ಬೆಂಗಳೂರು: ರಾಜ್ಯದ ಪ್ರಾಥಮಿಕ ಶಿಕ್ಷಣ ಕ್ಷೇತ್ರದಲ್ಲಿ ಪೋಷಕರನ್ನು ಕಾಡುತ್ತಿದ್ದ ಪ್ರಮುಖ ಸಮಸ್ಯೆಯೊಂದಕ್ಕೆ ರಾಜ್ಯ ಸರ್ಕಾರ ಮುಕ್ತಿ ನೀಡಿದೆ. 1 ನೇ ತರಗತಿ ದಾಖಲಾತಿಗಾಗಿ ನಿಗದಿಪಡಿಸಲಾಗಿದ್ದ ಕನಿಷ್ಠ ವಯೋಮಿತಿಯಲ್ಲಿ ಮಹತ್ವದ ಬದಲಾವಣೆ ತರುವ ಮೂಲಕ ಶಾಲಾ ಪ್ರವೇಶಾತಿ ಪ್ರಕ್ರಿಯೆಯನ್ನು ಸುಗಮಗೊಳಿಸಲಾಗಿದೆ.
2026-27 ನೇ ಶೈಕ್ಷಣಿಕ ಸಾಲಿನಿಂದ ಜಾರಿಗೆ ಬರುವಂತೆ, ಒಂದನೇ ತರಗತಿಗೆ ಮಗುವನ್ನು ದಾಖಲಿಸಲು ಇದ್ದ 6 ವರ್ಷಗಳ ಕಡ್ಡಾಯ ವಯೋಮಿತಿಯನ್ನು ಸಡಿಲಿಕೆ ಮಾಡಲಾಗಿದೆ. ಈ ಕುರಿತು ಗುರುವಾರ ವಿಧಾನಸಭೆಯಲ್ಲಿ ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅಧಿಕೃತವಾಗಿ ಘೋಷಣೆ ಮಾಡಿದ್ದು, ಇದರಿಂದ ಸಾವಿರಾರು ಪೋಷಕರಿಗೆ ದೊಡ್ಡ ಮಟ್ಟದ ನಿಮ್ಮದಿ ಸಿಕ್ಕಂತಾಗಿದೆ.
ಈ ಹಿಂದೆ ಜಾರಿಯಲ್ಲಿದ್ದ ನಿಯಮದ ಪ್ರಕಾರ, ಮಗುವಿಗೆ 6 ವರ್ಷ ತುಂಬಿರಲೇಬೇಕಿತ್ತು. ಆದರೆ, ವಯಸ್ಸಿನ ಕಾರಣದಿಂದ ಕೇವಲ ಕೆಲವು ದಿನಗಳ ಅಂತರದಲ್ಲಿ ಮಕ್ಕಳು ಒಂದು ವರ್ಷದ ಶಿಕ್ಷಣವನ್ನು ಕಳೆದುಕೊಳ್ಳಬಾರದು ಎಂಬ ದೃಷ್ಟಿಯಿಂದ ಸರ್ಕಾರ ಈ 2 ತಿಂಗಳ ವಿನಾಯಿತಿಯನ್ನು ನೀಡಿದೆ.
ಸರ್ಕಾರದ ಪ್ರಕಟಣೆಯ ಪ್ರಮುಖ ಅಂಶಗಳು:
- ವಯೋಮಿತಿ ಸಡಿಲಿಕೆ: 1 ನೇ ತರಗತಿ ದಾಖಲಾತಿಗೆ ಈಗಿರುವ 6 ವರ್ಷದ ಮಿತಿಯಲ್ಲಿ 60 ದಿನಗಳ (2 ತಿಂಗಳು) ರಿಯಾಯಿತಿ ನೀಡಲಾಗಿದೆ.
- ಅರ್ಹತೆ: ಮಗುವಿಗೆ ಕನಿಷ್ಠ 5 ವರ್ಷ 10 ತಿಂಗಳು ತುಂಬಿದ್ದರೆ ಅಂತಹ ಮಕ್ಕಳು 1 ನೇ ತರಗತಿ ಪ್ರವೇಶಕ್ಕೆ ಅರ್ಹರಾಗುತ್ತಾರೆ.
- ತಾಂತ್ರಿಕ ಬದಲಾವಣೆ: ಶಾಲಾ ದಾಖಲಾತಿ ಸಾಫ್ಟ್ವೇರ್ ಅಥವಾ ತಂತ್ರಾಂಶದಲ್ಲಿ ತಕ್ಷಣವೇ ಬದಲಾವಣೆ ತರಲು ಸೂಚಿಸಲಾಗಿದೆ.
- ಭವಿಷ್ಯದ ಯೋಜನೆ: ಎಲ್ಕೆಜಿ ಮತ್ತು ಯುಕೆಜಿ ಪ್ರವೇಶಾತಿಗೂ ಹೊಸ ನಿಯಮ ರೂಪಿಸಿ ಶಾಶ್ವತ ಪರಿಹಾರ ನೀಡಲು ಇಲಾಖೆ ಸಜ್ಜಾಗಿದೆ.
- ಕಾನೂನು ತಿದ್ದುಪಡಿ: ಕರ್ನಾಟಕ ಶಿಕ್ಷಣ ಕಾಯ್ದೆ 1993 ರ ಅಧ್ಯಾಯ 3, ಸೆಕ್ಷನ್ 20 ರ ಅಡಿಯಲ್ಲಿ ಈ ವಿಶೇಷ ವಿನಾಯಿತಿ ನೀಡಲಾಗುತ್ತಿದೆ.
ವಿಧಾನಸಭೆ ಕಲಾಪದಲ್ಲಿ ಈ ಕುರಿತು ಹೆಚ್ಚಿನ ಮಾಹಿತಿ ನೀಡಿದ ಸಚಿವರು, “ಮಕ್ಕಳ ದಾಖಲಾತಿ ವಿಚಾರದಲ್ಲಿ ಪೋಷಕರು ಅನುಭವಿಸುತ್ತಿದ್ದ ಆತಂಕವನ್ನು ಸರ್ಕಾರ ಗಮನಿಸಿದೆ. ಮಿತಿಯನ್ನು 2 ತಿಂಗಳ ಕಾಲ ಸಡಿಲಗೊಳಿಸುವುದರಿಂದ ಅನೇಕ ಪೋಷಕರಿಗೆ ಅನುಕೂಲವಾಗಲಿದೆ. ಈ ನಿಯಮವು ಕೇವಲ ತಾತ್ಕಾಲಿಕವಲ್ಲದೆ, ಮುಂದಿನ ದಿನಗಳಲ್ಲಿ ಶಾಲಾ ಪೂರ್ವ ಶಿಕ್ಷಣಕ್ಕೂ (LKG/UKG) ಅನ್ವಯವಾಗುವಂತೆ ಸಮಗ್ರ ಕಾನೂನು ರೂಪಿಸಲಾಗುವುದು,” ಎಂದು ಭರವಸೆ ನೀಡಿದರು.
