ಇಂದಿನ ವೇಗವಂತದ ಬದುಕಿನಲ್ಲಿ ಮಹಿಳೆಯರು ಎದುರಿಸುತ್ತಿರುವ ಅರೋಗ್ಯ ಸವಾಲುಗಳು ಒಂದೆರಡಲ್ಲ. ಅದರಲ್ಲೂ ವಿಶೇಷವಾಗಿ ಅನೇಕ ಯುವತಿಯರು ಹಾಗೂ ಮಹಿಳೆಯರನ್ನು ಮಾನಸಿಕವಾಗಿ ಕುಗ್ಗಿಸುತ್ತಿರುವ ಸಮಸ್ಯೆಯೆಂದರೆ ಮುಖದ ಮೇಲೆ ಅಸಹಜವಾಗಿ ಕೂದಲು ಬೆಳೆಯುವುದು. ಗಲ್ಲ, ಮೇಲ್ತುಟಿ ಅಥವಾ ದವಡೆ ಭಾಗದಲ್ಲಿ ಕಾಣಿಸಿಕೊಳ್ಳುವ ಈ ಕೂದಲಿನ ಬೆಳವಣಿಗೆಯು ಕೇವಲ ಸೌಂದರ್ಯದ ಸಮಸ್ಯೆಯಲ್ಲ, ಬದಲಿಗೆ ಇದು ದೇಹದ ಒಳಗಿನ ಹಾರ್ಮೋನ್ ಏರುಪೇರಿನ ಗಂಭೀರ ಮುನ್ಸೂಚನೆಯಾಗಿದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
ವೈದ್ಯಕೀಯ ಭಾಷೆಯಲ್ಲಿ ಈ ಸ್ಥಿತಿಯನ್ನು ‘ಹಿರ್ಸುಟಿಸಮ್’ (Hirsutism) ಎಂದು ಕರೆಯಲಾಗುತ್ತದೆ. ಮಹಿಳೆಯರಲ್ಲಿ ಪುರುಷ ಹಾರ್ಮೋನ್ ಆದ ‘ಆಂಡ್ರೋಜನ್’ ಮಟ್ಟ ಹೆಚ್ಚಾದಾಗ ಈ ಸಮಸ್ಯೆ ಉದ್ಭವಿಸುತ್ತದೆ. ಇದಕ್ಕೆ ಮುಖ್ಯ ಕಾರಣ ‘ಪಿಸಿಒಎಸ್’ (PCOS) ಎಂಬ ಹಾರ್ಮೋನ್ ದೋಷ. ಇತ್ತೀಚಿನ ಅಂಕಿಅಂಶಗಳ ಪ್ರಕಾರ ಶೇ. 20 ರಿಂದ 30 ರಷ್ಟು ಮಹಿಳೆಯರು ಈ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಅಸಹಜ ಕೂದಲು ಬೆಳೆಯುವುದರ ಜೊತೆಗೆ ಅನಿಯಮಿತ ಮುಟ್ಟು, ಅತಿಯಾದ ತೂಕ ಏರಿಕೆ ಹಾಗೂ ಮೊಡವೆಗಳು ಇದರ ಇತರ ಲಕ್ಷಣಗಳಾಗಿವೆ. ಕೇವಲ ವ್ಯಾಕ್ಸಿಂಗ್ ಅಥವಾ ಥ್ರೆಡ್ಡಿಂಗ್ ಮಾಡುವುದರಿಂದ ಈ ಸಮಸ್ಯೆಗೆ ಶಾಶ್ವತ ಮುಕ್ತಿ ಸಿಗುವುದಿಲ್ಲ. ವೈದ್ಯರ ಮಾರ್ಗದರ್ಶನದಲ್ಲಿ ಹಾರ್ಮೋನ್ ಪರೀಕ್ಷೆ ಮಾಡಿಸಿಕೊಳ್ಳುವುದು ಮತ್ತು ತಜ್ಞ ಚರ್ಮರೋಗ ವೈದ್ಯರ ಮೂಲಕ ‘ಲೇಸರ್ ಹೇರ್ ರಿಡಕ್ಷನ್’ ಚಿಕಿತ್ಸೆ ಪಡೆಯುವುದು ಅತ್ಯಂತ ಪರಿಣಾಮಕಾರಿ ಮಾರ್ಗವಾಗಿದೆ.
