ನಿತ್ಯ ಆಹಾರದಲ್ಲಿ ಸಾಮಾನ್ಯವಾಗಿ ಬಳಕೆಯಾಗುವ ಮೊಸರು ಮತ್ತು ಬೆಳ್ಳುಳ್ಳಿ ಜೊತೆಯಾಗಿ ಸೇವಿಸಿದರೆ, ಆಯುರ್ವೇದದ ಪ್ರಕಾರ ದೇಹಕ್ಕೆ ಅನೇಕ ರೀತಿಯಲ್ಲಿ ಲಾಭವಾಗುತ್ತದೆ. ತಜ್ಞರ ಅಭಿಪ್ರಾಯದಂತೆ ಈ ಸಂಯೋಜನೆ ಜೀರ್ಣಕ್ರಿಯೆ ಸುಧಾರಣೆ, ರೋಗನಿರೋಧಕ ಶಕ್ತಿ ಹೆಚ್ಚಿಸುವಿಕೆ ಹಾಗೂ ದೇಹದ ದೋಷಗಳ ಸಮತೋಲನಕ್ಕೆ ಸಹಕಾರಿಯಾಗುತ್ತದೆ.
ಮೊಸರು ದೇಹಕ್ಕೆ ಬೇಕಾದ ಪ್ರೋಟೀನ್ ಮತ್ತು ನೈಸರ್ಗಿಕ ಪ್ರೋಬಯಾಟಿಕ್‌ಗಳ ಮೂಲ. ಇದು ಕರುಳಿನಲ್ಲಿರುವ ಲಾಭದಾಯಕ ಬ್ಯಾಕ್ಟೀರಿಯಾ ಬೆಳವಣಿಗೆಗೆ ಸಹಾಯಮಾಡಿ, ಜೀರ್ಣಾಂಗ ವ್ಯವಸ್ಥೆ ಸುಧಾರಿಸಲು ಕಾರಣವಾಗುತ್ತದೆ.
ಬೆಳ್ಳುಳ್ಳಿ, ಆಯುರ್ವೇದದಲ್ಲಿ ಬಹುಮಾನಿತ ಆಹಾರವಾಗಿ ಪರಿಗಣಿತವಾಗಿದ್ದು, ಅದು ರಕ್ತದೊತ್ತಡ ಮತ್ತು ಕೊಲೆಸ್ಟ್ರಾಲ್ ನಿಯಂತ್ರಣ, ಉರಿಯೂತ ನಿವಾರಣೆ, ಹಾಗೂ ರಕ್ತ ಶುದ್ಧೀಕರಣದಲ್ಲಿ ಸಹಕಾರಿ. ಇದರಲ್ಲಿ ಶಕ್ತಿಯುತ ಉರಿಯೂತ ನಿವಾರಕ ಮತ್ತು ಸೋಂಕು ನಿವಾರಕ ಗುಣಗಳಿವೆ.
ಎಷ್ಟು ಮತ್ತು ಹೇಗೆ ಸೇವಿಸಬೇಕು?
ಅರ್ಧ ಬಟ್ಟಲು ಮೊಸರಿನಲ್ಲಿ 1 ರಿಂದ 2 ಎಸಳು ಬೆಳ್ಳುಳ್ಳಿಯನ್ನು ನುರಿದು ಬೆರೆಸಿ, ಅದಕ್ಕೆ ಸ್ವಲ್ಪ ಕಪ್ಪು ಉಪ್ಪು ಮತ್ತು ಕರಿಮೆಣಸು ಸೇರಿಸಿ ಬೆಳಿಗ್ಗೆ ಅಥವಾ ಮಧ್ಯಾಹ್ನ ಸೇವಿಸಬಹುದು. ರಾತ್ರಿಯಲ್ಲಿ ಅಥವಾ ತೀವ್ರ ಬೇಸಿಗೆಯ ಸಮಯದಲ್ಲಿ ಇದನ್ನು ಸೇವಿಸುವುದು ತಪ್ಪಾಗುತ್ತದೆ, ಏಕೆಂದರೆ ಅದು ಕಫ ಮತ್ತು ಪಿತ್ತದ ಅಸಮತೋಲನಕ್ಕೆ ಕಾರಣವಾಗಬಹುದು.
ಪ್ರಮುಖ ಪ್ರಯೋಜನಗಳು:
- ಜೀರ್ಣಕ್ರಿಯೆ ಸುಧಾರಣೆ
- ಹೊಟ್ಟೆ ಉಬ್ಬು, ಗ್ಯಾಸ್ಟ್ರಿಕ್ ನಿವಾರಣೆ
- ಕೀಲು ನೋವು ಮತ್ತು ಉರಿಯೂತದ ಇಳಿಕೆ
- ರಕ್ತದೊತ್ತಡ, ಕೊಲೆಸ್ಟ್ರಾಲ್ ನಿಯಂತ್ರಣ
- ರೋಗನಿರೋಧಕ ಶಕ್ತಿ ಗಟ್ಟಿತನ
ಆದರೆ ತಜ್ಞರ ಮಾರ್ಗದರ್ಶನವಿಲ್ಲದೆ ನಿರಂತರ ಸೇವನೆ ಅಡ್ಡ ಪರಿಣಾಮಕ್ಕೆ ಕಾರಣವಾಗಬಹುದು. ಯಾವುದೇ ಗ್ಯಾಸ್ಟ್ರಿಕ್ ಅಥವಾ ಅಲರ್ಜಿಯ ಇತಿಹಾಸವಿದ್ದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
