ಭಾರತೀಯ ಮನೆಮನೆಗಳಲ್ಲಿ ಅರಿಶಿನ ಮಿಶ್ರಿತ ಹಾಲು ಅಥವಾ ‘ಗೋಲ್ಡನ್ ಮಿಲ್ಕ್’ ಎಂಬುದು ಆರೋಗ್ಯದ ಸಂಜೀವಿನಿ ಎಂದೇ ಪ್ರಸಿದ್ಧ. ಶೀತ, ಕೆಮ್ಮು ಹಾಗೂ ಮೈಕೈ ನೋವಿಗೆ ಪರಿಹಾರವಾಗಿ ರಾತ್ರಿ ಮಲಗುವ ಮುನ್ನ ಇದನ್ನು ಕುಡಿಯುವುದು ರೂಢಿ. ಆದರೆ, ನೀವು ಊಟವಾದ ತಕ್ಷಣ ಈ ಹಾಲು ಕುಡಿಯುವ ಅಭ್ಯಾಸ ಹೊಂದಿದ್ದರೆ, ಅದು ನಿಮ್ಮ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಹುದು ಎಂದು ಆರೋಗ್ಯ ತಜ್ಞರು ಎಚ್ಚರಿಕೆ ನೀಡಿದ್ದಾರೆ.
ನಮ್ಮಲ್ಲಿ ಹೆಚ್ಚಿನವರು ರಾತ್ರಿ ಊಟ ಮುಗಿಸಿದ ಕೂಡಲೇ ಅಥವಾ ಮಲಗುವ ಹತ್ತು ನಿಮಿಷ ಮುಂಚೆ ಅರಿಶಿನ ಹಾಲು ಸೇವಿಸುತ್ತಾರೆ. ಆದರೆ, ರಾತ್ರಿ ವೇಳೆ ದೇಹದ ಜೀರ್ಣಾಂಗ ವ್ಯವಸ್ಥೆಯು ಮಂದಗತಿಯಲ್ಲಿ ಸಾಗುವುದರಿಂದ, ಹಾಲು ಜೀರ್ಣವಾಗಲು ಸಾಕಷ್ಟು ಸಮಯ ಬೇಕಾಗುತ್ತದೆ. ಊಟ ಮತ್ತು ಹಾಲಿನ ಸೇವನೆಯ ನಡುವೆ ಕನಿಷ್ಠ 1 ರಿಂದ 2 ಗಂಟೆಗಳ ಅಂತರವಿಲ್ಲದಿದ್ದರೆ ಹೊಟ್ಟೆ ಉಬ್ಬರ, ಅಜೀರ್ಣ ಹಾಗೂ ಆಸಿಡಿಟಿ ಸಮಸ್ಯೆಗಳು ಕಾಡಬಹುದು. ಅರಿಶಿನದಲ್ಲಿರುವ ‘ಕರ್ಕ್ಯುಮಿನ್’ ಅಂಶವು ಪಿತ್ತರಸದ ಉತ್ಪಾದನೆಯನ್ನು ಪ್ರಚೋದಿಸುವುದರಿಂದ, ಮಲಗುವ ಮುನ್ನ ಇದನ್ನು ಸೇವಿಸುವುದು ಕೆಲವರಲ್ಲಿ ಎದೆಯುರಿಗೂ ಕಾರಣವಾಗಬಹುದು. ತಜ್ಞರ ಪ್ರಕಾರ, ಒಂದು ಚಿಟಿಕೆ ಅರಿಶಿನವನ್ನು ಲೋ-ಫ್ಯಾಟ್ ಹಾಲಿನೊಂದಿಗೆ ಊಟಕ್ಕೆ ಸಾಕಷ್ಟು ಮೊದಲೇ ಸೇವಿಸುವುದು ಆರೋಗ್ಯಕ್ಕೆ ಹೆಚ್ಚು ಹಿತಕರ.
