ್ಪತ್ರೆಗೆ ಕರೆದೊಯ್ದರು.
- ಗಿರೀಶ್ ಧೈರ್ಯವನ್ನು ಪೊಲೀಸರು ಸಾರ್ವಜನಿಕವಾಗಿ ಶ್ಲಾಘಿಸಿದರು.
ಕಾರಿನ ಕೀ ಕಸಿದು ಆರೋಪಿ ತಪ್ಪಿಸಿಕೊಳ್ಳುವುದನ್ನು ತಡೆದ ಗಿರೀಶ್
ಗಿರೀಶ್ ಹೇಳುವಂತೆ, ಆರಂಭದಲ್ಲಿ ಕಾರಿನೊಳಗಿದ್ದ ವ್ಯಕ್ತಿ ಯಾವುದೇ ಅನುಮಾನ ಮೂಡಿಸದಂತೆ ವರ್ತಿಸಿದ್ದ. ಆದರೆ ಪ್ರಶ್ನೆಗಳನ್ನು ಕೇಳುತ್ತಿದ್ದಂತೆ ಆತ ಗಾಬರಿಗೊಂಡಿದ್ದ. ಬಳಿಕ ಕಾರಿನಿಂದ ಹೊರಬಂದು ಮುಖ ತೊಳೆಯಲು ಹೋಗಿದ್ದ ಆತ, ಮತ್ತೆ ಕಾರಿನೊಳಗೆ ಕುಳಿತು ಅಲ್ಲಿಂದ ತೆರಳಲು ಯತ್ನಿಸಿದ್ದಾನೆ.
ಅದೇ ವೇಳೆ ಗಿರೀಶ್ ಧೈರ್ಯವಾಗಿ ಮುಂದಾಗಿ ಕಾರಿನ ಕೀ ಕಸಿದುಕೊಂಡಿದ್ದಾನೆ. ಇದರಿಂದ ಆರೋಪಿ ಅಲ್ಲಿಂದ ಪರಾರಿಯಾಗುವ ಸಾಧ್ಯತೆ ತಪ್ಪಿದೆ. ನಂತರ ಆತ ಸಣ್ಣ ಬಾಟಲಿಯಲ್ಲಿದ್ದ ದ್ರವವನ್ನು ಕುಡಿದಿರುವುದನ್ನು ಗಮನಿಸಿದ ಗಿರೀಶ್ ತಕ್ಷಣ ಸ್ಥಳೀಯರಿಗೆ ಮಾಹಿತಿ ನೀಡಿ ಪೊಲೀಸರಿಗೂ ಕರೆ ಮಾಡಿದ್ದಾರೆ.
ಕಾರಿನೊಳಗೆ ಎರಡು ಚೂರಿಗಳು ಪತ್ತೆ
ಗಿರೀಶ್ ಮಾಹಿತಿ ಪ್ರಕಾರ, ಕಾರಿನ ಕೀ ಕಸಿದುಕೊಳ್ಳುವ ವೇಳೆ ಆರೋಪಿ ವಾಹನದಲ್ಲಿದ್ದ ಚೂರಿಯನ್ನು ಕೈಗೆತ್ತಿಕೊಳ್ಳಲು ಯತ್ನಿಸಿದ್ದ. ಕಾರಿನಲ್ಲಿ ಎರಡು ಚೂರಿಗಳು ಇದ್ದುದನ್ನು ಗಮನಿಸಿದ ಗಿರೀಶ್, ಅವು ಆರೋಪಿಯ ಕೈಗೆ ಸಿಗದಂತೆ ಎಚ್ಚರಿಕೆಯಿಂದ ದೂರ ತಳ್ಳಿದ್ದಾರೆ. ಇದರಿಂದ ಯಾವುದೇ ಅನಾಹುತ ಸಂಭವಿಸದೇ ಪರಿಸ್ಥಿತಿ ನಿಯಂತ್ರಣದಲ್ಲಿಯೇ ಉಳಿದಿದೆ.
ಗಿರೀಶ್ ಧೈರ್ಯಕ್ಕೆ ಪೊಲೀಸರ ಮೆಚ್ಚುಗೆ
ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದ ಬಳಿಕ ಗಿರೀಶ್ ಅವರ ಧೈರ್ಯ ಮತ್ತು ಸಮಯಪ್ರಜ್ಞೆಯನ್ನು ಶ್ಲಾಘಿಸಿದ್ದಾರೆ. ತನಿಖೆಯ ವೇಳೆ ಆರೋಪಿಯನ್ನು ಪತ್ತೆಹಚ್ಚಲು ಹಲವು ಪ್ರಯತ್ನಗಳು ನಡೆದಿದ್ದರೂ, ಸ್ಥಳೀಯ ಯುವಕನ ಎಚ್ಚರಿಕೆಯಿಂದ ಬಂಧನ ಸುಲಭವಾಗಿದೆ ಎಂದು ಅಧಿಕಾರಿಗಳು ಮೆಚ್ಚುಗೆ ವ್ಯಕ್ತಪಡಿಸಿರುವುದಾಗಿ ಗಿರೀಶ್ ತಿಳಿಸಿದ್ದಾರೆ.
ಈ ಘಟನೆ ಸಾಮಾನ್ಯ ನಾಗರಿಕರ ಜಾಗೃತಿ ಮತ್ತು ಪೊಲೀಸರೊಂದಿಗೆ ನೀಡುವ ಸಹಕಾರ ಅಪರಾಧ ತನಿಖೆಯಲ್ಲಿ ಎಷ್ಟು ಮಹತ್ವದ್ದಾಗಿದೆ ಎಂಬುದಕ್ಕೆ ಮತ್ತೊಂದು ಉದಾಹರಣೆಯಾಗಿದೆ.
