ವಿಜಯಪುರ: ಉತ್ತರ ಪತ್ರಿಕೆಯಲ್ಲಿ ಉತ್ತರಗಳನ್ನು ಬರೆಯುವ ಬದಲು ವಿದ್ಯಾರ್ಥಿಗಳು ವಿಚಿತ್ರ ಕೋರಿಕೆಗಳನ್ನು ಬರೆಯುವ ಪ್ರಸಂಗಗಳು ಆಗಾಗ ವರದಿಯಾಗುತ್ತಲೇ ಇರುತ್ತವೆ. ಆದರೆ, ಇಲ್ಲೊಬ್ಬ ವಿದ್ಯಾರ್ಥಿ ತನ್ನ ಪ್ರೇಮಕ್ಕಾಗಿ ಮೌಲ್ಯಮಾಪಕರಿಗೆ ಲಂಚದ ಆಮಿಷವೊಡ್ಡಿ ಪರೀಕ್ಷೆ ಪಾಸ್ ಮಾಡುವಂತೆ ಅಂಗಲಾಚಿರುವ ಘಟನೆ ಈಗ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಪರೀಕ್ಷೆಯಲ್ಲಿ ಉತ್ತೀರ್ಣನಾದರೆ ಮಾತ್ರ ಪ್ರೇಯಸಿ ತನ್ನ ಪ್ರೀತಿಯನ್ನು ಒಪ್ಪಿಕೊಳ್ಳುತ್ತಾಳೆ ಎಂಬ ವಿಚಿತ್ರ ಷರತ್ತನ್ನು ಈ ವಿದ್ಯಾರ್ಥಿ ಪತ್ರಿಕೆಯಲ್ಲಿ ಉಲ್ಲೇಖಿಸಿದ್ದಾನೆ. ಕೇವಲ ಮನವಿ ಮಾಡುವುದಷ್ಟೇ ಅಲ್ಲದೆ, ಮೌಲ್ಯಮಾಪಕರಿಗೆ “ಚಹಾ ಕುಡಿಯಲು” ಎಂದು ಉತ್ತರ ಪತ್ರಿಕೆಯೊಳಗೆ 500 ರೂಪಾಯಿ ನೋಟನ್ನು ಇರಿಸಿರುವುದು ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ.
ವೈರಲ್ ಸುದ್ದಿಯ ಪ್ರಮುಖ ಅಂಶಗಳು:
- ಪ್ರೇಮದ ಪರೀಕ್ಷೆ: ಪರೀಕ್ಷೆ ಪಾಸ್ ಆದರೆ ಮಾತ್ರ ಹುಡುಗಿ ಪ್ರೀತಿಸುತ್ತಾಳೆ ಎಂಬ ಕಾರಣಕ್ಕೆ ವಿದ್ಯಾರ್ಥಿಯ ಈ ಕಸರತ್ತು.
- ಲಂಚದ ಆಮಿಷ: ಮೌಲ್ಯಮಾಪಕರಿಗೆ ಚಹಾ ಕುಡಿಯಲು 500 ರೂಪಾಯಿ ನೀಡಿ ಪಾಸ್ ಮಾಡುವಂತೆ ವಿನಂತಿ.
- ಸಾಮಾಜಿಕ ಜಾಲತಾಣದಲ್ಲಿ ವೈರಲ್: ‘vijayapur_le_dosta’ ಎಂಬ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಈ ಫೋಟೋ ಹಂಚಿಕೊಳ್ಳಲಾಗಿದೆ.
- ಭಾವನಾತ್ಮಕ ಮನವಿ: “ಸರ್, ನಿಮ್ಮ ಕಾಲು ಬೀಳುತ್ತೇನೆ, ನನ್ನ ಪ್ರೀತಿ ನಿಮ್ಮ ಕೈಯಲ್ಲಿದೆ” ಎಂದು ಪತ್ರಿಕೆಯಲ್ಲಿ ಬರೆದ ವಿದ್ಯಾರ್ಥಿ.
ಈ ಘಟನೆಯ ವಿವರಕ್ಕೆ ಬರುವುದಾದರೆ, ವಿದ್ಯಾರ್ಥಿಯು ಉತ್ತರ ಪತ್ರಿಕೆಯಲ್ಲಿ ಅತ್ಯಂತ ಮುಗ್ಧವಾಗಿ ಹಾಗೂ ಹಾಸ್ಯಾಸ್ಪದವಾಗಿ ತನ್ನ ಅಳಲನ್ನು ತೋಡಿಕೊಂಡಿದ್ದಾನೆ. “ಸರ್ ರೀ, ಮೇಡಂ ರೀ.. ನಿಮ್ಮ ಕಾಲ ಬೀಳ್ತೀನಿ. ನನ್ನ ಲವ್ ನಿಮ್ಮ ಕೈಯಾಗ ಐತಿ. ನಾ ಪೇಪರ್ ಪಾಸ್ ಆದ್ರೆ ಅಕಿ ಲವ್ ಮಾಡ್ತೀನಿ ಅಂದಾಳ,” ಎಂದು ಬರೆದಿರುವ ಈತ, ಉತ್ತರ ಬರೆಯಬೇಕಾದ ಜಾಗದಲ್ಲಿ ತನ್ನ ಪ್ರೇಮ ಪುರಾಣವನ್ನು ಬಿಚ್ಚಿಟ್ಟಿದ್ದಾನೆ.
ಪ್ರಸ್ತುತ ಈ ಉತ್ತರ ಪತ್ರಿಕೆಯ ಫೋಟೋ ಇಂಟರ್ನೆಟ್ನಲ್ಲಿ ಸಕ್ಕತ್ ವೈರಲ್ ಆಗುತ್ತಿದ್ದು, ನೆಟ್ಟಿಗರು ತರಹೇವಾರಿ ಕಮೆಂಟ್ ಮಾಡುತ್ತಿದ್ದಾರೆ. ಕೆಲವರು ವಿದ್ಯಾರ್ಥಿಯ ಸ್ಥಿತಿಯನ್ನು ಕಂಡು ನಗುತ್ತಿದ್ದರೆ, ಇನ್ನು ಕೆಲವರು ಶಿಕ್ಷಣ ವ್ಯವಸ್ಥೆ ಮತ್ತು ಇಂದಿನ ಯುವ ಪೀಳಿಗೆಯ ಮನಸ್ಥಿತಿಯ ಬಗ್ಗೆ ಕಳವಳ ವ್ಯಕ್ತಪಡಿಸುತ್ತಿದ್ದಾರೆ. 500 ರೂಪಾಯಿ ಆಮಿಷವೊಡ್ಡಿ ಪರೀಕ್ಷೆ ಗೆಲ್ಲಲು ಹೊರಟ ಈ “ಪ್ರೇಮಿ”ಯ ಸಾಹಸ ಮಾತ್ರ ಈಗ ಎಲ್ಲೆಡೆ ಸುದ್ದಿಯಾಗಿದೆ.
