ಗುಜರಾತ್ನ ಪವಿತ್ರ ಕ್ಷೇತ್ರ ಸೋಮನಾಥದಲ್ಲಿ ಭಾನುವಾರ ಆಯೋಜಿಸಲಾಗಿದ್ದ ‘ಸೋಮನಾಥ ಸ್ವಾಭಿಮಾನ್ ಪರ್ವ’ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಸಾಂಸ್ಕೃತಿಕ ಅಸ್ಮಿತೆಯ ಬಗ್ಗೆ ಮಹತ್ವದ ಮಾತುಗಳನ್ನು ಆಡಿದ್ದಾರೆ. ಕ್ರಿ.ಶ 1026 ರಲ್ಲಿ ಘಜ್ನಿ ಮೊಹಮ್ಮದ್ ಸೋಮನಾಥ ದೇವಾಲಯದ ಮೇಲೆ ನಡೆಸಿದ ಆಕ್ರಮಣಕ್ಕೆ ಈಗ ಸರಿಯಾಗಿ 1,000 ವರ್ಷಗಳು ತುಂಬಿವೆ. ಈ ಐತಿಹಾಸಿಕ ಸಂದರ್ಭವನ್ನು ಸ್ಮರಿಸಿದ ಪ್ರಧಾನಿ, ಭಾರತದ ಮೇಲೆ ದಾಳಿ ಮಾಡಿದ ಕ್ರೂರ ಆಕ್ರಮಣಕಾರರು ಇಂದು ಕೇವಲ ಇತಿಹಾಸದ ಕಪ್ಪು ಪುಟಗಳಿಗೆ ಸೀಮಿತವಾಗಿದ್ದಾರೆ, ಆದರೆ ಭಾರತದ ಅಚಲ ನಂಬಿಕೆಯ ಸಂಕೇತವಾದ ಸೋಮನಾಥ ದೇಗುಲ ಇಂದಿಗೂ ಸನಾತನ ಧರ್ಮದ ಧ್ವಜವನ್ನು ಎತ್ತರಕ್ಕೆ ಹಾರಿಸುತ್ತಿದೆ ಎಂದು ಗುಡುಗಿದ್ದಾರೆ.
ಸ್ವಾತಂತ್ರ್ಯಾನಂತರ ಸರ್ದಾರ್ ವಲ್ಲಭಭಾಯಿ ಪಟೇಲರು ದೇಗುಲದ ಪುನರ್ ನಿರ್ಮಾಣಕ್ಕೆ ಮುಂದಾದಾಗ ಅದನ್ನು ತಡೆಯಲು ಪ್ರಯತ್ನಿಸಿದ ಮನಸ್ಥಿತಿಗಳು ಇಂದಿಗೂ ದೇಶದಲ್ಲಿ ಜೀವಂತವಾಗಿವೆ ಎಂದು ಮೋದಿ ಕಳವಳ ವ್ಯಕ್ತಪಡಿಸಿದ್ದಾರೆ. “ಅಂದು ದೇವಾಲಯದ ಜೀರ್ಣೋದ್ಧಾರವನ್ನು ವಿರೋಧಿಸಿದ ಶಕ್ತಿಗಳು ಇಂದೂ ಸಕ್ರಿಯವಾಗಿವೆ. ಇಂತಹ ವಿಚ್ಛಿದ್ರಕಾರಿ ಶಕ್ತಿಗಳನ್ನು ಸೋಲಿಸಲು ಭಾರತೀಯರು ಸದಾ ಜಾಗೃತರಾಗಿರಬೇಕು ಮತ್ತು ಒಗ್ಗಟ್ಟಿನಿಂದ ಶಕ್ತಿಶಾಲಿಯಾಗಬೇಕು” ಎಂದು ಅವರು ಕರೆ ನೀಡಿದರು. ತುಷ್ಟೀಕರಣದ ರಾಜಕಾರಣಕ್ಕಾಗಿ ದೇಶದ ನೈಜ ಇತಿಹಾಸವನ್ನು ಮರೆಮಾಚುವ ಪ್ರಯತ್ನಗಳು ನಡೆದವು ಎಂದು ಆಕ್ರೋಶ ವ್ಯಕ್ತಪಡಿಸಿದ ಅವರು, ಸೋಮನಾಥ ಕೇವಲ ಕಲ್ಲುಗಳ ಕಟ್ಟಡವಲ್ಲ, ಅದು ಭಾರತದ ಪುನರುತ್ಥಾನದ ಸಾಕ್ಷಿ ಎಂದರು.
