ಭಾರತೀಯ ಸನಾತನ ಧರ್ಮದ ಪಂಚಾಂಗದಲ್ಲಿ 2026ನೇ ವರ್ಷದ ಮಕರ ಸಂಕ್ರಾಂತಿಯು ಇತಿಹಾಸ ಪುಟಗಳಲ್ಲಿ ದಾಖಲಾಗುವಂತಹ ಅಪರೂಪದ ವಿದ್ಯಮಾನಕ್ಕೆ ಸಾಕ್ಷಿಯಾಗುತ್ತಿದೆ. ಸೂರ್ಯನು ಮಕರ ರಾಶಿಯನ್ನು ಪ್ರವೇಶಿಸುವ ಶುಭ ಘಳಿಗೆ ಮತ್ತು ಶ್ರೀಮನ್ನಾರಾಯಣನ ಪ್ರೀತ್ಯರ್ಥವಾದ ‘ಷಟ್ತಿಲಾ ಏಕಾದಶಿ’ ಒಂದೇ ದಿನ ಸಂಭವಿಸುತ್ತಿರುವುದು ಭಕ್ತರಲ್ಲಿ ವಿಶೇಷ ಕುತೂಹಲ ಮೂಡಿಸಿದೆ. ಬರೋಬ್ಬರಿ 23 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ ಇಂತಹದ್ದೊಂದು ಪುಣ್ಯದಾಯಕ ‘ಮಹಾಸಂಯೋಗ’ ಒದಗಿ ಬಂದಿದೆ.
ನಮ್ಮ ದೇಶದ ಕೃಷಿ ಸಂಸ್ಕೃತಿಯಲ್ಲಿ ಸಂಕ್ರಾಂತಿಗೆ ತನ್ನದೇ ಆದ ವಿಶಿಷ್ಟ ಸ್ಥಾನವಿದೆ. 2,000 ವರ್ಷಗಳಿಗೂ ಹೆಚ್ಚು ಇತಿಹಾಸವಿರುವ ಈ ಸುಗ್ಗಿ ಹಬ್ಬವು ಕೇವಲ ಸಂಭ್ರಮಕ್ಕೆ ಸೀಮಿತವಾಗಿಲ್ಲ. ಋಗ್ವೇದದ ಕಾಲದಿಂದಲೂ ಸೂರ್ಯಾರಾಧನೆಯನ್ನು ಅತ್ಯಂತ ಶ್ರೇಷ್ಠವೆಂದು ಪರಿಗಣಿಸಲಾಗಿದೆ. ಈ ದಿನದಿಂದ ಸೂರ್ಯನು ದಕ್ಷಿಣ ದಿಕ್ಕಿನಿಂದ ಉತ್ತರಕ್ಕೆ ಮುಖ ಮಾಡಿ ಸಂಚರಿಸುವ ‘ಉತ್ತರಾಯಣ’ ಪುಣ್ಯಕಾಲ ಆರಂಭವಾಗುತ್ತದೆ. ಈ ಆರು ತಿಂಗಳ ಅವಧಿಯು ದೇವತೆಗಳ ಹಗಲು ಎಂದು ನಂಬಲಾಗಿದ್ದು, ಆಷಾಢ ಮಾಸದವರೆಗೆ ಮುಂದುವರಿಯುತ್ತದೆ.
ಈ ಬಾರಿ ಜನವರಿ 14ರಂದು ಮಕರ ಸಂಕ್ರಾಂತಿ ಆಚರಿಸಲಾಗುತ್ತಿದ್ದು, ಇದೇ ದಿನ ವಿಷ್ಣು ಭಕ್ತರಿಗೆ ಅತ್ಯಂತ ಪವಿತ್ರವಾದ ಷಟ್ತಿಲಾ ಏಕಾದಶಿಯೂ ಬಂದಿದೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಜನವರಿ 13ರಂದು ಮಧ್ಯಾಹ್ನ 3:18ಕ್ಕೆ ಏಕಾದಶಿ ತಿಥಿ ಆರಂಭವಾಗಿ, ಜನವರಿ 14ರ ಸಂಜೆ 5:53ಕ್ಕೆ ಕೊನೆಗೊಳ್ಳಲಿದೆ. ಸಂಕ್ರಾಂತಿಯ ಸಂಕ್ರಮಣ ಕಾಲವು ಜನವರಿ 14ರ ಮಧ್ಯಾಹ್ನ 2:50 ರಿಂದ 3:07 ರ ನಡುವೆ ಇರಲಿದೆ ಎಂದು ವಿದ್ವಾಂಸರು ತಿಳಿಸಿದ್ದಾರೆ.
ಈ ದಿನದಂದು ಎಳ್ಳಿಗೆ ವಿಶೇಷ ಮಹತ್ವವಿದೆ. ಷಟ್ತಿಲಾ ಎಂದರೆ ಆರು ವಿಧದಲ್ಲಿ ಎಳ್ಳನ್ನು ಬಳಸುವುದು ಎಂದರ್ಥ. ಭಕ್ತರು ಎಳ್ಳು ಮಿಶ್ರಿತ ನೀರಿನಿಂದ ಸ್ನಾನ ಮಾಡಿ, ಎಳ್ಳನ್ನು ದೇವರಿಗೆ ಅರ್ಪಿಸಿ, ಎಳ್ಳಿನಿಂದ ತಯಾರಿಸಿದ ಪದಾರ್ಥಗಳನ್ನು ಸೇವಿಸುವುದು ಮತ್ತು ದಾನ ಮಾಡುವುದು ಅತ್ಯಂತ ಫಲಪ್ರದ. ಬಡವರಿಗೆ ಗೋಧಿ, ಬೆಲ್ಲ, ಕಪ್ಪು ಎಳ್ಳು ಹಾಗೂ ಕಂಬಳಿಗಳನ್ನು ದಾನ ಮಾಡುವುದರಿಂದ ಪಿತೃ ದೋಷಗಳು ನಿವಾರಣೆಯಾಗಿ ಜೀವನದಲ್ಲಿ ನೆಮ್ಮದಿ ಲಭಿಸುತ್ತದೆ ಎಂಬುದು ಧಾರ್ಮಿಕ ನಂಬಿಕೆ. ಈ ವಿಶಿಷ್ಟ ದಿನದಂದು ಸೂರ್ಯ ಮತ್ತು ವಿಷ್ಣು ಇಬ್ಬರನ್ನೂ ಏಕಕಾಲದಲ್ಲಿ ಆರಾಧಿಸುವ ಸುವರ್ಣಾವಕಾಶ ಭಕ್ತರಿಗೆ ಸಿಕ್ಕಿದೆ.
