ಮಣಿಪಾಲ : ಮಣಿಪಾಲದಲ್ಲಿ ನಡೆಯುತ್ತಿದ್ದ ಗಾಂಜಾ ಹಾಗೂ ಎಲ್‌ಎಸ್‌ಡಿ ಡ್ರಗ್ಸ್ ಮಾರಾಟ ಮತ್ತು ಸೇವನೆ ಜಾಲವನ್ನು ಭೇದಿಸಿದ ಪೊಲೀಸರು ಒಟ್ಟು ಏಳು ಮಂದಿಯನ್ನು ಬಂಧಿಸಿದ್ದಾರೆ. ಈ ಪೈಕಿ ಮೂವರು ಡ್ರಗ್ಸ್ ಮಾರಾಟಗಾರರಾಗಿದ್ದರೆ, ನಾಲ್ವರು ಸೇವನೆ ಮಾಡುತ್ತಿದ್ದವರು.
ಎರಡು ಪ್ರಮುಖ ಕಾರ್ಯಾಚರಣೆಗಳು
ಮಣಿಪಾಲದ ವಿದ್ಯಾರ್ಥಿಗಳು ಮತ್ತು ಕಾರ್ಮಿಕರನ್ನು ಗುರಿಯಾಗಿಸಿಕೊಂಡು ಮಾದಕ ವಸ್ತು ಮಾರಾಟ ಮಾಡುತ್ತಿದ್ದ ಜಾಲದ ಬಗ್ಗೆ ಖಚಿತ ಮಾಹಿತಿ ಪಡೆದ ಮಣಿಪಾಲ ಇನ್ಸ್‌ಪೆಕ್ಟರ್ ಮಹೇಶ್ ಪ್ರಸಾದ್ ನೇತೃತ್ವದ ತಂಡ ಆಗಸ್ಟ್ 16ರಂದು ಕಾರ್ಯಾಚರಣೆ ನಡೆಸಿತು. ಮಣಿಪಾಲ ಆಟೋ ಬಾರ್ ಬಳಿಯ ಕಟ್ಟಡದ ಕೊಠಡಿಯೊಂದರ ಮೇಲೆ ದಾಳಿ ಮಾಡಿ, ಕೇರಳ ಮೂಲದ ಅಫ್ಷೀನ್ (26) ಮತ್ತು ಮಂಗಳೂರಿನ ಎಂಜಿನಿಯರಿಂಗ್ ವಿದ್ಯಾರ್ಥಿ ಶಿವನಿಧಿ ಆಚಾರ್ಯ (20) ಎಂಬುವವರನ್ನು ಬಂಧಿಸಿದರು. ಆರೋಪಿಗಳಿಂದ 1 ಕೆಜಿ 237 ಗ್ರಾಂ ಗಾಂಜಾ, 0.038 ಗ್ರಾಂ ಎಲ್‌ಎಸ್‌ಡಿ ಸ್ಟ್ರಿಪ್, ನಗದು ₹2,000 ಹಾಗೂ ಇತರೆ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಮರುದಿನ, ಆಗಸ್ಟ್ 17ರಂದು ಪಿಎಸ್‌ಐ ಅಕ್ಷಯ್ ಕುಮಾರಿ ನೇತೃತ್ವದಲ್ಲಿ ನಡೆದ ಮತ್ತೊಂದು ದಾಳಿಯಲ್ಲಿ ಪ್ರಕರಣದ ಮತ್ತೊಬ್ಬ ಪ್ರಮುಖ ಆರೋಪಿ ಕೇರಳದ ಮನೀಶ್ (34) ಎಂಬಾತನನ್ನು ಬಂಧಿಸಿ, ಆತನಿಂದ 653 ಗ್ರಾಂ ಗಾಂಜಾ ಮತ್ತು ಇತರ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಯಿತು.
ಸೇವನೆ ಆರೋಪದಡಿ ನಾಲ್ವರ ಬಂಧನ
ಪೊಲೀಸರು ಈ ಹಿಂದೆಯಷ್ಟೇ ನಡೆಸಿದ್ದ ಡ್ರಗ್ಸ್ ಪರೀಕ್ಷೆಯಲ್ಲಿ ಗಾಂಜಾ ಸೇವನೆ ಮಾಡಿದ್ದು ದೃಢಪಟ್ಟಿದ್ದ ನಾಲ್ವರು ಕೇರಳ ಮೂಲದ ಕಾರ್ಮಿಕರನ್ನೂ ಬಂಧಿಸಿದ್ದಾರೆ. ಇವರುಗಳಾದ ಅಜೀಸ್ (28), ವಿಪಿನ್ (32), ಬಿಪಿನ್ (24) ಮತ್ತು ಆಖಿಲ್ (26) ವಿರುದ್ಧ ಪ್ರತ್ಯೇಕ ಪ್ರಕರಣಗಳನ್ನು ದಾಖಲಿಸಿಕೊಳ್ಳಲಾಗಿದೆ.
ಆರೋಪಿಗಳ ಹಿನ್ನೆಲೆ
ಬಂಧಿತರಾದ ಮೂವರು ಮಾದಕ ವಸ್ತು ಮಾರಾಟಗಾರರಿಗೆ ವಿದ್ಯಾರ್ಥಿಗಳು ಹಾಗೂ ಕಾರ್ಮಿಕರೇ ಮುಖ್ಯ ಗ್ರಾಹಕರಾಗಿದ್ದರು. ಆರೋಪಿಗಳಲ್ಲಿ ಅಫ್ಷೀನ್ ಹಳೆ ವಿದ್ಯಾರ್ಥಿಯಾಗಿದ್ದರೆ, ಶಿವನಿಧಿ ಪ್ರಸ್ತುತ ಮಂಗಳೂರಿನಲ್ಲಿ ಎಂಜಿನಿಯರಿಂಗ್ ವಿದ್ಯಾರ್ಥಿಯಾಗಿದ್ದಾನೆ. ಮನೀಶ್ ಹೊರ ರಾಜ್ಯಗಳಿಂದ ಗಾಂಜಾ ತಂದು ಕಾರ್ಮಿಕರಿಗೆ ಪೂರೈಸುತ್ತಿದ್ದನು. ಈ ಮೂವರು ಆರೋಪಿಗಳ ವಿರುದ್ಧ ಈಗಾಗಲೇ ಹಿಂದಿನ ಪ್ರಕರಣಗಳು ದಾಖಲಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಉಡುಪಿ ಪೊಲೀಸ್ ವರಿಷ್ಠಾಧಿಕಾರಿ ಹರಿರಾಮ್ ಶಂಕರ್ ಐಪಿಎಸ್ ಅವರ ನಿರ್ದೇಶನದ ಮೇರೆಗೆ ಮಣಿಪಾಲ ಪೊಲೀಸರು ಈ ಯಶಸ್ವಿ ಕಾರ್ಯಾಚರಣೆ ನಡೆಸಿದ್ದಾರೆ.
