ನವದೆಹಲಿ: ಮಧ್ಯಪ್ರಾಚ್ಯದಲ್ಲಿ ಮತ್ತೆ ಯುದ್ಧದ ಭೀತಿ ಎದುರಾಗಿದ್ದು, ಜಾಗತಿಕ ಮಟ್ಟದಲ್ಲಿ ಆತಂಕದ ವಾತಾವರಣ ನಿರ್ಮಾಣವಾಗಿದೆ. ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ ಗುರಿಗಳ ಮೇಲೆ ನಡೆಸಿದ ಭಾರಿ ವೈಮಾನಿಕ ದಾಳಿಯು ಅಂತರರಾಷ್ಟ್ರೀಯ ರಾಜತಾಂತ್ರಿಕ ವಲಯದಲ್ಲಿ ಸಂಚಲನ ಮೂಡಿಸಿದೆ. ಈ ಮಿಲಿಟರಿ ಸಂಘರ್ಷದ ನೇರ ಪರಿಣಾಮ ಈಗ ಕಚ್ಚಾ ತೈಲದ ಮಾರುಕಟ್ಟೆಯ ಮೇಲೆ ಬೀರಿದ್ದು, ಬೆಲೆಗಳು ಗಗನಕ್ಕೇರುತ್ತಿವೆ.
ತೈಲ ಮಾರುಕಟ್ಟೆಯಲ್ಲಿ ಸಂಭವಿಸಿದ ಬದಲಾವಣೆಗಳು: ಯುದ್ಧದ ವಾರ್ತೆ ಹೊರಬೀಳುತ್ತಿದ್ದಂತೆ ಕಳೆದ 24 ಗಂಟೆಗಳಲ್ಲಿ ಕಚ್ಚಾ ತೈಲದ ದರದಲ್ಲಿ ಭಾರಿ ಏರಿಕೆ ಕಂಡುಬಂದಿದೆ. ಜಾಗತಿಕ ಮಾರುಕಟ್ಟೆಯ ಪ್ರಮುಖ ಮಾನದಂಡವಾದ ‘ಬ್ರೆಂಟ್ ಕಚ್ಚಾ ತೈಲ’ದ ಬೆಲೆಯು ಪ್ರತಿ ಬ್ಯಾರೆಲ್ಗೆ $93 ಮುಟ್ಟುವ ಮೂಲಕ ಆತಂಕ ಮೂಡಿಸಿದೆ. ಅದೇ ರೀತಿ, ಅಮೆರಿಕದ ‘ವೆಸ್ಟ್ ಟೆಕ್ಸಾಸ್ ಇಂಟರ್ಮೀಡಿಯೇಟ್’ (WTI) ತೈಲ ಕೂಡ ಪ್ರತಿ ಬ್ಯಾರೆಲ್ಗೆ $90.90 ದರದಲ್ಲಿ ವಹಿವಾಟು ನಡೆಸುತ್ತಿದೆ. ಪೂರೈಕೆಯಲ್ಲಿ ವ್ಯತ್ಯಯವಾಗುವ ಭೀತಿಯಿಂದಾಗಿ ಹೂಡಿಕೆದಾರರು ಆತಂಕಗೊಂಡಿದ್ದಾರೆ.
ಸ್ಥಳೀಯ ಮಾರುಕಟ್ಟೆಯಲ್ಲಿನ ಸ್ಥಿತಿಗತಿ: ಜಾಗತಿಕ ಮಟ್ಟದಲ್ಲಿ ತೈಲ ಬೆಲೆ ಏರಿಕೆಯಾಗುತ್ತಿದ್ದರೂ, ಭಾರತದ ಕೆಲವು ನಗರಗಳಲ್ಲಿ ತೈಲ ಕಂಪನಿಗಳು ಇಂದಿನ ದರದಲ್ಲಿ ಅಲ್ಪ ಇಳಿಕೆ ಮಾಡಿವೆ. ಉತ್ತರ ಪ್ರದೇಶದ ಪ್ರಮುಖ ನಗರಗಳಾದ ನೋಯ್ಡಾದಲ್ಲಿ ಪೆಟ್ರೋಲ್ 94.85 ರೂ. (5 ಪೈಸೆ ಇಳಿಕೆ) ಮತ್ತು ಡೀಸೆಲ್ 87.98 ರೂ. (3 ಪೈಸೆ ಇಳಿಕೆ) ಗೆ ಮಾರಾಟವಾಗುತ್ತಿದೆ. ಗಾಜಿಯಾಬಾದ್ನಲ್ಲಿ ಇಂಧನ ದರದಲ್ಲಿ ಗಣನೀಯ ಇಳಿಕೆಯಾಗಿದ್ದು, ಪೆಟ್ರೋಲ್ 29 ಪೈಸೆ ಇಳಿದು 94.41 ರೂ. ಹಾಗೂ ಡೀಸೆಲ್ 34 ಪೈಸೆ ಇಳಿದು 87.47 ರೂ. ತಲುಪಿದೆ. ಇತ್ತ ಬಿಹಾರದ ರಾಜಧಾನಿ ಪಾಟ್ನಾದಲ್ಲಿ ವಾಹನ ಸವಾರರಿಗೆ ಹೆಚ್ಚಿನ ಸಮಾಧಾನ ಸಿಕ್ಕಿದ್ದು, ಪೆಟ್ರೋಲ್ ದರ 58 ಪೈಸೆ ಮತ್ತು ಡೀಸೆಲ್ ದರ 54 ಪೈಸೆಗಳಷ್ಟು ಕಮ್ಮಿಯಾಗಿದೆ
