ವಾಷಿಂಗ್ಟನ್ ಡಿ.ಸಿ.: ಜಾಗತಿಕ ವೃತ್ತಿಪರ ಕುಸ್ತಿಯಲ್ಲಿ ಹೊಸ ಅಧ್ಯಾಯಕ್ಕೆ ನಾಂದಿ ಹಾಡಿದ್ದ ಡಬ್ಲ್ಯೂಡಬ್ಲ್ಯೂಇ (WWE) ಯ ಶ್ರೇಷ್ಠ ಸೂಪರ್ಸ್ಟಾರ್ ಜಾನ್ ಸೀನಾ (John Cena) ಅವರು ತಮ್ಮ 23 ವರ್ಷಗಳ ಭವ್ಯ ವೃತ್ತಿಜೀವನಕ್ಕೆ ಭಾನುವಾರ (ಡಿಸೆಂಬರ್ 14) ಅಂತಿಮ ತೆರೆ ಎಳೆದರು. ಅಮೆರಿಕಾದ ವಾಷಿಂಗ್ಟನ್ ಡಿ.ಸಿ.ಯಲ್ಲಿ ನಡೆದ ‘ಸ್ಯಾಟರ್ ಡೇ ನೈಟ್ ಮೇನ್ ಇವೆಂಟ್’ ಕಾರ್ಯಕ್ರಮದಲ್ಲಿ ಆಸ್ಟ್ರಿಯಾದ ಬಲಿಷ್ಠ ಕುಸ್ತಿಪಟು ಗುಂಟರ್ (Gunther) ವಿರುದ್ಧದ ಪಂದ್ಯದಲ್ಲಿ ಸೋಲು ಅನುಭವಿಸಿದ ನಂತರ, ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಗಿ ರಿಂಗ್ನಿಂದ ಮರಳಿದರು. ಇದು ಸೀನಾ ಅವರ ಲಕ್ಷಾಂತರ ಅಭಿಮಾನಿಗಳಲ್ಲಿ ದುಃಖ ಮತ್ತು ಆಘಾತ ಎರಡನ್ನೂ ಉಂಟುಮಾಡಿತು.
ಸುಮಾರು 20,000ಕ್ಕೂ ಅಧಿಕ ಸಂಖ್ಯೆಯ ಅಭಿಮಾನಿಗಳು ನೆರೆದಿದ್ದ ಈ ಅಂತಿಮ ಮುಖಾಮುಖಿಯು, ಸೀನಾ ಅವರ ಸುದೀರ್ಘ ವೃತ್ತಿಜೀವನದಲ್ಲಿಯೇ ಅನಿರೀಕ್ಷಿತ ತಿರುವಿಗೆ ಕಾರಣವಾಯಿತು. ಜಾನ್ ಸೀನಾ ಅವರು ಪಂದ್ಯದ ಆರಂಭದಲ್ಲಿ ‘U Can’t See Me’ ಎಂಬ ತಮ್ಮ ಟ್ರೇಡ್ಮಾರ್ಕ್ ಕ್ಷಣದೊಂದಿಗೆ ಪ್ರೇಕ್ಷಕರನ್ನು ಹುರಿದುಂಬಿಸಿದರು. ಆದರೆ ಗುಂಟರ್ ಅವರ ದೈಹಿಕ ಸಾಮರ್ಥ್ಯದ ಮುಂದೆ ಸೀನಾ ಪೇಲವವಾದರು. ಅಂತಿಮವಾಗಿ, ಗುಂಟರ್ ಅವರು ಸೀನಾರ ಕುತ್ತಿಗೆಯ ಭಾಗವನ್ನು ಬಿಗಿಯಾಗಿ ಹಿಡಿದು ಲಾಕ್ (Sleeper Hold) ಮಾಡಿದಾಗ, ಸೀನಾ ನೋವಿನಿಂದ ಹೊರಬರಲಾಗದೆ ಕೊನೆಗೆ ಟ್ಯಾಪ್ ಔಟ್ (ಸೋಲನ್ನು ಒಪ್ಪಿಕೊಳ್ಳುವುದು) ಮಾಡುವ ಮೂಲಕ ಪಂದ್ಯವನ್ನು ಕೈಬಿಟ್ಟರು. ತಮ್ಮ 23 ವರ್ಷಗಳ ಕೆರಿಯರ್ನಲ್ಲಿ ಜಾನ್ ಸೀನಾ ತಾನೇ ಸೋಲು ಒಪ್ಪಿಕೊಂಡಿದ್ದು ಇದೇ ಮೊದಲ ಬಾರಿ ಎಂಬುದು ಗಮನಾರ್ಹ ಅಂಶ.
ಸೀನಾ ಅವರ ಸಾಧನೆಯ ಕಿರೀಟ: 1977 ರಲ್ಲಿ ಜನಿಸಿದ ಜಾನ್ ಫೆಲಿಕ್ಸ್ ಆಂಥೋನಿ ಸೀನಾ ಅವರು 2002 ರಲ್ಲಿ ಡಬ್ಲ್ಯೂಡಬ್ಲ್ಯೂಇ ಗೆ ಅಧಿಕೃತವಾಗಿ ಕಾಲಿಟ್ಟರು. ಅಂದಿನಿಂದ, ಅವರು ಒಟ್ಟು 17 ಬಾರಿ ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿದರು, ಈ ಮೂಲಕ ಡಬ್ಲ್ಯೂಡಬ್ಲ್ಯೂಇ ಇತಿಹಾಸದಲ್ಲಿ ಅತಿ ಹೆಚ್ಚು ವಿಶ್ವ ಪ್ರಶಸ್ತಿಗಳನ್ನು ಗೆದ್ದಿರುವ ದಾಖಲೆಯನ್ನು ಸ್ಥಾಪಿಸಿದರು. ಇದರ ಜೊತೆಗೆ, ಅವರು 5 ಬಾರಿ ಯುನೈಟೆಡ್ ಸ್ಟೇಟ್ಸ್ ಚಾಂಪಿಯನ್, 4 ಬಾರಿ ಟ್ಯಾಗ್ ಟೀಮ್ ಚಾಂಪಿಯನ್ ಮತ್ತು 2 ಬಾರಿ ರಾಯಲ್ ರಂಬಲ್ ವಿಜೇತರಾಗಿದ್ದಾರೆ. ಡಬ್ಲ್ಯೂಡಬ್ಲ್ಯೂಇ ಸಂಸ್ಥೆಯ ಎಲ್ಲಾ ಪ್ರಮುಖ ಚಾಂಪಿಯನ್ಶಿಪ್ಗಳನ್ನು (Grand Slam Champion) ಗೆದ್ದಿರುವ ಏಕೈಕ ‘ರೆಸ್ಲರ್’ ಎಂಬ ವಿಶಿಷ್ಟ ಸಾಧನೆ ಜಾನ್ ಸೀನಾ ಅವರಿಗಿದೆ.
ವಿದಾಯಕ್ಕೆ ಹಾಜರಿದ್ದ ದಿಗ್ಗಜರು ಮತ್ತು ಅಭಿಮಾನಿಗಳ ಆಕ್ರೋಶ: ಸೀನಾ ಅವರ ಅಂತಿಮ ಪಂದ್ಯದ ಗೌರವಾರ್ಥವಾಗಿ, ಮಿಚೆಲ್ ಮೆಕೂಲ್, ಟ್ರಿಶ್ ಸ್ಟ್ರಾಟಸ್, ಕರ್ಟ್ ಆಂಗಲ್, ಮಾರ್ಕ್ ಹೆನ್ರಿ ಮತ್ತು ರಾಬ್ ವ್ಯಾನ್ ಡ್ಯಾಮ್ ಸೇರಿದಂತೆ ಡಬ್ಲ್ಯೂಡಬ್ಲ್ಯೂಇ ಹಾಲ್ ಆಫ್ ಫೇಮರ್ಗಳು ರಿಂಗ್ಸೈಡ್ನಲ್ಲಿ ಉಪಸ್ಥಿತರಿದ್ದರು. ದಿ ರಾಕ್ (The Rock) ಮತ್ತು ಕೇನ್ (Kane) ಅವರಂತಹ ದಿಗ್ಗಜರು ವೀಡಿಯೊ ಸಂದೇಶದ ಮೂಲಕ ಶುಭ ಕೋರಿದರು. ಆದಾಗ್ಯೂ, ಸೀನಾ ಟ್ಯಾಪ್ ಔಟ್ ಮೂಲಕ ಸೋತ ವಿಚಾರ ಅಭಿಮಾನಿಗಳಲ್ಲಿ ಭಾರೀ ಅಸಮಾಧಾನಕ್ಕೆ ಕಾರಣವಾಯಿತು. ಡಬ್ಲ್ಯೂಡಬ್ಲ್ಯೂಇ ಕ್ರೀಡಾ ನಿರ್ದೇಶಕ ಟ್ರಿಪಲ್ ಎಚ್ (Triple H) ಅವರ ವಿರುದ್ಧ ಅನೇಕರು ಟ್ವೀಟ್ ಮಾಡಿ ಆಕ್ರೋಶ ಹೊರಹಾಕಿದ್ದು, ಸೀನಾ ಅವರಂತಹ ದಂತಕಥೆಯ ವೃತ್ತಿಜೀವನವನ್ನು ಸೋಲಿನೊಂದಿಗೆ ಅಂತ್ಯಗೊಳಿಸಲು ಇದು ವ್ಯವಸ್ಥಿತವಾಗಿ ರೂಪಿಸಿದ “ಪಿತೂರಿ” ಎಂದು ಅಭಿಮಾನಿಗಳು ದೂರಿದ್ದಾರೆ. ಆದರೆ ವಿಶ್ಲೇಷಕರು, ಈ ಪಂದ್ಯವನ್ನು ಹಳೆಯ ತಲೆಮಾರಿನಿಂದ ಹೊಸ ತಲೆಮಾರಿಗೆ ‘ಬ್ಯಾಟನ್ ಹಸ್ತಾಂತರ’ ಮಾಡಿದ ಐತಿಹಾಸಿಕ ಕ್ಷಣ ಎಂದು ಬಣ್ಣಿಸಿದ್ದಾರೆ.
