ವಾಟ್ಸ್ಆ್ಯಪ್ನ ಗೌಪ್ಯತಾ ಭದ್ರತೆಗೆ ದೊಡ್ಡ ಕಪ್ಪು ಚುಕ್ಕೆ!
ತನ್ನ ಎಂಡ್-ಟು-ಎಂಡ್ ಎನ್ಕ್ರಿಪ್ಶನ್ ಮತ್ತು ಭದ್ರತಾ ವೈಶಿಷ್ಟ್ಯಗಳ ಬಗ್ಗೆ ಹೆಮ್ಮೆ ಪಡುವ ಮೆಸೇಜಿಂಗ್ ವೇದಿಕೆ ವಾಟ್ಸ್ಆ್ಯಪ್ (WhatsApp) ಇದೀಗ ಇತಿಹಾಸದಲ್ಲೇ ಅತಿದೊಡ್ಡ ಡೇಟಾ ಸೋರಿಕೆ ಹಗರಣದ ಕೇಂದ್ರಬಿಂದುವಾಗಿದೆ. ಸುಮಾರು 3.5 ಬಿಲಿಯನ್ (350 ಕೋಟಿ) ಬಳಕೆದಾರರ ಫೋನ್ ಸಂಖ್ಯೆಗಳು ಸೋರಿಕೆಯಾಗಿದ್ದು, ಇದು ಯಾವುದೇ ಬಾಹ್ಯ ಹ್ಯಾಕರ್ನಿಂದಲ್ಲ, ಬದಲಾಗಿ ವಾಟ್ಸ್ಆ್ಯಪ್ನ ಮೂಲ ಕಂಪನಿಯಾದ ಮೆಟಾ (Meta) ದೀರ್ಘಕಾಲದ ನಿರ್ಲಕ್ಷ್ಯದಿಂದ ಸಂಭವಿಸಿದೆ ಎಂಬ ಸ್ಫೋಟಕ ಸತ್ಯ ಹೊರಬಿದ್ದಿದೆ.
2017ರಿಂದಲೂ ತಿಳಿದಿದ್ದರೂ ಸುಮ್ಮನಿದ್ದ ಮೆಟಾ?
ಆಸ್ಟ್ರಿಯಾದ ವಿಯೆನ್ನಾ ವಿಶ್ವವಿದ್ಯಾಲಯದ ಭದ್ರತಾ ಸಂಶೋಧಕರು ಈ ಭಾರಿ ಭದ್ರತಾ ದೋಷವನ್ನು ಬಯಲು ಮಾಡಿದ್ದಾರೆ. ವಾಟ್ಸ್ಆ್ಯಪ್ನ ಒಂದು ಸರಳ ವೈಶಿಷ್ಟ್ಯವನ್ನು ಬಳಸಿಕೊಂಡು, ಬಹುತೇಕ ಇಡೀ ವಿಶ್ವದ ವಾಟ್ಸ್ಆ್ಯಪ್ ಬಳಕೆದಾರರ ಮೊಬೈಲ್ ಸಂಖ್ಯೆಗಳನ್ನು ಯಾರಾದರೂ ಸುಲಭವಾಗಿ ಪಡೆಯಬಹುದು ಎಂದು ಅವರು ತೋರಿಸಿದ್ದಾರೆ.
ಸಂಶೋಧಕರು ವರದಿ ಮಾಡಿರುವ ಪ್ರಕಾರ, ವಾಟ್ಸ್ಆ್ಯಪ್ನಲ್ಲಿ ಒಬ್ಬ ವ್ಯಕ್ತಿಯ ಸಂಖ್ಯೆಯನ್ನು ನಮೂದಿಸಿದಾಗ, ಆ ಸಂಖ್ಯೆ ವಾಟ್ಸ್ಆ್ಯಪ್ನಲ್ಲಿ ಸಕ್ರಿಯವಾಗಿದೆಯೇ ಅಥವಾ ಇಲ್ಲವೇ ಎಂದು ತಿಳಿಯುವ ಅವಕಾಶವಿದೆ. ಇದೇ ವೈಶಿಷ್ಟ್ಯವನ್ನು ದುರುಪಯೋಗಪಡಿಸಿಕೊಂಡು, ಸಂಶೋಧಕರ ತಂಡವು ಏಕಕಾಲದಲ್ಲಿ ಕೋಟಿಗಟ್ಟಲೆ ಸಂಖ್ಯೆಗಳನ್ನು ಪರೀಕ್ಷಿಸಿ, ಅವುಗಳ ವಾಟ್ಸ್ಆ್ಯಪ್ ಉಪಸ್ಥಿತಿಯನ್ನು ದೃಢಪಡಿಸಿತು. ಈ ಪ್ರಕ್ರಿಯೆಗೆ ಯಾವುದೇ ಸಂಕೀರ್ಣ ಹ್ಯಾಕಿಂಗ್ ತಂತ್ರಾಂಶಗಳ ಅಗತ್ಯವಿರಲಿಲ್ಲ.
ಅವರ ಅಧ್ಯಯನದ ಪ್ರಕಾರ, ಈ ದೋಷವು 57% ಬಳಕೆದಾರರ ಪ್ರೊಫೈಲ್ ಚಿತ್ರಗಳು ಮತ್ತು 29% ಬಳಕೆದಾರರ ಪ್ರೊಫೈಲ್ ವಿವರಗಳನ್ನೂ ಸಹ ಬಹಿರಂಗಪಡಿಸಲು ಕಾರಣವಾಗಿದೆ.
ಡೇಟಾ ರಕ್ಷಣೆಯ ಬಗ್ಗೆ ಕಂಪನಿಯ ಜವಾಬ್ದಾರಿ
ಬಹಳ ಆಶ್ಚರ್ಯಕರ ವಿಷಯವೆಂದರೆ, ಈ ಭದ್ರತಾ ಸಮಸ್ಯೆಯ ಬಗ್ಗೆ 2017ರಷ್ಟು ಹಿಂದೆಯೇ ಮೆಟಾಗೆ ಎಚ್ಚರಿಕೆ ನೀಡಲಾಗಿತ್ತು ಎಂದು ಹೇಳಲಾಗಿದೆ. ಆದರೆ ಕಂಪನಿಯು ಹಲವಾರು ವರ್ಷಗಳ ಕಾಲ ಇದನ್ನು ಗಂಭೀರವಾಗಿ ಪರಿಗಣಿಸಲಿಲ್ಲ. ಸಂಶೋಧಕರು ಏಪ್ರಿಲ್ 2025ರಲ್ಲಿ ಈ ಕುರಿತು ಮತ್ತೆ ವರದಿ ಸಲ್ಲಿಸಿದ ನಂತರವಷ್ಟೇ, ಮೆಟಾ ಅಕ್ಟೋಬರ್ನಲ್ಲಿ ಪರಿಹಾರ ಕ್ರಮವನ್ನು ಜಾರಿಗೆ ತಂದಿತು. ‘ರೇಟ್ ಲಿಮಿಟಿಂಗ್’ ಎಂಬ ತಂತ್ರಜ್ಞಾನದ ಮೂಲಕ ಏಕಕಾಲದಲ್ಲಿ ಭಾರಿ ಸಂಖ್ಯೆಯ ಫೋನ್ ಸಂಖ್ಯೆಗಳನ್ನು ಪರೀಕ್ಷಿಸುವುದನ್ನು ತಡೆಯುವ ಪ್ರಯತ್ನ ಮಾಡಿದೆ.
ಮೆಟಾ ನೀಡಿದ ಸಾರ್ವಜನಿಕ ಸ್ಪಷ್ಟನೆ: ‘ಸಾರ್ವಜನಿಕ ಡೇಟಾ’ವಂತೆ!
ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಮೆಟಾ ಕಂಪನಿಯು, ಸೋರಿಕೆಯಾದ ಮಾಹಿತಿ ಬಹುತೇಕ ಈಗಾಗಲೇ ‘ಸಾರ್ವಜನಿಕವಾಗಿ ಲಭ್ಯವಿರುವ ಡೇಟಾ’ ಎಂದು ಹೇಳಿಕೊಂಡಿದೆ. ಅಂದರೆ, ಗೌಪ್ಯತಾ ಸೆಟ್ಟಿಂಗ್ಗಳನ್ನು ‘ಎಲ್ಲರಿಗೂ’ (Everyone) ಗೋಚರಿಸುವಂತೆ ಹೊಂದಿಸಿದ್ದ ಬಳಕೆದಾರರ ಮಾಹಿತಿಯಷ್ಟೇ ಸೋರಿಕೆಯಾಗಿದೆ. ಗೌಪ್ಯತಾ ಸೆಟ್ಟಿಂಗ್ಗಳನ್ನು ಬಿಗಿಗೊಳಿಸಿದ್ದ ಬಳಕೆದಾರರ ಮೇಲೆ ಇದರ ಪರಿಣಾಮ ಕಡಿಮೆ ಎಂದು ಕಂಪನಿ ಹೇಳಿದೆ.
ಆದರೂ, 3.5 ಬಿಲಿಯನ್ (350 ಕೋಟಿ) ಫೋನ್ ಸಂಖ್ಯೆಗಳು ಅಪರಿಚಿತರಿಗೆ ಲಭ್ಯವಾಗಿರುವುದು ಬಳಕೆದಾರರ ಗೌಪ್ಯತೆ ಮತ್ತು ಭದ್ರತೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಈ ಹಿಂದೆ, 2022ರಲ್ಲಿ ಕೂಡ ಯುನೈಟೆಡ್ ಸ್ಟೇಟ್ಸ್ನ 32 ಮಿಲಿಯನ್ (3.2 ಕೋಟಿ) ಬಳಕೆದಾರರ ಡೇಟಾ ಸೋರಿಕೆಯಾಗಿತ್ತು. ಈ ಮರುಕಳಿಸುವ ಘಟನೆಗಳು ಪ್ರಮುಖ ತಂತ್ರಜ್ಞಾನ ಸಂಸ್ಥೆಗಳ ಭದ್ರತಾ ಕ್ರಮಗಳ ವಿಶ್ವಾಸಾರ್ಹತೆಯ ಬಗ್ಗೆ ಅನುಮಾನ ಮೂಡಿಸಿವೆ.
