ಬೆಂಗಳೂರು: ಮಟನ್ ಹೆಸರಲ್ಲಿ ದನದ ಮಾಂಸ ನೀಡುತ್ತಿದ್ದ ಇಬ್ಬರ ಬಂಧನ

ಬೆಂಗಳೂರು: ರಾಜಧಾನಿಯ ಗ್ರಾಹಕರಲ್ಲಿ ತೀವ್ರ ಆತಂಕ ಮೂಡಿಸುವಂತಹ ಘಟನೆಯೊಂದು ಬೆಳಕಿಗೆ ಬಂದಿದ್ದು, ಕುರಿ ಮಾಂಸದ (ಮಟನ್) ಊಟ ಎಂದು ಆರ್ಡರ್ ಮಾಡಿದ ಗ್ರಾಹಕರಿಗೆ ದನದ ಮಾಂಸವನ್ನು ಬಡಿಸುತ್ತಿದ್ದ ರೆಸ್ಟೋರೆಂಟ್ ಒಂದರ ಇಬ್ಬರು ಮಾಲೀಕರನ್ನು ಆವಲಹಳ್ಳಿ ಠಾಣೆಯ ಪೊಲೀಸರು ಶನಿವಾರ ತಡರಾತ್ರಿ ಬಂಧಿಸಿದ್ದಾರೆ. ಬೂದಿಗೆರೆ ಕ್ರಾಸ್ ಬಳಿಯ ಬೊಮ್ಮೇನಹಳ್ಳಿಯಲ್ಲಿರುವ ‘ಕಾಯಲೋರಂ ರೆಸ್ಟೋರೆಂಟ್’ನಲ್ಲಿ ಈ ವಂಚನೆ ನೆಡೆದಿದ್ದು, ಸದ್ಯ ಹೋಟೆಲ್ ಅನ್ನು ಸಂಪೂರ್ಣವಾಗಿ ಮುಚ್ಚಿಸಲಾಗಿದೆ.

ಕೆಲ ದಿನಗಳ ಹಿಂದೆ ಈ ಹೋಟೆಲ್‌ಗೆ ಊಟಕ್ಕಾಗಿ ತೆರಳಿದ್ದ ಯುವಕರ ತಂಡವೊಂದು ಮಟನ್ ಖಾದ್ಯಗಳನ್ನು ಆರ್ಡರ್ ಮಾಡಿತ್ತು. ಆದರೆ ಆಹಾರ ಸೇವಿಸುವಾಗ ಅದರ ರುಚಿ ಮತ್ತು ವಿನ್ಯಾಸದಲ್ಲಿ ವ್ಯತ್ಯಾಸ ಕಂಡುಬಂದಿದ್ದರಿಂದ ಗ್ರಾಹಕರಿಗೆ ತೀವ್ರ ಅನುಮಾನ ಮೂಡಿದೆ. ತಕ್ಷಣವೇ ಎಚ್ಚೆತ್ತ ಯುವಕರು ಈ ಕುರಿತು ಅಲ್ಲಿನ ಸಿಬ್ಬಂದಿಯನ್ನು ತರಾಟೆಗೆ ತಗೆದುಕೊಂಡು, ಬಳಿಕ ಆವಲಹಳ್ಳಿ ಪೊಲೀಸ್ ಠಾಣೆಗೆ ಅಧಿಕೃತ ದೂರು ನೀಡಿದ್ದಾರೆ.

ದೂರು ದಾಖಲಾಗುತ್ತಿದ್ದಂತೆ ಕಾರ್ಯಪ್ರವೃತ್ತರಾದ ಪೊಲೀಸರು ಆಹಾರ ಸುರಕ್ಷತಾ ಅಧಿಕಾರಿಗಳೊಂದಿಗೆ ರೆಸ್ಟೋರೆಂಟ್‌ಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ವೇಳೆ ಅಲ್ಲಿ ಗ್ರಾಹಕರಿಗೆ ಸರಬರಾಜು ಮಾಡುತ್ತಿದ್ದುದು ಮಟನ್ ಅಲ್ಲ, ಬದಲಿಗೆ ದನದ ಮಾಂಸ ಎನ್ನುವುದು ಖಚಿತಪಟ್ಟಿದೆ. ಕಳೆದ 1.5 ವರ್ಷಗಳಿಂದ ಈ ಹೋಟೆಲ್ ಕಾರ್ಯಾಚರಣೆ ನಡೆಸುತ್ತಿದ್ದು, ನೂರಾರು ಗ್ರಾಹಕರಿಗೆ ಇದೇ ರೀತಿ ವಂಚಿಸಿರುವ ಆತಂಕ ಎದುರಾಗಿದೆ.

ಪ್ರಕರಣದ ಪ್ರಮುಖ ಮುಖ್ಯಾಂಶಗಳು

ಸ್ಥಳ: ಬೆಂಗಳೂರಿನ ಬೂದಿಗೆರೆ ಕ್ರಾಸ್, ಬೊಮ್ಮೇನಹಳ್ಳಿಯ ಐಸಿರಿ ಹಬ್‌ನಲ್ಲಿರುವ ಕಾಯಲೋರಂ ರೆಸ್ಟೋರೆಂಟ್.
ಬಂಧಿತರು: ಹೋಟೆಲ್ ಮಾಲೀಕರಾದ ಜೀಜು ಮತ್ತು ಶಿಬು ಎಂಬುವವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ವಂಚನೆಯ ಜಾಲ: ಮಟನ್ ಹೆಸರಿನಲ್ಲಿ ಗ್ರಾಹಕರಿಗೆ ದನದ ಮಾಂಸವನ್ನು ನೀಡಿ ವಂಚಿಸುತ್ತಿದ್ದ ಆರೋಪ.
ಪೊಲೀಸ್ ಕ್ರಮ: ಸ್ಥಳಕ್ಕೆ ಭೇಟಿ ನೀಡಿ ಮಾಂಸವನ್ನು ದೃಢಪಡಿಸಿಕೊಂಡ ಆವಲಹಳ್ಳಿ ಪೊಲೀಸರಿಂದ ಹೋಟೆಲ್‌ಗೆ ಬೀಗ ಮುದ್ರೆ.
ಗ್ರಾಹಕರ ಆಕ್ರೋಶ: ಕಳೆದ 18 ತಿಂಗಳುಗಳಿಂದ ಇಲ್ಲಿ ಊಟ ಮಾಡಿದ್ದ ಸಾರ್ವಜನಿಕರಲ್ಲಿ ತೀವ್ರ ಆತಂಕ ಮತ್ತು ಆಕ್ರೋಶ ಸೃಷ್ಟಿಯಾಗಿದೆ.

ಆರೋಪಿಗಳಿಂದ ತಪ್ಪೊಪ್ಪಿಗೆ, ಮುಂದುವರಿದ ತನಿಖೆ

ಪೊಲೀಸ್ ಕಸ್ಟಡಿಯಲ್ಲಿರುವ ಇಬ್ಬರು ಆರೋಪಿಗಳನ್ನು ಸುದೀರ್ಘ ವಿಚಾರಣೆಗೆ ಒಳಪಡಿಸಿದಾಗ, ಅವರು ತಮ್ಮ ಲಾಭಕ್ಕಾಗಿ ಗ್ರಾಹಕರಿಗೆ ಮಟನ್ ಬದಲಿಗೆ ಬೇರೆ ಮಾಂಸವನ್ನು ನೀಡುತ್ತಿದ್ದಾಗಿ ಒಪ್ಪಿಕೊಂಡಿದ್ದಾರೆ ಎನ್ನಲಾಗಿದೆ. ಈ ಹೋಟೆಲ್ ಕಳೆದ 1.5 ವರ್ಷಗಳಿಂದ ಸದ್ದಿಲ್ಲದೆ ಈ ಕೃತ್ಯವನ್ನು ಎಸಗುತ್ತಿರುವುದು ಬಯಲಾಗುತ್ತಿದ್ದಂತೆ, ಈ ಭಾಗದ ಮಾಂಸಾಹಾರಿ ಪ್ರಿಯರು ಆಘಾತ ವ್ಯಕ್ತಪಡಿಸುತ್ತಿದ್ದಾರೆ.

ಗ್ರಾಹಕರಲ್ಲಿ ಹೆಚ್ಚಿದ ಆತಂಕ

ಸಾಮಾನ್ಯವಾಗಿ ವೀಕೆಂಡ್ ಹಾಗೂ ರಜಾದಿನಗಳಲ್ಲಿ ಈ ಐಸಿರಿ ಹಬ್‌ನ ರೆಸ್ಟೋರೆಂಟ್‌ಗೆ ನೂರಾರು ಕುಟುಂಬಗಳು ಭೇಟಿ ನೀಡುತ್ತಿದ್ದವು. ಇದೀಗ ವಂಚನೆಯ ಜಾಲ ಬಯಲಿಗೆ ಬಂದಿರುವುದರಿಂದ ಆಹಾರ ಸುರಕ್ಷತೆಯ ಬಗ್ಗೆ ತೀವ್ರ ಪ್ರಶ್ನೆಗಳು ಎದ್ದಿವೆ. ಆವಲಹಳ್ಳಿ ಠಾಣೆ ಪೊಲೀಸರು ಪ್ರಕರಣದ ಹಿನ್ನೆಲೆಯನ್ನು ಮತ್ತಷ್ಟು ಆಳವಾಗಿ ತನಿಖೆ ನಡೆಸುತ್ತಿದ್ದು, ಮಾಂಸದ ಮೂಲ ಎಲ್ಲಿಂದ ಸರಬರಾಜಾಗುತ್ತಿತ್ತು ಎಂಬ ಬಗ್ಗೆ ಪತ್ತೆ ಹಚ್ಚುತ್ತಿದ್ದಾರೆ.