ದಶಕಗಳ ಕಾಲ ಜಿಮೇಲ್ ಬಳಸುತ್ತಿದ್ದವರ ಬಹುದಿನದ ಬೇಡಿಕೆಗೆ ಕೊನೆಗೂ ಗೂಗಲ್ ಮನ್ನಣೆ ನೀಡಿದೆ. ಇನ್ನು ಮುಂದೆ ನಿಮ್ಮ ಹಳೆಯ ಜಿಮೇಲ್ ಖಾತೆಯ ವಿಳಾಸವನ್ನು (Email Address) ಬದಲಾಯಿಸಲು ಗೂಗಲ್ ಅವಕಾಶ ಮಾಡಿಕೊಟ್ಟಿದೆ. ಈ ಮೊದಲು ಹೊಸ ವಿಳಾಸ ಬೇಕೆಂದರೆ ಹಳೆಯದನ್ನು ಬಿಟ್ಟು ಹೊಸ ಖಾತೆಯನ್ನೇ ತೆರೆಯಬೇಕಿತ್ತು, ಆದರೆ ಈಗ ನಿಮ್ಮ ಹಳೆಯ ಡೇಟಾವನ್ನು ಹಾಗೆಯೇ ಉಳಿಸಿಕೊಂಡು ಹೆಸರನ್ನು ಮಾತ್ರ ಬದಲಾಯಿಸಿಕೊಳ್ಳಬಹುದು.
ಹೊಸ ಬದಲಾವಣೆಯ ಮುಖ್ಯಾಂಶಗಳು:
- ಡೇಟಾ ಸುರಕ್ಷಿತ: ನಿಮ್ಮ ಜಿಮೇಲ್ ವಿಳಾಸ ಬದಲಾಯಿಸಿದರೂ ಸಹ ನಿಮ್ಮ ಹಳೆಯ ಇಮೇಲ್ಗಳು, ಗೂಗಲ್ ಫೋಟೋಸ್ನಲ್ಲಿರುವ ಫೋಟೋಗಳು ಮತ್ತು ಡ್ರೈವ್ನಲ್ಲಿರುವ ಫೈಲ್ಗಳು ಸುರಕ್ಷಿತವಾಗಿರುತ್ತವೆ.
- ಹಳೆಯ ಐಡಿ ಅಲಿಯಾಸ್ ಆಗಿ ಕಾರ್ಯನಿರ್ವಹಿಸುತ್ತದೆ: ನೀವು ಹೊಸ ಹೆಸರಿಗೆ ಬದಲಾಯಿಸಿಕೊಂಡ ನಂತರವೂ, ನಿಮ್ಮ ಹಳೆಯ ವಿಳಾಸಕ್ಕೆ ಯಾರಾದರೂ ಇಮೇಲ್ ಕಳುಹಿಸಿದರೆ ಅದು ನಿಮ್ಮ ಹೊಸ ಇನ್ಬಾಕ್ಸ್ಗೆ ತಲುಪುತ್ತದೆ. ಹಳೆಯ ವಿಳಾಸವು ಒಂದು ‘ಅಲಿಯಾಸ್’ (Alias) ಆಗಿ ನಿಮ್ಮ ಖಾತೆಯ ಜೊತೆಗೇ ಇರುತ್ತದೆ.
- ಲಾಗಿನ್ ಸೌಲಭ್ಯ: ನೀವು ಹಳೆಯ ಅಥವಾ ಹೊಸ ಇಮೇಲ್ ಐಡಿ ಎರಡನ್ನೂ ಬಳಸಿ ನಿಮ್ಮ ಖಾತೆಗೆ ಲಾಗಿನ್ ಆಗಬಹುದು.
- ಮಿತಿಗಳು: ಒಬ್ಬ ಬಳಕೆದಾರರು ತಮ್ಮ ಜೀವಿತಾವಧಿಯಲ್ಲಿ ಕೇವಲ 3 ಬಾರಿ ಮಾತ್ರ ಇಮೇಲ್ ವಿಳಾಸ ಬದಲಾಯಿಸಲು ಅವಕಾಶವಿದೆ. ಅಂದರೆ ಒಂದು ಖಾತೆಗೆ ಒಟ್ಟು 4 ವಿಳಾಸಗಳನ್ನು ಹೊಂದುವ ಅವಕಾಶವಿರುತ್ತದೆ.
- ಸಮಯದ ಮಿತಿ: ಒಮ್ಮೆ ಇಮೇಲ್ ವಿಳಾಸ ಬದಲಾಯಿಸಿದರೆ, ಮುಂದಿನ 12 ತಿಂಗಳವರೆಗೆ (1 ವರ್ಷ) ಮತ್ತೆ ಬದಲಾಯಿಸಲು ಸಾಧ್ಯವಿಲ್ಲ.
ಹೆಸರು ಬದಲಾಯಿಸುವ ಹಂತಗಳು:
- ನಿಮ್ಮ ಗೂಗಲ್ ಖಾತೆಯ ‘Manage Your Google Account’ ವಿಭಾಗಕ್ಕೆ ಹೋಗಿ.
- ಅಲ್ಲಿರುವ ‘Personal Info’ ಎಂಬ ಆಯ್ಕೆಯನ್ನು ಕ್ಲಿಕ್ ಮಾಡಿ.
- ನಂತರ ‘Contact Info’ ಅಡಿಯಲ್ಲಿರುವ ನಿಮ್ಮ ಇಮೇಲ್ ವಿಳಾಸದ ಮೇಲೆ ಕ್ಲಿಕ್ ಮಾಡಿ.
- ನಿಮ್ಮ ಖಾತೆಗೆ ಈ ಸೌಲಭ್ಯ ಲಭ್ಯವಾಗಿದ್ದರೆ, ಅಲ್ಲಿ ‘Change your Google Account email address’ ಎಂಬ ಆಯ್ಕೆ ಕಾಣಿಸುತ್ತದೆ. ಅದನ್ನು ಬಳಸಿ ಹೊಸ ಹೆಸರನ್ನು ದಾಖಲಿಸಬಹುದು.
ಸದ್ಯ ಈ ಫೀಚರ್ ಹಂತ ಹಂತವಾಗಿ ಜಾರಿಗೆ ಬರುತ್ತಿದ್ದು, ಮುಂಬರುವ ದಿನಗಳಲ್ಲಿ ಎಲ್ಲಾ ಬಳಕೆದಾರರಿಗೂ ಲಭ್ಯವಾಗಲಿದೆ ಎಂದು ಗೂಗಲ್ ತನ್ನ ಅಧಿಕೃತ ಸಪೋರ್ಟ್ ಪೇಜ್ನಲ್ಲಿ ತಿಳಿಸಿದೆ. ವಿಶೇಷವಾಗಿ ಕಾಲೇಜು ದಿನಗಳಲ್ಲಿ ಇಟ್ಟಿದ್ದ ವಿಚಿತ್ರ ಹೆಸರುಗಳಿಂದ ಮುಜುಗರ ಅನುಭವಿಸುತ್ತಿದ್ದ ಉದ್ಯೋಗಾಕಾಂಕ್ಷಿಗಳಿಗೆ ಈ ಅಪ್ಡೇಟ್ ವರದಾನವಾಗಲಿದೆ.
