ಭಾರತವನ್ನು ವಿಶ್ವದ ಡಿಜಿಟಲ್ ಪವರ್ ಹೌಸ್ ಆಗಿ ಪರಿವರ್ತಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರವು 2026-27ರ ಬಜೆಟ್ನಲ್ಲಿ ಐತಿಹಾಸಿಕ ತೀರ್ಮಾನವೊಂದನ್ನು ಪ್ರಕಟಿಸಿದೆ. ದೇಶದ ಡೇಟಾ ಸೆಂಟರ್ಗಳನ್ನು ಬಳಸಿಕೊಂಡು ಜಾಗತಿಕವಾಗಿ ಕ್ಲೌಡ್ ಸೇವೆಗಳನ್ನು ನೀಡುವ ವಿದೇಶಿ ಸಂಸ್ಥೆಗಳಿಗೆ ಬರೋಬ್ಬರಿ 2047ರವರೆಗೆ ಅಂದರೆ ಮುಂದಿನ 21 ವರ್ಷಗಳ ಕಾಲ ಪೂರ್ಣ ಪ್ರಮಾಣದ ‘ತೆರಿಗೆ ರಜೆ’ (Tax Holiday) ಘೋಷಿಸಲಾಗಿದೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಮಂಡಿಸಿದ ಈ ಯೋಜನೆಯು ಕೃತಕ ಬುದ್ಧಿಮತ್ತೆ (AI) ಮತ್ತು ಡೇಟಾ ಶೇಖರಣಾ ವಲಯದಲ್ಲಿ ಭಾರತವನ್ನು ಅಗ್ರಸ್ಥಾನಕ್ಕೆ ತರುವ ಗುರಿ ಹೊಂದಿದೆ.
ಡೇಟಾ ಸೆಂಟರ್ ಎಂದರೆ ನಿಖರವಾಗಿ ಏನು? ಡೇಟಾ ಸೆಂಟರ್ ಎನ್ನುವುದು ಡಿಜಿಟಲ್ ಮಾಹಿತಿಯ ಭಂಡಾರವಿದ್ದಂತೆ. ನಾವು ದಿನನಿತ್ಯ ಬಳಸುವ ಇ-ಮೇಲ್, ಸಾಮಾಜಿಕ ಜಾಲತಾಣದ ಫೋಟೋಗಳು, ಬ್ಯಾಂಕಿಂಗ್ ವಿವರಗಳು ಮತ್ತು ಎಐ ತಂತ್ರಜ್ಞಾನಕ್ಕೆ ಬೇಕಾದ ಬೃಹತ್ ಮಾಹಿತಿಯನ್ನು ಇಲ್ಲಿರುವ ಶಕ್ತಿಶಾಲಿ ಕಂಪ್ಯೂಟರ್ ಸರ್ವರ್ಗಳಲ್ಲಿ ಸಂಗ್ರಹಿಸಲಾಗುತ್ತದೆ. ಇವುಗಳಿಗೆ ನಿರಂತರ ವಿದ್ಯುತ್, ಅತೀ ವೇಗದ ಇಂಟರ್ನೆಟ್ ಮತ್ತು ಅತ್ಯಾಧುನಿಕ ತಂಪುಗೊಳಿಸುವ ವ್ಯವಸ್ಥೆಯ (Cooling System) ಅಗತ್ಯವಿರುತ್ತದೆ.
ಮಂಗಳೂರಿಗೆ ಒಲಿಯಲಿದೆಯೇ ಅದೃಷ್ಟ? ಈ ಬೃಹತ್ ಘೋಷಣೆಯಿಂದ ಕರ್ನಾಟಕದ ಕರಾವಳಿ ನಗರಿ ಮಂಗಳೂರಿಗೆ ದೊಡ್ಡ ಲಾಭವಾಗುವ ಸಾಧ್ಯತೆಯಿದೆ. ಇತ್ತೀಚಿನ ‘ಮಂಗಳೂರು ಡೇಟಾ ಸೆಂಟರ್ ಫೀಸಿಬಿಲಿಟಿ ಸ್ಟಡಿ 2025’ ವರದಿಯ ಪ್ರಕಾರ, ಮಂಗಳೂರು ಡೇಟಾ ಸೆಂಟರ್ಗಳನ್ನು ಸ್ಥಾಪಿಸಲು ದೇಶದ ಅತ್ಯಂತ ಸೂಕ್ತ ನಗರಗಳಲ್ಲಿ ಒಂದಾಗಿದೆ. ಮುಂಬೈ ಮತ್ತು ಚೆನ್ನೈಗೆ ಹೋಲಿಸಿದರೆ ಇಲ್ಲಿ ಭೂಮಿಯ ಬೆಲೆ ಸುಮಾರು 4 ರಿಂದ 5 ಪಟ್ಟು ಕಡಿಮೆ ಇರುವುದು ಹೂಡಿಕೆದಾರರನ್ನು ಆಕರ್ಷಿಸುತ್ತಿದೆ. ಅಲ್ಲದೆ, ಸಮುದ್ರದ ಕೆಳಗಿನ ಇಂಟರ್ನೆಟ್ ಕೇಬಲ್ ಸಂಪರ್ಕಗಳು (Submarine Cables) ಮಂಗಳೂರಿಗೆ ನೇರವಾಗಿ ಇರುವುದರಿಂದ, ಜಾಗತಿಕ ಕಂಪನಿಗಳು ಇಲ್ಲಿ ತಮ್ಮ ಘಟಕಗಳನ್ನು ತೆರೆಯಲು ಆಸಕ್ತಿ ತೋರುತ್ತಿವೆ.
