ಕೇತನ್ ಹತ್ಯೆ ಪ್ರಕರಣ: ಸಿಸಿಟಿವಿಯಿಂದ ಬಯಲಾಯ್ತು ಭಾವಿ ವಧುವಿನ ಸಂಚು

ಮಹಾರಾಷ್ಟ್ರದ ಪುಣೆಯಲ್ಲಿ ಉದ್ಯಮಿ ಕೇತನ್ ಅಗರ್ವಾಲ್ ಸಾವಿನ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖಾಧಿಕಾರಿಗಳು ಬೆಚ್ಚಿಬೀಳಿಸುವ ಮಾಹಿತಿಗಳನ್ನು ಬಹಿರಂಗಪಡಿಸಿದ್ದಾರೆ. ಆರಂಭದಲ್ಲಿ ಇದು ಕೋಟೆಯಿಂದ ಜಾರಿ ಬಿದ್ದ ಅಪಘಾತ ಎಂದು ಪರಿಗಣಿಸಲಾಗಿದ್ದರೂ, ತನಿಖೆ ಮುಂದುವರಿದಂತೆ ಸಾವಿನ ಹಿಂದೆ ಸಂಚು ಅಡಗಿರುವುದು ಬೆಳಕಿಗೆ ಬಂದಿದೆ.

ಕೇತನ್ ಅವರ ಸಾವಿನ ಬಳಿಕ ನಡೆದ ವಿಚಾರಣೆಯಲ್ಲಿ ಭಾವಿ ವಧು ಸಿಯಾ ಗೋಯಲ್ ಅವರ ವರ್ತನೆ ಪೊಲೀಸರಲ್ಲಿ ಅನುಮಾನ ಹುಟ್ಟಿಸಿತ್ತು. ಬಳಿಕ ಲೋಹಗಢ ಕೋಟೆ ಪ್ರದೇಶದ ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಿದಾಗ ಪ್ರಕರಣಕ್ಕೆ ಮಹತ್ವದ ಸುಳಿವು ಸಿಕ್ಕಿದ್ದು, ತನಿಖೆಯ ದಿಕ್ಕೇ ಬದಲಾಗಿದೆ.

ಸಿಸಿಟಿವಿ ದೃಶ್ಯಗಳಲ್ಲಿ ಯುವಕನೊಬ್ಬ ಕೇತನ್ ಮತ್ತು ಸಿಯಾಳನ್ನು ಹಿಂಬಾಲಿಸುತ್ತಿರುವುದು ಕಂಡುಬಂದಿತ್ತು. ಹೆಚ್ಚಿನ ಪರಿಶೀಲನೆಯ ಬಳಿಕ ಆತ ಸಿಯಾಳ ಪ್ರಿಯಕರ ಚೇತನ್ ಚೌಧರಿ ಎಂಬುದು ದೃಢಪಟ್ಟಿದ್ದು, ಇದೇ ಪ್ರಕರಣ ಭೇದಿಸಲು ಪ್ರಮುಖ ಸಾಕ್ಷಿಯಾಗಿದೆ.ಕೇತನ್ ಅಗರ್ವಾಲ್ ಹತ್ಯೆ ಪ್ರಕರಣದಲ್ಲಿ ಸಿಸಿಟಿವಿಯೇ ಪ್ರಮುಖ ಸಾಕ್ಷಿ

ಪ್ರಮುಖ ಅಂಶಗಳು

ಆರಂಭದಲ್ಲಿ ಪ್ರಕರಣವನ್ನು ಅಪಘಾತ ಸಾವು ಎಂದು ಪರಿಗಣಿಸಲಾಗಿತ್ತು.
ಸಿಯಾ ಗೋಯಲ್ ವರ್ತನೆ ಪೊಲೀಸರಲ್ಲಿ ಅನುಮಾನ ಮೂಡಿಸಿತ್ತು.
ಸಿಸಿಟಿವಿಯಲ್ಲಿ ಚೇತನ್ ಚೌಧರಿ ಹಿಂಬಾಲಿಸುತ್ತಿರುವ ದೃಶ್ಯ ಪತ್ತೆಯಾಗಿದೆ.
ಮದುವೆಯನ್ನು ಮುಂದೂಡಲು ಸಿಯಾ ಹಿಂದೆಯೇ ಆಸಕ್ತಿ ತೋರಿದ್ದ ಮಾಹಿತಿ ಲಭ್ಯವಾಗಿದೆ.
7 ತಿಂಗಳಲ್ಲಿ ಸಿಯಾ ಮತ್ತು ಚೇತನ್ ನಡುವೆ 2004 ಕರೆಗಳು ನಡೆದಿರುವುದು ಬೆಳಕಿಗೆ ಬಂದಿದೆ.
ಒಟ್ಟು 248 ಗಂಟೆಗಳ ಕಾಲ ಇಬ್ಬರೂ ಸಂಭಾಷಣೆ ನಡೆಸಿರುವ ಮಾಹಿತಿ ತನಿಖೆಯಲ್ಲಿ ಸಿಕ್ಕಿದೆ.

ಕುಟುಂಬದ ಅನುಮಾನವೇ ತನಿಖೆಗೆ ಹೊಸ ತಿರುವು ನೀಡಿತು

ಕೇತನ್ ಸಾವಿನ ಕೆಲ ದಿನಗಳ ಬಳಿಕ ಸಾಂತ್ವನ ಹೇಳಲು ತೆರಳಿದ್ದ ಕುಟುಂಬ ಸದಸ್ಯರಿಗೆ ಸಿಯಾ ನೀಡಿದ ಉತ್ತರಗಳು ಅನುಮಾನ ಹುಟ್ಟಿಸಿದ್ದವು ಎಂದು ತಿಳಿದುಬಂದಿದೆ. ಘಟನೆ ನಡೆದ ದಿನದ ಬಗ್ಗೆ ಸ್ಪಷ್ಟ ಮಾಹಿತಿ ನೀಡದೇ ತಪ್ಪಿಸಿಕೊಳ್ಳುವ ಪ್ರಯತ್ನ ನಡೆಸಿದ್ದಳು ಎಂಬ ಆರೋಪ ಕೇಳಿಬಂದಿದೆ. ಇದರ ಬೆನ್ನಲ್ಲೇ ಕುಟುಂಬಸ್ಥರು ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸುವಂತೆ ಪೊಲೀಸರನ್ನು ಒತ್ತಾಯಿಸಿದ್ದರು.

ಮದುವೆಗೆ ವಿರೋಧ ಹಿನ್ನೆಲೆ; ಕೊಲೆ ಸಂಚು ಆರೋಪ

ತನಿಖೆಯ ವೇಳೆ ಸಿಯಾ ಮತ್ತು ಚೇತನ್ ನಡುವಿನ ಆಪ್ತ ಸಂಬಂಧದ ಬಗ್ಗೆ ಹಲವು ಮಾಹಿತಿಗಳು ಹೊರಬಂದಿವೆ. ಮದುವೆಗೆ ಸಿಯಾ ಸಂಪೂರ್ಣ ಒಪ್ಪಿಗೆ ಹೊಂದಿರಲಿಲ್ಲ ಎಂಬ ಅಂಶವೂ ಬೆಳಕಿಗೆ ಬಂದಿದೆ. ಇಬ್ಬರೂ ಸೇರಿ ಕೇತನ್ ಅವರನ್ನು ದಾರಿ ತಪ್ಪಿಸುವ ಯೋಜನೆ ರೂಪಿಸಿದ್ದಾರೆಯೇ ಎಂಬ ದಿಕ್ಕಿನಲ್ಲಿ ಪೊಲೀಸರು ತನಿಖೆ ನಡೆಸಿದ್ದಾರೆ.

7 ತಿಂಗಳಲ್ಲಿ ಸಾವಿರಾರು ಕರೆಗಳು

ಡಿಜಿಟಲ್ ದಾಖಲೆಗಳ ಪರಿಶೀಲನೆಯಲ್ಲಿ ಸಿಯಾ ಮತ್ತು ಚೇತನ್ ಕಳೆದ 7 ತಿಂಗಳಲ್ಲಿ ಫೇಸ್‌ಟೈಮ್ ಹಾಗೂ ವಾಟ್ಸ್‌ಆ್ಯಪ್ ಮೂಲಕ 2004 ಬಾರಿ ಸಂಪರ್ಕದಲ್ಲಿದ್ದದ್ದು ಪತ್ತೆಯಾಗಿದೆ. ಸುಮಾರು 248 ಗಂಟೆಗಳ ಕಾಲ ಮಾತುಕತೆ ನಡೆಸಿರುವ ದಾಖಲೆಗಳು ತನಿಖೆಗೆ ಮಹತ್ವದ ಸಾಕ್ಷಿಯಾಗಿ ಪರಿಣಮಿಸಿವೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ವಿವಿಧ ತಾಂತ್ರಿಕ ಸಾಕ್ಷ್ಯಗಳು, ಸಿಸಿಟಿವಿ ದೃಶ್ಯಗಳು ಹಾಗೂ ಡಿಜಿಟಲ್ ಸಂವಹನ ದಾಖಲೆಗಳನ್ನು ಆಧರಿಸಿ ಮುಂದಿನ ತನಿಖೆ ಮುಂದುವರಿಸಿದ್ದಾರೆ.