ಬೆಂಗಳೂರು: ರಾಜ್ಯದ ವೈದ್ಯಕೀಯ ಶಿಕ್ಷಣ ಕ್ಷೇತ್ರದಲ್ಲಿ ಹೊಸ ಕ್ರಾಂತಿಗೆ ಮುನ್ನುಡಿ ಬರೆಯಲಾಗಿದ್ದು, ವಿದ್ಯಾರ್ಥಿಗಳ ಶೈಕ್ಷಣಿಕ ಮತ್ತು ಮಾನಸಿಕ ಬೆಳವಣಿಗೆಯನ್ನು ಉತ್ತೇಜಿಸಲು ರಾಜೀವ್ ಗಾಂಧಿ ಆರೋಗ್ಯ ವಿಜ್ಞಾನಗಳ ವಿಶ್ವವಿದ್ಯಾಲಯ (ಆರ್ಜಿಯುಎಚ್ಎಸ್) ಹಾಗೂ ನಿಮ್ಹಾನ್ಸ್ ಸಂಸ್ಥೆಗಳು ಕೈಜೋಡಿಸಿವೆ. ತೀವ್ರ ಒತ್ತಡದ ನಡುವೆ ವ್ಯಾಸಂಗ ಮಾಡುವ ಮೆಡಿಕಲ್ ವಿದ್ಯಾರ್ಥಿಗಳಿಗೆ ಕೃತಕ ಬುದ್ಧಿಮತ್ತೆ (AI) ಆಧಾರಿತ ‘ಜೀವನ ಕೌಶಲ್ಯ’ ಮತ್ತು ‘ಶೈಕ್ಷಣಿಕ ಕೌಶಲ್ಯ’ ತರಬೇತಿ ನೀಡುವ ಯೋಜನೆಗೆ ಚಾಲನೆ ನೀಡಲಾಗುತ್ತಿದೆ. ದೇಶದಲ್ಲೇ ಮೊದಲ ಬಾರಿಗೆ ಅನುಷ್ಠಾನಗೊಳ್ಳುತ್ತಿರುವ ಈ ವಿನೂತನ ಯೋಜನೆಗೆ ಆಂತರಿಕ ನೈತಿಕ ಸಮಿತಿ ಈಗಾಗಲೇ ಅಂತಿಮ ಸಮ್ಮತಿ ನೀಡಿದೆ.
ಈ ಯೋಜನೆಯಡಿ ಪ್ರತಿ ವಿದ್ಯಾರ್ಥಿಯ ಗ್ರಹಿಕೆ ಮತ್ತು ಕಲಿಕಾ ಶೈಲಿಯನ್ನು ಎಐ ತಂತ್ರಜ್ಞಾನದ ಮೂಲಕ ವೈಜ್ಞಾನಿಕವಾಗಿ ವಿಶ್ಲೇಷಿಸಲಾಗುತ್ತದೆ. ಪ್ರತಿಯೊಬ್ಬರ ಅಗತ್ಯಕ್ಕೆ ತಕ್ಕಂತೆ ಪ್ರತ್ಯೇಕ ಶೈಕ್ಷಣಿಕ ಮಾರ್ಗಸೂಚಿಗಳನ್ನು ಸಿದ್ಧಪಡಿಸಲಾಗುತ್ತದೆ. ಜೊತೆಗೆ ವಿದ್ಯಾರ್ಥಿಗಳಲ್ಲಿ ಹೆಚ್ಚುತ್ತಿರುವ ಆತಂಕ, ಖಿನ್ನತೆ ಹಾಗೂ ಮಾನಸಿಕ ಒತ್ತಡವನ್ನು ನಿವಾರಿಸಲು ಎಲ್ಲಾ ಸಂಯೋಜಿತ ಕಾಲೇಜುಗಳಲ್ಲಿ ವಿಶೇಷ ವೆಲ್ನೆಸ್ ಕೇಂದ್ರಗಳನ್ನು ಸ್ಥಾಪಿಸಲು ನಿರ್ಧರಿಸಲಾಗಿದೆ.
ಯೋಜನೆಯ ಪ್ರಮುಖ ಮುಖ್ಯಾಂಶಗಳು:
- ವೈಯಕ್ತಿಕ ಕಲಿಕಾ ವಿಧಾನ: ಪ್ರತಿಯೊಬ್ಬ ವಿದ್ಯಾರ್ಥಿಯ ಕೌಶಲ್ಯ ಹಾಗೂ ಆಸಕ್ತಿಗೆ ಅನುಗುಣವಾಗಿ ಎಐ ಮೂಲಕ ಸೂಕ್ತ ಅಭ್ಯಾಸ ಶೈಲಿಯನ್ನು ಗುರುತಿಸಿ ತರಬೇತಿ ನೀಡುವುದು.
- ಕಡ್ಡಾಯ ಸಮಾಲೋಚನೆ: ಪ್ರತಿ ವೈದ್ಯಕೀಯ ವಿದ್ಯಾರ್ಥಿಯು ವರ್ಷದಲ್ಲಿ ಕನಿಷ್ಠ 2 ಬಾರಿ ಕಡ್ಡಾಯವಾಗಿ ಕೌನ್ಸೆಲಿಂಗ್ಗೆ ಹಾಜರಾಗಬೇಕು ಹಾಗೂ ಎಲ್ಲರಿಗೂ ‘ವೆಲ್ನೆಸ್ ಕಾರ್ಡ್’ ನೀಡಲಾಗುತ್ತದೆ.
- ವಿಶೇಷ ತಜ್ಞರ ತಂಡ: ಪ್ರತಿ ವೆಲ್ನೆಸ್ ಕ್ಲಿನಿಕ್ನಲ್ಲಿ ಮನೋವೈದ್ಯರು, ಮನಃಶಾಸ್ತ್ರಜ್ಞರು, ವಾರ್ಡನ್ಗಳು ಹಾಗೂ ವಿದ್ಯಾರ್ಥಿ ಸಂಯೋಜಕರು ಕಾರ್ಯನಿರ್ವಹಿಸಲಿದ್ದಾರೆ.
- 4 ಲಕ್ಷ ವಿದ್ಯಾರ್ಥಿಗಳಿಗೆ ತಲುಪುವ ಗುರಿ: ಆರಂಭದಲ್ಲಿ ಪ್ರಾಯೋಗಿಕವಾಗಿ ಜಾರಿಯಾಗುವ ಈ ಯೋಜನೆ, ಹಂತ-ಹಂತವಾಗಿ ರಾಜ್ಯದ ಎಲ್ಲಾ ಮೆಡಿಕಲ್, ಡೆಂಟಲ್, ನರ್ಸಿಂಗ್, ಆಯುಷ್ ಮತ್ತು ಫಾರ್ಮಸಿ ಕಾಲೇಜುಗಳಿಗೆ ವಿಸ್ತರಣೆಯಾಗಲಿದೆ.
- ಬೋಧಕರಿಗೂ ತರಬೇತಿ: ಕಾಲೇಜುಗಳ ಉಪನ್ಯಾಸಕರಿಗೂ ಜೀವನ ಕೌಶಲ್ಯ ಹಾಗೂ ಮೆಂಟರಿಂಗ್ ಕುರಿತು ವಿಶೇಷ ತರಬೇತಿ ನೀಡಿ, ವಿದ್ಯಾರ್ಥಿಗಳ ಸಮಸ್ಯೆಗಳನ್ನು ಆರಂಭದಲ್ಲೇ ಗುರುತಿಸಲು ಸಜ್ಜುಗೊಳಿಸಲಾಗುತ್ತದೆ.
ಎಐ ತಂತ್ರಜ್ಞಾನದ ಮೂಲಕ ಶೈಕ್ಷಣಿಕ ಮತ್ತು ಜೀವನ ಕೌಶಲ್ಯ ವೃದ್ಧಿ
ವೈದ್ಯಕೀಯ ಶಿಕ್ಷಣವು ಅತ್ಯಂತ ಸಂಕೀರ್ಣವಾದ ವಿಷಯಗಳನ್ನು ಒಳಗೊಂಡಿರುತ್ತದೆ. ಹೀಗಾಗಿ, ವಿದ್ಯಾರ್ಥಿಗಳಿಗೆ ವಿಷಯ ಗ್ರಹಣೆ, ಪರೀಕ್ಷಾ ತಯಾರಿ ಹಾಗೂ ಓದುವ ಸೂಕ್ತ ವಿಧಾನಗಳನ್ನು ಕಲ್ಪಿಸಿಕೊಡುವುದು ಈ ‘ಶೈಕ್ಷಣಿಕ ಕೌಶಲ್ಯ’ ವಿಭಾಗದ ಮುಖ್ಯ ಉದ್ದೇಶವಾಗಿದೆ. ವಿದ್ಯಾರ್ಥಿಯು ಅಂಕಗಣಿತದ ಮೂಲಕ ಮುನ್ನಡೆಯಬೇಕೇ ಅಥವಾ ಬೀಜಗಣಿತದ ಕಲ್ಪನೆಯನ್ನು ಮೊದಲು ಅರ್ಥೈಸಿಕೊಳ್ಳಬೇಕೇ ಎಂಬುದನ್ನು ಎಐ ವಿಶ್ಲೇಷಿಸಿ ಮಾರ್ಗದರ್ಶನ ನೀಡುತ್ತದೆ.
ಮಾನಸಿಕ ಆರೋಗ್ಯಕ್ಕೆ ವೆಲ್ನೆಸ್ ಕ್ಲಿನಿಕ್ಗಳ ಆಸರೆ
ಮತ್ತೊಂದೆಡೆ, ಭಾವನಾತ್ಮಕ ಸಮತೋಲನ, ನಿರ್ಧಾರ ತಳೆಯುವ ಸಾಮರ್ಥ್ಯ, ರೋಗಿಗಳೊಂದಿಗೆ ಸಂವಹನ ನಡೆಸುವ ಕೌಶಲ್ಯ ಮತ್ತು ಒತ್ತಡ ನಿರ್ವಹಣೆಯನ್ನು ‘ಜೀವನ ಕೌಶಲ್ಯ’ ಅಡಿಯಲ್ಲಿ ಬೋಧಿಸಲಾಗುತ್ತದೆ. ವೈದ್ಯಕೀಯ ವಿದ್ಯಾರ್ಥಿಗಳು ಎದುರಿಸುವ ಮಾನಸಿಕ ಸವಾಲುಗಳನ್ನು ಗಂಭೀರವಾಗಿ ಪರಿಗಣಿಸಲಾಗಿದ್ದು, ಕಾಲೇಜುಗಳಲ್ಲಿ ಮನೋವಿಜ್ಞಾನ ಮತ್ತು ಸಮುದಾಯ ವೈದ್ಯಕೀಯ ವಿಭಾಗಗಳ ಸಹಯೋಗದಲ್ಲಿ ನಿರಂತರ ಸಮಾಲೋಚನೆ ನಡೆಸಲು ವೆಲ್ನೆಸ್ ಕ್ಲಿನಿಕ್ಗಳು ನೆರವಾಗಲಿವೆ.
ಸಮಗ್ರ ವ್ಯಕ್ತಿತ್ವ ವಿಕಸನವೇ ವಿಶ್ವವಿದ್ಯಾಲಯದ ಅಂತಿಮ ಗುರಿ
ಬೋಧಕರಿಗೂ ದೊರೆಯಲಿದೆ ಮಾರ್ಗದರ್ಶನ ತರಬೇತಿ
ಈ ಇಡೀ ಯೋಜನೆಗೆ ಆರ್ಜಿಯುಎಚ್ಎಸ್ ಸಂಪೂರ್ಣ ಆರ್ಥಿಕ ನೆರವು ಒದಗಿಸುತ್ತಿದ್ದು, ಸಂಶೋಧನೆ ಮತ್ತು ಅನುಷ್ಠಾನ ಕಾರ್ಯಗಳು ವಿವಿಯ ಉಸ್ತುವಾರಿಯಲ್ಲಿ ನಡೆಯಲಿವೆ. ವಿದ್ಯಾರ್ಥಿಗಳ ಮೌಲ್ಯಮಾಪನಕ್ಕಾಗಿ ಪ್ರತ್ಯೇಕ ವಿಶೇಷ ಸಮಿತಿಯನ್ನು ರಚಿಸಲಾಗಿದ್ದು, ವಿದ್ಯಾರ್ಥಿಗಳ ಶೈಕ್ಷಣಿಕ ಪ್ರಗತಿಯ ಜೊತೆಗೆ ಅವರ ಉದ್ಯೋಗಾರ್ಹತೆ ಮತ್ತು ಸಮಗ್ರ ವ್ಯಕ್ತಿತ್ವ ವಿಕಸನವನ್ನು ಹೆಚ್ಚಿಸುವುದು ಈ ಯೋಜನೆಯ ಮೂಲ ಉದ್ದೇಶವಾಗಿದೆ ಎಂದು ವಿವಿ ಕುಲಪತಿ ಡಾ. ಬಿ.ಸಿ. ಭಗವಾನ್ ತಿಳಿಸಿದ್ದಾರೆ.
