ಕಾರ್ಕಳ: ಕಳೆದ ಎರಡೂವರೆ ತಿಂಗಳಿನಿಂದ ರಾಜ್ಯ ಸರ್ಕಾರದ ಅಧೀನದಲ್ಲಿದ್ದ ಇಲ್ಲಿನ ಸುಪ್ರಸಿದ್ಧ ಮಾರಿಯಮ್ಮ ದೇವಸ್ಥಾನದ ಆಡಳಿತವು, ಇದೀಗ ಮತ್ತೆ ದೇವಸ್ಥಾನದ ಮೂಲ ವಂಶಪಾರಂಪರ್ಯ ಆಡಳಿತ ಮೊಕ್ತೇಸರಿಗೆ ಅಧಿಕೃತವಾಗಿ ಹಸ್ತಾಂತರಗೊಂಡಿದೆ. ನ್ಯಾಯಾಲಯದ ಆದೇಶದಂತೆ ಹಾಗೂ ಜಿಲ್ಲಾಧಿಕಾರಿಯವರ ನಿರ್ದೇಶನದ ಮೇರೆಗೆ ಆಗಸ್ಟ್ 30ರಂದು ಈ ಪ್ರಕ್ರಿಯೆ ನಡೆಯಿತು. ಈ ಬೆಳವಣಿಗೆಯಿಂದಾಗಿ ದೇವಸ್ಥಾನದ ಟ್ರಸ್ಟಿಗಳು ಮತ್ತು ಭಕ್ತರಲ್ಲಿ ಹರ್ಷ ಮನೆಮಾಡಿದೆ.
ಕಳೆದ 2025 ಜುಲೈ 26ರಂದು ಕೆಲವು ಆಡಳಿತಾತ್ಮಕ ಕಾರಣಗಳಿಂದಾಗಿ ದೇವಸ್ಥಾನದ ಆಡಳಿತವು ಸರ್ಕಾರದ ನಿಯಂತ್ರಣಕ್ಕೆ ಒಳಪಟ್ಟಿತ್ತು. ಆ ಸಂದರ್ಭದಲ್ಲಿ ಕಾರ್ಕಳ ತಹಶೀಲ್ದಾರ್ ಅವರು ದೇವಸ್ಥಾನದ ಆಡಳಿತದ ಪ್ರಭಾರವನ್ನು ವಹಿಸಿಕೊಂಡಿದ್ದರು. ಆ ವೇಳೆ ದೇವಸ್ಥಾನದ ಟ್ರಸ್ಟಿಗಳ ಕಚೇರಿ ಹಾಗೂ ಲಾಕರ್ ಕೊಠಡಿಗಳಿಗೆ ಸೀಲ್ ಹಾಕಿ, ದೇವಸ್ಥಾನದ ವ್ಯವಹಾರಗಳನ್ನು ನಿಯಂತ್ರಿಸಲಾಗಿತ್ತು. ಸರ್ಕಾರದ ಸುಪರ್ದಿಯಲ್ಲಿ ದೇವಸ್ಥಾನದ ಆಡಳಿತವು ತಟಸ್ಥಗೊಂಡಿತ್ತು.
ಇದೀಗ ದೇವಸ್ಥಾನದ ವಂಶಪಾರಂಪರ್ಯ ಮೊಕ್ತೇಸರು ಮಾಡಿದ ಕಾನೂನು ಹೋರಾಟದ ಫಲವಾಗಿ ಜಿಲ್ಲಾಧಿಕಾರಿಯವರ ಆದೇಶದಂತೆ, ಯಥಾಸ್ಥಿತಿ ಕಾಯ್ದುಕೊಳ್ಳುವಂತೆ ನಿರ್ದೇಶನ ನೀಡಲಾಯಿತು. ಅದರಂತೆ, ಇಂದು ತಹಶೀಲ್ದಾರ್ ಅವರು ದೇವಸ್ಥಾನದ ಆವರಣಕ್ಕೆ ಆಗಮಿಸಿ, ಸೀಲ್ ಹಾಕಲಾಗಿದ್ದ ಕೊಠಡಿಗಳ ಬೀಗಗಳನ್ನು ತೆರವುಗೊಳಿಸಿ, ದೇವಸ್ಥಾನದ ಆಡಳಿತದ ಸಂಪೂರ್ಣ ಜವಾಬ್ದಾರಿಯನ್ನು ವಂಶಪಾರಂಪರ್ಯ ಮೊಕ್ತೇಸರುಗಳಿಗೆ ಹಿಂದಿರುಗಿಸಿದರು.
ದೇವಸ್ಥಾನದ ಆಡಳಿತ ಮಂಡಳಿಯ ಸದಸ್ಯರು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದು, ಸರ್ಕಾರದ ಈ ನಿರ್ಧಾರಕ್ಕೆ ಸಂತಸ ವ್ಯಕ್ತಪಡಿಸಿದರು. ಆಡಳಿತವು ಮತ್ತೆ ತಮ್ಮ ಸುಪರ್ದಿಗೆ ಬಂದಿರುವುದರಿಂದ ದೇವಸ್ಥಾನದ ಅಭಿವೃದ್ಧಿ ಕಾರ್ಯಗಳು ಮತ್ತು ಧಾರ್ಮಿಕ ಚಟುವಟಿಕೆಗಳು ಮುಂದುವರಿಯಲಿವೆ ಎಂದು ಮೊಕ್ತೇಸರು ತಿಳಿಸಿದರು. ಈ ಹಸ್ತಾಂತರ ಪ್ರಕ್ರಿಯೆಯು ದೇವಸ್ಥಾನದ ಆಡಳಿತದಲ್ಲಿ ಉಂಟಾಗಿದ್ದ ಅನಿಶ್ಚಿತತೆಯನ್ನು ಕೊನೆಗೊಳಿಸಿದೆ.
