ವರದಕ್ಷಿಣೆಗಾಗಿ ಕಿರುಕುಳ: ಸೊಸೆಯನ್ನು ಕೋಣೆಗೆ ಕೂಡಿ ಹಾಕಿ ಹಾವು ಬಿಟ್ಟ ಅತ್ತೆ-ಮಾವ

ಕಾನ್ಪುರ: ವರದಕ್ಷಿಣೆ ನೀಡಲಿಲ್ಲ ಎಂಬ ಕಾರಣಕ್ಕೆ ನವವಿವಾಹಿತ ಮಹಿಳೆಯೊಬ್ಬಳನ್ನು ಆಕೆಯ ಅತ್ತೆ-ಮಾವ ಕೋಣೆಯೊಳಗೆ ಕೂಡಿಹಾಕಿ, ಹಾವು ಬಿಟ್ಟಿರುವ ಅಮಾನವೀಯ ಘಟನೆ ಕಾನ್ಪುರದ ಕರ್ನಲ್‌ಗಂಜ್‌ನಲ್ಲಿ ನಡೆದಿದೆ. ಹಾವು ಕಚ್ಚಿ ಆಕೆಯ ಸ್ಥಿತಿ ಗಂಭೀರವಾದರೂ, ಕುಟುಂಬದವರು ಸಹಾಯ ಮಾಡದೆ ಹೊರಗೆ ನಿಂತು ನಕ್ಕಿದ್ದಾರೆ ಎಂದು ದೂರಲಾಗಿದೆ. ಸದ್ಯ ಮಹಿಳೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಸೆಪ್ಟೆಂಬರ್ 18ರಂದು ಈ ದಾರುಣ ಘಟನೆ ನಡೆದಿದೆ. ಮಹಿಳೆಯ ಸಹೋದರಿ ರಿಜ್ವಾನಾ ಅವರು ನೀಡಿದ ದೂರಿನ ಪ್ರಕಾರ, ರೇಷ್ಮಾಳನ್ನು ಕೋಣೆಯಲ್ಲಿ ಕೂಡಿ ಹಾಕಿದ ಕುಟುಂಬಸ್ಥರು ಅಲ್ಲಿಗೆ ಹಾವನ್ನು ಬಿಟ್ಟಿದ್ದಾರೆ. ತಡರಾತ್ರಿ ಹಾವು ರೇಷ್ಮಾಳ ಕಾಲಿಗೆ ಕಚ್ಚಿದಾಗ, ಆಕೆ ನೋವಿನಿಂದ ಕಿರುಚಿಕೊಂಡರೂ, ಅತ್ತೆ-ಮಾವಂದಿರು ಬಾಗಿಲು ತೆರೆಯದೆ ಹೊರಗೆ ನಿಂತು ನಗುತ್ತಿದ್ದರು.

ಯಾವುದೇ ರೀತಿಯಲ್ಲಿ, ರೇಷ್ಮಾ ತನ್ನ ಸಹೋದರಿ ರಿಜ್ವಾನಾಳನ್ನು ಫೋನ್ ಮೂಲಕ ಸಂಪರ್ಕಿಸುವಲ್ಲಿ ಯಶಸ್ವಿಯಾಗಿದ್ದಾಳೆ. ತಕ್ಷಣ ಸ್ಥಳಕ್ಕೆ ಬಂದ ರಿಜ್ವಾನಾ, ಗಂಭೀರ ಸ್ಥಿತಿಯಲ್ಲಿದ್ದ ರೇಷ್ಮಾಳನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಅಲ್ಲಿ ಆಕೆಗೆ ತುರ್ತು ಚಿಕಿತ್ಸೆ ನೀಡಲಾಗಿದೆ.

ಮಾರ್ಚ್ 19, 2021ರಂದು ರೇಷ್ಮಾಳ ಮದುವೆ ಶಹನವಾಜ್ ಜೊತೆ ನಡೆದಿತ್ತು. ಮದುವೆಯಾದಾಗಿನಿಂದ, ಗಂಡನ ಮನೆಯವರು ವರದಕ್ಷಿಣೆಗಾಗಿ ಕಿರುಕುಳ ನೀಡುತ್ತಿದ್ದರು. ಇತ್ತೀಚೆಗೆ ₹1.5 ಲಕ್ಷ ನೀಡಿದ್ದರೂ, ಹೆಚ್ಚುವರಿಯಾಗಿ ₹5 ಲಕ್ಷಕ್ಕೆ ಬೇಡಿಕೆ ಇಟ್ಟಿದ್ದರು. ಅದನ್ನು ನೀಡದ ಕಾರಣ ಕೊಲೆ ಮಾಡಲು ಯತ್ನಿಸಿದ್ದಾರೆ ಎಂದು ರಿಜ್ವಾನಾ ಆರೋಪಿಸಿದ್ದಾರೆ.

ರಿಜ್ವಾನಾ ಅವರ ದೂರಿನ ಆಧಾರದ ಮೇಲೆ ಪೊಲೀಸರು ಶಹನವಾಜ್, ಅವರ ಪೋಷಕರು, ಅಣ್ಣ, ತಂಗಿ ಮತ್ತು ಇತರ ಮೂವರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.