ಟೆಹ್ರಾನ್: ಕಳೆದ ನಾಲ್ಕು ದಿನಗಳಿಂದ ಇಸ್ರೇಲ್ ಮತ್ತು ಅಮೆರಿಕ ಪಡೆಗಳು ಇರಾನ್ ಮೇಲೆ ನರಕವನ್ನೇ ಸೃಷ್ಟಿಸಿವೆ. ಇರಾನ್ನ ಅತ್ಯುನ್ನತ ನಾಯಕ ಅಯತೊಲ್ಲ ಖಮೇನಿ ಮತ್ತು ಸೇನಾ ಮುಖ್ಯಸ್ಥರ ಹತ್ಯೆಯ ಬೆನ್ನಲ್ಲೇ, ದೇಶದ ರಕ್ಷಣಾ ವ್ಯವಸ್ಥೆ ಸಂಪೂರ್ಣ ಕುಸಿದುಬಿದ್ದಿದೆ. ಈ ಸಂಘರ್ಷದ ಅತ್ಯಂತ ಆಘಾತಕಾರಿ ಬೆಳವಣಿಗೆಯೆಂದರೆ, ಇರಾನ್ ನೇಮಕ ಮಾಡಿದ್ದ ನೂತನ ರಕ್ಷಣಾ ಸಚಿವ ಸಯ್ಯದ್ ಮಜೀದ್ ಎಬಾ ಅಲ್ ರೆಜಾ ಅವರು ಅಧಿಕಾರ ವಹಿಸಿಕೊಂಡ 24 ಗಂಟೆಗಳಲ್ಲೇ ಜಂಟಿ ವಾಯುದಾಳಿಗೆ ಬಲಿಯಾಗಿದ್ದಾರೆ.
ಸಚಿವರ ಸರಣಿ ಬೇಟೆ
ಎರಡು ದಿನಗಳ ಹಿಂದಷ್ಟೇ ನಡೆದ ಭೀಕರ ದಾಳಿಯಲ್ಲಿ ಇರಾನ್ ರಕ್ಷಣಾ ಸಚಿವ ಅಮಿರ್ ನಾಸಿರ್ಜದೇಹ್ ಹತರಾಗಿದ್ದರು. ಅವರ ನಿಧನದಿಂದ ತೆರವಾಗಿದ್ದ ಸ್ಥಾನಕ್ಕೆ ಹಂಗಾಮಿ ನಾಯಕತ್ವವು ಸಯ್ಯದ್ ಮಜೀದ್ ಎಬಾ ಅಲ್ ರೆಜಾ ಅವರನ್ನು ತುರ್ತಾಗಿ ನೇಮಕ ಮಾಡಿತ್ತು. ಆದರೆ, ಇಸ್ರೇಲ್ ಮತ್ತು ಅಮೆರಿಕದ ಗುಪ್ತಚರ ದಳವು ಅವರ ಚಲನವಲನದ ಮೇಲೆ ನಿಖರ ಕಣ್ಣಿಟ್ಟಿತ್ತು. ಸಚಿವರಾಗಿ ಆಯ್ಕೆಯಾದ ಕೇವಲ ಒಂದು ದಿನದಲ್ಲಿ ನಡೆಸಿದ ಟಾರ್ಗೆಟ್ ದಾಳಿಯಲ್ಲಿ ಅಲ್ ರೆಜಾ ಅವರ ಅಂತ್ಯವಾಗಿದೆ ಎಂದು ‘ಸ್ಪೆಕ್ಟೇಟರ್ ಇಂಡೆಕ್ಸ್’ ವರದಿ ಮಾಡಿದೆ.
ಡೊನಾಲ್ಡ್ ಟ್ರಂಪ್ ಎಚ್ಚರಿಕೆ: “ಸಮಯ ಮೀರಿ ಹೋಗಿದೆ”
ಈ ಮಹಾ ಯುದ್ಧದ ಕುರಿತು ಪ್ರತಿಕ್ರಿಯಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಕಳೆದ 96 ಗಂಟೆಗಳಲ್ಲಿ ಇರಾನ್ ಮೇಲೆ ಬರೋಬ್ಬರಿ 1,700 ಬಾರಿ ವಾಯುದಾಳಿ (Air Strikes) ನಡೆಸಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. “ಇರಾನ್ ಬಳಿ ಈಗ ಪ್ರತಿರೋಧ ತೋರಲು ಶಸ್ತ್ರಾಸ್ತ್ರಗಳೇ ಬಾಕಿ ಉಳಿದಿಲ್ಲ. ಶಕ್ತಿಗುಂದಿರುವ ಅವರು ಈಗ ಮಾತುಕತೆಗೆ ಬರಲು ಹವಣಿಸುತ್ತಿದ್ದಾರೆ. ಆದರೆ ಸಂಧಾನದ ಸಮಯ ಈಗ ಮುಗಿದು ಹೋಗಿದೆ, ದಾಳಿಗಳು ನಿರಂತರವಾಗಿ ಮುಂದುವರಿಯಲಿವೆ” ಎಂದು ಟ್ರಂಪ್ ಗುಡುಗಿದ್ದಾರೆ.
ಇರಾನ್ನ ಪ್ರತಿದಾಳಿ ಮತ್ತು ಆತಂಕ
ತನ್ನ ಪ್ರಮುಖ ನಾಯಕರನ್ನು ಕಳೆದುಕೊಂಡು ಕಂಗಾಲಾಗಿರುವ ಇರಾನ್, ಅಂತಿಮ ಪ್ರಯತ್ನವಾಗಿ ಅಮೆರಿಕದ ಸೇನಾ ನೆಲೆಗಳು ಮತ್ತು ರಾಯಭಾರ ಕಚೇರಿಗಳ ಮೇಲೆ ಮಿಸೈಲ್ ದಾಳಿ ನಡೆಸುತ್ತಿದೆ. ಇಸ್ರೇಲ್ನ ಟೆಲ್ ಅವೀವ್ ಸೇರಿದಂತೆ ಪ್ರಮುಖ ನಗರಗಳ ಮೇಲೆ ಕ್ಷಿಪಣಿಗಳನ್ನು ಉಡಾಯಿಸಲಾಗಿದೆ. ಇದೇ ವೇಳೆ, ಇರಾನ್ ನೇರವಾಗಿ ಅಮೆರಿಕದ ಮೇಲೆಯೇ ದಾಳಿ ನಡೆಸಲು ಸಂಚು ರೂಪಿಸುತ್ತಿದೆ ಎಂಬ ಗಂಭೀರ ಮಾಹಿತಿಯನ್ನು ಅಮೆರಿಕದ ಗುಪ್ತಚರ ಇಲಾಖೆ ಹೊರಹಾಕಿದೆ.
ಸದ್ಯ ಇರಾನ್ನಲ್ಲಿ ಅರಾಜಕತೆ ಸೃಷ್ಟಿಯಾಗಿದ್ದು, ಮುಂದಿನ ದಿನಗಳಲ್ಲಿ ಈ ಯುದ್ಧದ ತೀವ್ರತೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.
