ಕೋಟ : ತಂತ್ರಜ್ಞಾನದ ಮೇಲಿನ ಅತಿಯಾದ ಅವಲಂಬನೆ ಕೆಲವೊಮ್ಮೆ ಪ್ರಾಣಕ್ಕೆ ಕುತ್ತು ತರಬಹುದು ಎಂಬುದಕ್ಕೆ ಉಡುಪಿ ಜಿಲ್ಲೆಯ ಕೋಟದಲ್ಲಿ ನಡೆದ ಘಟನೆಯೇ ಸಾಕ್ಷಿ. ಗೂಗಲ್ ಮ್ಯಾಪ್ (Google Map) ತೋರಿಸಿದ ತಪ್ಪು ಹಾದಿಯನ್ನು ನಂಬಿದ ಕೇರಳ ಮೂಲದ ಪ್ರವಾಸಿಗರ ಕಾರೊಂದು ನಿಯಂತ್ರಣ ತಪ್ಪಿ ಹೊಳೆಗೆ ಬೀಳುವ ಹಂತಕ್ಕೆ ತಲುಪಿ, ಅದೃಷ್ಟವಶಾತ್ ಭೀಕರ ದುರಂತದಿಂದ ಪಾರಾಗಿದೆ.
ಶುಕ್ರವಾರ ರಾತ್ರಿ ಕೇರಳದ ಕುಟುಂಬವೊಂದು ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಿಯ ದರ್ಶನಕ್ಕಾಗಿ ರಾಷ್ಟ್ರೀಯ ಹೆದ್ದಾರಿ 66 ರ ಮೂಲಕ ಸಾಗುತ್ತಿತ್ತು. ಈ ವೇಳೆ ಗೂಗಲ್ ಮ್ಯಾಪ್ ಸೂಚಿಸಿದ ಶಾರ್ಟ್ಕಟ್ ರಸ್ತೆಯನ್ನು ಅನುಸರಿಸಿದ ಚಾಲಕ, ಬ್ರಹ್ಮಾವರ ಬಳಿ ಬಾರ್ಕೂರು ಮಾರ್ಗವಾಗಿ ಸೈಬ್ರಕಟ್ಟೆ ಮೂಲಕ ಕೋಟದತ್ತ ಪ್ರಯಾಣ ಬೆಳೆಸಿದ್ದ. ರಾತ್ರಿಯ ಕತ್ತಲಿನಲ್ಲಿ ಮ್ಯಾಪ್ ಸೂಚನೆಯನ್ನೇ ಕಣ್ಣುಮುಚ್ಚಿ ನಂಬಿದ ಪರಿಣಾಮ, ಉಪ್ಲಾಡಿ ಹೊಳೆಯ ಸಮೀಪದ ಅಪಾಯಕಾರಿ ತಿರುವಿನಲ್ಲಿ ಚಾಲಕನ ನಿಯಂತ್ರಣ ತಪ್ಪಿದೆ.
ಕಾರು ಮೊದಲು ರಸ್ತೆ ಬದಿಯ ವಿದ್ಯುತ್ ಕಂಬಕ್ಕೆ ಜೋರಾಗಿ ಡಿಕ್ಕಿ ಹೊಡೆದು, ನಂತರ ಹೊಳೆ ಬದಿಯಲ್ಲಿ ಅಳವಡಿಸಲಾಗಿದ್ದ ಸಿಮೆಂಟ್ ಪಿಲ್ಲರ್ ಮೇಲೆ ಏರಿ ನಿಂತಿದೆ. ಕಾರು ಹೊಳೆಗೆ ಬೀಳಲು ಕೇವಲ ಒಂದು ಅಡಿ ಅಂತರವಿದ್ದಾಗ ನಿಂತಿದ್ದರಿಂದ, ಒಳಗಿದ್ದ ಮಹಿಳೆಯರು ಮತ್ತು ಮಕ್ಕಳು ಸೇರಿದಂತೆ ಒಟ್ಟು 6 ಮಂದಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಘಟನೆಯ ಸದ್ದು ಕೇಳಿ ಸ್ಥಳಕ್ಕೆ ಧಾವಿಸಿದ ಕೋಟ ಪೊಲೀಸ್ ಸಿಬ್ಬಂದಿ ರಾಘವೇಂದ್ರ, ಆಂಬುಲೆನ್ಸ್ ಚಾಲಕ ಕಿಶೋರ್ ಶೆಟ್ಟಿ ಮತ್ತು ಸ್ಥಳೀಯರು ಕೂಡಲೇ ಕಾರಿನಲ್ಲಿದ್ದವರನ್ನು ರಕ್ಷಿಸಿದ್ದಾರೆ. ಈ ಸಂಬಂಧ ಕೋಟ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.
