ಬೆಂಗಳೂರು: ರಿಷಬ್ ಶೆಟ್ಟಿ ನಟನೆ ಮತ್ತು ನಿರ್ದೇಶನದ ಬಹುನಿರೀಕ್ಷಿತ ಚಿತ್ರ ‘ಕಾಂತಾರ-ಅಧ್ಯಾಯ 1’ ಮುಂಗಡ ಟಿಕೆಟ್ ಬುಕ್ಕಿಂಗ್ನಲ್ಲಿ ಭರ್ಜರಿ ಆರಂಭ ಪಡೆದಿದೆ. ಬುಕ್ಕಿಂಗ್ ಆರಂಭವಾದ ಕೆಲವೇ ಕ್ಷಣಗಳಲ್ಲಿ ಮಲ್ಟಿಪ್ಲೆಕ್ಸ್ಗಳ ಹೆಚ್ಚಿನ ಶೋಗಳ ಟಿಕೆಟ್ಗಳು ಸೋಲ್ಡ್ ಔಟ್ ಆಗಿವೆ.
ಪ್ರೇಕ್ಷಕರ ‘ಕಾಂತಾರ’ ಕ್ರೇಜ್ ತಣಿಸಲು ಕೆಲವು ಮಲ್ಟಿಪ್ಲೆಕ್ಸ್ಗಳು 20ಕ್ಕೂ ಹೆಚ್ಚು ಪ್ರದರ್ಶನಗಳನ್ನು ನಿಗದಿಪಡಿಸಿದ್ದು, ಮೊದಲ ದಿನ ಬೆಳಗ್ಗೆ 6 ಗಂಟೆಯಿಂದಲೇ ಚಿತ್ರ ಪ್ರದರ್ಶನ ಆರಂಭವಾಗಲಿದೆ. ಸಿಂಗಲ್ ಸ್ಕ್ರೀನ್ಗಳೂ ಸಹ ಮೊದಲ ದಿನ 6 ಶೋಗಳನ್ನು ಪ್ರದರ್ಶಿಸಲು ಮುಂದಾಗಿವೆ.
ಮಲ್ಟಿಪ್ಲೆಕ್ಸ್ಗಳಲ್ಲಿ ದುಬಾರಿ ಟಿಕೆಟ್ ದರ
ಚಿತ್ರದ ಭಾರಿ ನಿರೀಕ್ಷೆಯ ಲಾಭ ಪಡೆಯಲು ಮಲ್ಟಿಪ್ಲೆಕ್ಸ್ಗಳು ಟಿಕೆಟ್ ದರವನ್ನು ಗಗನಕ್ಕೇರಿಸಿವೆ. ಪ್ರಸ್ತುತ ಟಿಕೆಟ್ ದರವನ್ನು ₹330 ರಿಂದ ₹400 ವರೆಗೆ ಹೆಚ್ಚಿಸಲಾಗಿದೆ. ಪ್ರೈಮ್ ಮತ್ತು ಕ್ಲಾಸಿಕ್ ಸೀಟುಗಳ ದರಗಳಲ್ಲಿ ವ್ಯತ್ಯಾಸವಿದ್ದು, ನಿರೀಕ್ಷಿತ ಚಿತ್ರದ ಟಿಕೆಟ್ ಭಾರ ಪ್ರೇಕ್ಷಕರ ಜೇಬಿಗೆ ಬಿದ್ದಿದೆ.
ಏಕರೂಪ ಟಿಕೆಟ್ ದರದ ಕುರಿತಾದ ಸರ್ಕಾರದ ಆದೇಶವಿದ್ದರೂ, ನ್ಯಾಯಾಲಯದ ಮಧ್ಯಂತರ ಆದೇಶದ ಹಿನ್ನೆಲೆಯಲ್ಲಿ ಮಲ್ಟಿಪ್ಲೆಕ್ಸ್ಗಳು ಮತ್ತೆ ದುಬಾರಿ ಟಿಕೆಟ್ ದರ ನಿಗದಿ ಮಾಡಿವೆ. ಇದರಿಂದ ₹236ಕ್ಕೆ ಟಿಕೆಟ್ ಪಡೆಯುವ ಖುಷಿಯಲ್ಲಿದ್ದ ಕುಟುಂಬ ಪ್ರೇಕ್ಷಕರಿಗೆ ನಿರಾಸೆಯಾಗಿದೆ.
ಬುಕ್ಕಿಂಗ್ ಆರಂಭವಾಗುತ್ತಿದ್ದಂತೆ ಸಿನಿಮಾ ಪ್ರೇಮಿಗಳು ಮುಗಿಬಿದ್ದ ಕಾರಣ ‘ಕಾಂತಾರ’ ಬುಕ್ಕಿಂಗ್ ಟ್ರೆಂಡಿಂಗ್ಗೆ ಬಂದಿದ್ದು, ಈ ಅಡ್ವಾನ್ಸ್ ಬುಕ್ಕಿಂಗ್ನಿಂದಲೇ ನಿರ್ಮಾಪಕರಿಗೆ ಕೋಟ್ಯಾಂತರ ರೂಪಾಯಿ ಹರಿದು ಬಂದಿದೆ.
