ಬೆಂಗಳೂರು: ನಟ ಮತ್ತು ನಿರ್ದೇಶಕ ರಿಷಬ್ ಶೆಟ್ಟಿ ಅವರು ತಮ್ಮ ಇತ್ತೀಚಿನ ಚಿತ್ರ ‘ಕಾಂತಾರ ಚಾಪ್ಟರ್ 1’ ಮೂಲಕ ದೇಶಾದ್ಯಂತ ಮತ್ತೆ ಸಂಚಲನ ಮೂಡಿಸಿದ್ದಾರೆ. ಈ ಚಿತ್ರವು ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ವಿಶ್ವದಾದ್ಯಂತ 300 ಕೋಟಿ ರೂಪಾಯಿಗಳಿಗೂ ಹೆಚ್ಚು ಆದಾಯ ಗಳಿಸಿ, ಕನ್ನಡ ಚಿತ್ರರಂಗದ ಹಿರಿಮೆಯನ್ನು ಹೆಚ್ಚಿಸಿದೆ.
ಆದರೆ, ಈ ಭರ್ಜರಿ ಯಶಸ್ಸಿನ ಸನ್ನಿವೇಶದಲ್ಲಿ, ಕರಾವಳಿ ಕರ್ನಾಟಕದ ಅತೀ ಪವಿತ್ರ ನಂಬಿಕೆ ಮತ್ತು ಆಚರಣೆಯಾದ ದೈವಾರಾಧನೆಗೆ ಅಪಚಾರವಾಗುತ್ತಿರುವ ಸಂಗತಿಗಳು ಬೆಳಕಿಗೆ ಬಂದಿದ್ದು, ಚಿತ್ರತಂಡಕ್ಕೆ ಅತೀವ ನೋವುಂಟು ಮಾಡಿದೆ. ಚಲನಚಿತ್ರದಲ್ಲಿ ದೈವ ಪಾತ್ರಗಳು ಆವೇಶಭರಿತರಾಗಿ ವರ್ತಿಸುವ ದೃಶ್ಯಗಳನ್ನು ಅನುಕರಿಸಿ, ಕೆಲವು ವ್ಯಕ್ತಿಗಳು ಸಾರ್ವಜನಿಕವಾಗಿ ಅಸಭ್ಯವಾಗಿ ನಡೆದುಕೊಳ್ಳುತ್ತಿರುವುದು ತುಳುನಾಡಿನ ಜನರಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ದೈವ ನಮಗೆ ಸಿನಿಮಾ ಅಲ್ಲ: ನಟ ರಿಷಬ್ ಶೆಟ್ಟಿ
ಈ ವಿವಾದಾತ್ಮಕ ಬೆಳವಣಿಗೆಗಳ ಕುರಿತು ಪ್ರತಿಕ್ರಿಯಿಸಿದ ರಿಷಬ್ ಶೆಟ್ಟಿ, ಇದು ನಿಜಕ್ಕೂ ದುರದೃಷ್ಟಕರ ಮತ್ತು ಅತ್ಯಂತ ಬೇಸರದ ವಿಚಾರ ಎಂದು ಹೇಳಿದ್ದಾರೆ. “ನಾವು ಈ ಚಿತ್ರವನ್ನು ದೈವದ ಆವೇಶವನ್ನು ಹಾಸ್ಯ ಮಾಡುವ ಅಥವಾ ಅನುಕರಿಸುವ ಉದ್ದೇಶದಿಂದ ಖಂಡಿತ ಮಾಡಿಲ್ಲ” ಎಂದು ಅವರು ‘ಇಂಡಿಯಾ ಟುಡೇ’ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಸ್ಪಷ್ಟಪಡಿಸಿದ್ದಾರೆ.
“ನಮ್ಮ ಪಾಲಿಗೆ, ‘ಕಾಂತಾರ ಚಾಪ್ಟರ್ 1’ ಕೇವಲ ಸಿನಿಮಾತ್ಮಕ ಕಥಾ ನಿರೂಪಣೆಯ ಭಾಗ. ಅದನ್ನು ನಾವು ಕಥೆಗೆ ಬೇಕಾದ ಒಂದು ದೃಶ್ಯಾನುಭವಕ್ಕಾಗಿ ಮಾತ್ರ ಬಳಸಿಕೊಂಡಿದ್ದೇವೆ. ಆದರೆ, ದೈವ ಅಥವಾ ಭೂತಾರಾಧನೆ ನಮ್ಮ ಪಾಲಿಗೆ ಕೇವಲ ಸಿನಿಮಾ ಅಲ್ಲ; ಅದು ನಂಬಿಕೆ ಮತ್ತು ಗೌರವದ ಸಂಗತಿ” ಎಂದು ಅವರು ತಮ್ಮ ನಿಲುವನ್ನು ಗಟ್ಟಿಯಾಗಿ ಪ್ರತಿಪಾದಿಸಿದ್ದಾರೆ.
ಚಿತ್ರೀಕರಣದ ಸಮಯದಲ್ಲಿ ವಹಿಸಿದ ಜವಾಬ್ದಾರಿಯ ಬಗ್ಗೆ ಮಾತನಾಡಿದ ಅವರು, “ದೈವ ನರ್ತಕರ ಪಾತ್ರಗಳನ್ನು ಚಿತ್ರಿಸುವಾಗ ನಾವು ಸಾಕಷ್ಟು ಜಾಗರೂಕತೆ ವಹಿಸಿದ್ದೇವೆ. ಅಲ್ಲಿನ ಪಾವಿತ್ರ್ಯತೆಗೆ ಯಾವುದೇ ಧಕ್ಕೆಯಾಗದಂತೆ ಎಚ್ಚರ ವಹಿಸಲಾಗಿತ್ತು. ಚಿತ್ರೀಕರಣಕ್ಕೂ ಮೊದಲು ನಾವು ಯಾವಾಗಲೂ ದೈವಗಳ ಆಶೀರ್ವಾದ ಪಡೆದು ಕೆಲಸ ಆರಂಭಿಸಿದ್ದೆವು” ಎಂದಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುವ ಹುಮ್ಮಸ್ಸಿನಲ್ಲಿ ಯಾರೂ ಈ ರೀತಿ ಅನುಚಿತ ವರ್ತನೆ ತೋರಬಾರದು ಎಂದು ಅವರು ಕೈಮುಗಿದು ಪ್ರಾರ್ಥಿಸಿದ್ದಾರೆ.
ಪವಿತ್ರ ಸಂಪ್ರದಾಯವನ್ನು ಹಾಸ್ಯ ಮಾಡಬೇಡಿ: ಹೊಂಬಾಳೆ ಫಿಲ್ಮ್ಸ್ ಎಚ್ಚರಿಕೆ
ಚಿತ್ರದ ನಿರ್ಮಾಣ ಸಂಸ್ಥೆಯಾದ ಹೊಂಬಾಳೆ ಫಿಲ್ಮ್ಸ್ ಕೂಡ ಪ್ರೇಕ್ಷಕರಿಗೆ ತುರ್ತು ಮನವಿಯೊಂದನ್ನು ಮಾಡಿದೆ. “ದೈವಾರಾಧನೆಯು ತುಳುನಾಡಿನ ಸಂಸ್ಕೃತಿಯ ಅಂತರಾಳ ಮತ್ತು ಅಚಲ ಭಕ್ತಿಯ ಪ್ರತೀಕವಾಗಿದೆ. ನಾವು ದೈವಗಳ ಮಹತ್ವವನ್ನು ಎತ್ತಿ ಹಿಡಿಯುವ ಪವಿತ್ರ ಉದ್ದೇಶದಿಂದಲೇ ಈ ಚಿತ್ರವನ್ನು ನಿರ್ಮಿಸಿದ್ದೇವೆ. ಈ ಮೂಲಕ ನಮ್ಮ ಸಂಸ್ಕೃತಿಯನ್ನು ಜಾಗತಿಕ ವೇದಿಕೆಗೆ ಕೊಂಡೊಯ್ಯುವಲ್ಲಿ ಯಶಸ್ವಿಯಾಗಿದ್ದೇವೆ” ಎಂದು ಹೇಳಿದೆ.
ಆದರೆ, ಇತ್ತೀಚೆಗೆ ಕೆಲವು ಜನರು ಸಾರ್ವಜನಿಕವಾಗಿ ದೈವ ಪಾತ್ರಗಳ ರೀತಿಯಲ್ಲಿ ನಡೆದುಕೊಂಡು ‘ಅಸಭ್ಯ ರೀತಿಯ ಪ್ರದರ್ಶನ’ ನೀಡುತ್ತಿರುವುದನ್ನು ಸಂಸ್ಥೆ ತೀವ್ರವಾಗಿ ಖಂಡಿಸಿದೆ. “ದೈವಾರಾಧನೆಯು ಅಧ್ಯಾತ್ಮಿಕ ಮತ್ತು ಅತ್ಯಂತ ಪವಿತ್ರವಾದ ಸಂಪ್ರದಾಯ. ಅದನ್ನು ಹಾಸ್ಯಕ್ಕೆ ಅಥವಾ ಅಣಕಕ್ಕೆ ಬಳಸಿಕೊಳ್ಳುವುದು ಕ್ಷಮಾರ್ಹವಲ್ಲ. ಇಂತಹ ಕೃತ್ಯಗಳು ಕರಾವಳಿ ಜನರ ಧಾರ್ಮಿಕ ಭಾವನೆಗಳಿಗೆ ಗಂಭೀರ ನೋವುಂಟು ಮಾಡುತ್ತವೆ” ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.
ಆದ್ದರಿಂದ, “ದೈವ ಪಾತ್ರಗಳನ್ನು ನಕಲು ಮಾಡುವುದು, ಅವರ ಧ್ವನಿಯನ್ನು ಅನುಕರಿಸುವುದು ಅಥವಾ ವೇಷಭೂಷಣಗಳನ್ನು ಮನಬಂದಂತೆ ಧರಿಸಿ ವರ್ತಿಸುವುದರಿಂದ ಪ್ರೇಕ್ಷಕರು ದೂರವಿರಬೇಕು. ದೈವಾರಾಧನೆಯ ಪಾವಿತ್ರ್ಯತೆ ಮತ್ತು ಗಾಂಭೀರ್ಯವನ್ನು ಕಾಪಾಡುವುದು ಪ್ರತಿಯೊಬ್ಬ ನಾಗರಿಕನ ಜವಾಬ್ದಾರಿ. ಈ ನಂಬಿಕೆ ಎಂದಿಗೂ ಹಾಸ್ಯದ ವಸ್ತುವಾಗಲು ನಾವು ಅವಕಾಶ ನೀಡಬಾರದು” ಎಂದು ಹೊಂಬಾಳೆ ಫಿಲ್ಮ್ಸ್ ವಿನಂತಿಸಿದೆ.
