ವಾಷಿಂಗ್ಟನ್: ಕೆರಿಬಿಯನ್ ಸಾಗರ ಪ್ರದೇಶದಲ್ಲಿ ಅಮೆರಿಕದ ಗಡಿಗಳತ್ತ ಮುನ್ನುಗ್ಗುತ್ತಿದ್ದ ಭಾರೀ ಪ್ರಮಾಣದ ಮಾದಕವಸ್ತುಗಳನ್ನು ಸಾಗಿಸುತ್ತಿದ್ದ ಶಂಕಿತ ಜಲಾಂತರ್ಗಾಮಿ ನೌಕೆಯೊಂದನ್ನು ಅಮೆರಿಕದ ಸಶಸ್ತ್ರ ಪಡೆಗಳು ನಾಶಪಡಿಸಿವೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ. ಈ ಕಾರ್ಯಾಚರಣೆಯ ಮೂಲಕ 2 ಭಯೋತ್ಪಾದಕರು ಹತರಾಗಿದ್ದು, ಉಳಿದ 2 ಮಂದಿಯನ್ನು ಬಂಧಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಶನಿವಾರದಂದು (ಅ. 18) ತಮ್ಮ ‘ಟ್ರುತ್ ಸೋಶಿಯಲ್’ ವೇದಿಕೆಯಲ್ಲಿ ಈ ವಿಷಯವನ್ನು ಹಂಚಿಕೊಂಡಿರುವ ಟ್ರಂಪ್, “ಪ್ರಸಿದ್ಧ ಮಾದಕವಸ್ತು ಸಾಗಣೆ ಮಾರ್ಗದ ಮೂಲಕ ಅಮೆರಿಕವನ್ನು ತಲುಪಲು ಹೊರಟಿದ್ದ ಬೃಹತ್ ಡ್ರಗ್ಸ್ ಸಾಗಣೆ ಜಲಾಂತರ್ಗಾಮಿಯನ್ನು ನಾಶಪಡಿಸಿದ ಈ ಕಾರ್ಯವು ನನಗೆ ಅತ್ಯಂತ ಹೆಮ್ಮೆಯ ವಿಷಯವಾಗಿದೆ” ಎಂದಿದ್ದಾರೆ.
ಅಮೆರಿಕದ ಗುಪ್ತಚರ ಇಲಾಖೆ ನೀಡಿರುವ ಮಾಹಿತಿ ಪ್ರಕಾರ, ಈ ಜಲಾಂತರ್ಗಾಮಿ ನೌಕೆಯು ಪ್ರಮುಖವಾಗಿ ಫೆಂಟನಿಲ್ ಸೇರಿದಂತೆ ಅನೇಕ ಅಕ್ರಮ ಮಾದಕ ದ್ರವ್ಯಗಳಿಂದ ತುಂಬಿತ್ತು ಎಂದು ತಿಳಿದುಬಂದಿದೆ.
ಜಲಾಂತರ್ಗಾಮಿಯಿಂದ ಅಮೆರಿಕದ ಮೇಲೆ ಎದುರಾಗಬಹುದಾಗಿದ್ದ ಮಾರಕ ಅಪಾಯದ ಬಗ್ಗೆ ಎಚ್ಚರಿಕೆ ನೀಡಿದ ಟ್ರಂಪ್, “ಆ ಹಡಗಿನಲ್ಲಿದ್ದ ನಾಲ್ವರ ಪೈಕಿ 2 ಭಯೋತ್ಪಾದಕರು ಸಾವನ್ನಪ್ಪಿದ್ದಾರೆ. ಈ ಜಲಾಂತರ್ಗಾಮಿಯು ದಡವನ್ನು ತಲುಪಲು ನಾನು ಅನುಮತಿಸಿದ್ದರೆ, ಕನಿಷ್ಠ 25,000 ಅಮೆರಿಕನ್ನರು ಸಾಯುತ್ತಿದ್ದರು. ಬದುಕುಳಿದ 2 ಭಯೋತ್ಪಾದಕರನ್ನು ಬಂಧಿಸಿ ವಿಚಾರಣೆ ನಡೆಸಲು ಅವರ ಮೂಲ ದೇಶಗಳಾದ ಈಕ್ವೆಡಾರ್ ಮತ್ತು ಕೊಲಂಬಿಯಾಕ್ಕೆ ವಾಪಸ್ ಕಳುಹಿಸಲಾಗುತ್ತಿದೆ” ಎಂದು ವಿವರಿಸಿದರು.
ಈ ದಾಳಿಯಲ್ಲಿ ಯಾವುದೇ ಅಮೆರಿಕನ್ ಸೈನಿಕರಿಗೆ ಹಾನಿಯಾಗಿಲ್ಲ ಎಂದು ಸ್ಪಷ್ಟಪಡಿಸಿದ ಅಧ್ಯಕ್ಷರು, “ನನ್ನ ಆಡಳಿತದ ಅವಧಿಯಲ್ಲಿ, ಅಮೆರಿಕದೊಳಗೆ ಭೂ ಮಾರ್ಗ ಅಥವಾ ಸಮುದ್ರ ಮಾರ್ಗದ ಮೂಲಕ ಅಕ್ರಮ ಮಾದಕವಸ್ತುಗಳನ್ನು ಕಳ್ಳಸಾಗಣೆ ಮಾಡುವುದನ್ನು ಸಹಿಸಲು ಸಾಧ್ಯವಿಲ್ಲ” ಎಂದು ಖಡಾಖಂಡಿತವಾಗಿ ಹೇಳಿದ್ದಾರೆ. ಈ ರೀತಿಯ ಜಲಾಂತರ್ಗಾಮಿ ನೌಕೆಗಳನ್ನು ಡ್ರಗ್ಸ್ ಸಾಗಣೆಗಾಗಿಯೇ ವಿಶೇಷವಾಗಿ ನಿರ್ಮಿಸಲಾಗುತ್ತದೆ ಎಂದು ಅವರು ಹೇಳಿದರು.
