ಮುಂಜಾನೆ ಎದ್ದ ತಕ್ಷಣ ಒಂದು ಕಪ್ ಬಿಸಿ ಚಹಾ ಹೀರದಿದ್ದರೆ ಅನೇಕರಿಗೆ ದಿನವೇ ಆರಂಭವಾಗುವುದಿಲ್ಲ. ಆದರೆ, ಈ “ಬೆಡ್ ಟೀ” ಸಂಸ್ಕೃತಿ ನಿಮ್ಮ ದೇಹದ ಪ್ರಮುಖ ಅಂಗಗಳಾದ ಲಿವರ್ (ಯಕೃತ್ತು) ಮತ್ತು ಕರುಳನ್ನು ನಿಧಾನವಾಗಿ ಹಾನಿ ಮಾಡುತ್ತಿದೆ ಎಂಬ ಆಘಾತಕಾರಿ ಸತ್ಯವನ್ನು ವೈದ್ಯಕೀಯ ಸಂಶೋಧನೆಗಳು ಹೊರಹಾಕಿವೆ. ನಾವು ದಿನದ ಆರಂಭದಲ್ಲಿ ಹೊಟ್ಟೆಗೆ ಹಾಕುವ ಮೊದಲ ಆಹಾರ ಇಡೀ ದಿನದ ಚಯಾಪಚಯ ಕ್ರಿಯೆಯನ್ನು ನಿರ್ಧರಿಸುತ್ತದೆ. ಇಂತಹ ಸಮಯದಲ್ಲಿ ಆಮ್ಲೀಯ ಗುಣವುಳ್ಳ ಕೆಫೀನ್ ಸೇವನೆ ಮಾಡುವುದು ಆರೋಗ್ಯದ ದೃಷ್ಟಿಯಿಂದ ಅಪಾಯಕಾರಿ.
ಜೀರ್ಣಾಂಗವ್ಯೂಹದ ಮೇಲೆ ಗಂಭೀರ ಪರಿಣಾಮ: ಆಯುರ್ವೇದ ಮತ್ತು ಆಧುನಿಕ ವೈದ್ಯಕೀಯ ವಿಜ್ಞಾನ ಎರಡೂ ಕೂಡ ಖಾಲಿ ಹೊಟ್ಟೆಯಲ್ಲಿ ಚಹಾ ಸೇವನೆಯನ್ನು ವಿರೋಧಿಸುತ್ತವೆ. ರಾತ್ರಿಯಿಡೀ ವಿಶ್ರಾಂತಿಯಲ್ಲಿದ್ದ ಜೀರ್ಣಾಂಗ ವ್ಯವಸ್ಥೆಯು ಬೆಳಗ್ಗೆ ಚೈತನ್ಯ ಪಡೆಯಲು ನೀರು ಅಥವಾ ಪೌಷ್ಟಿಕಾಂಶವನ್ನು ಬಯಸುತ್ತದೆ. ಆದರೆ ನಾವು ಟ್ಯಾನಿನ್ ಮತ್ತು ಕೆಫೀನ್ ಅಂಶವಿರುವ ಚಹಾವನ್ನು ನೀಡಿದಾಗ, ಅದು ಹೊಟ್ಟೆಯ ಒಳಪದರವನ್ನು ಕೆರಳಿಸುತ್ತದೆ. ಇದು ತೀವ್ರವಾದ ಆಸಿಡಿಟಿ, ಎದೆಯುರಿ ಮತ್ತು ಗ್ಯಾಸ್ಟ್ರಿಕ್ ಸಮಸ್ಯೆಗೆ ನೇರ ಹಾದಿಯಾಗಿದೆ. ದೀರ್ಘಕಾಲದವರೆಗೆ ಈ ಅಭ್ಯಾಸ ಮುಂದುವರಿದರೆ ಕರುಳಿನ ಆರೋಗ್ಯ ಹದಗೆಟ್ಟು, ಪೋಷಕಾಂಶಗಳ ಹೀರಿಕೊಳ್ಳುವ ಸಾಮರ್ಥ್ಯ ಕುಂಠಿತಗೊಳ್ಳುತ್ತದೆ.
ಲಿವರ್ ಮತ್ತು ರಕ್ತಹೀನತೆಯ ಭೀತಿ: ಖಾಲಿ ಹೊಟ್ಟೆಯಲ್ಲಿ ಚಹಾ ಕುಡಿಯುವುದು ಕೇವಲ ಜೀರ್ಣಕ್ರಿಯೆಗೆ ಮಾತ್ರವಲ್ಲ, ಯಕೃತ್ತಿನ (Liver) ಕಾರ್ಯನಿರ್ವಹಣೆಗೂ ಅಡ್ಡಿಪಡಿಸುತ್ತದೆ. ಇದು ಲಿವರ್ನಲ್ಲಿ ಉರಿಯೂತ ಅಥವಾ ಫ್ಯಾಟಿ ಲಿವರ್ನಂತಹ ಸಮಸ್ಯೆಗಳಿಗೆ ನಾಂದಿ ಹಾಡಬಹುದು. ಇನ್ನು ಚಹಾದಲ್ಲಿರುವ ಟ್ಯಾನಿನ್ ಅಂಶವು ನಾವು ಸೇವಿಸುವ ಆಹಾರದಿಂದ ಕಬ್ಬಿಣದಂಶವನ್ನು ದೇಹವು ಹೀರಿಕೊಳ್ಳದಂತೆ ತಡೆಯುತ್ತದೆ. ಇದರಿಂದಾಗಿ ರಕ್ತದಲ್ಲಿ ಹಿಮೋಗ್ಲೋಬಿನ್ ಮಟ್ಟ ಕುಸಿದು ರಕ್ತಹೀನತೆ (Anemia), ಅತಿಯಾದ ಸುಸ್ತು ಮತ್ತು ಕೂದಲು ಉದುರುವಿಕೆಯಂತಹ ಸಮಸ್ಯೆಗಳು ಎದುರಾಗುತ್ತವೆ.
ಮಾನಸಿಕ ಆರೋಗ್ಯ ಮತ್ತು ದೈಹಿಕ ದೌರ್ಬಲ್ಯ: ಚಹಾ ಕುಡಿದ ತಕ್ಷಣ ತಾತ್ಕಾಲಿಕವಾಗಿ ಚೈತನ್ಯ ಬಂದಂತೆ ಕಂಡರೂ, ಅದು ದೇಹದಲ್ಲಿ ‘ಕಾರ್ಟಿಸೋಲ್’ ಎಂಬ ಒತ್ತಡದ ಹಾರ್ಮೋನ್ ಅನ್ನು ಹೆಚ್ಚಿಸುತ್ತದೆ. ಇದು ನಿದ್ರಾಹೀನತೆ ಮತ್ತು ಕಿರಿಕಿರಿಯನ್ನು ಉಂಟುಮಾಡುತ್ತದೆ. ಅಲ್ಲದೆ, ಸಕ್ಕರೆಯುಕ್ತ ಚಹಾವು ಹಲ್ಲುಗಳ ಎನಾಮೆಲ್ ಸವೆಯಲು ಮತ್ತು ಮೂಳೆಗಳ ದೌರ್ಬಲ್ಯಕ್ಕೂ ಕಾರಣವಾಗಬಹುದು. ತಜ್ಞರ ಪ್ರಕಾರ, ಬೆಳಗ್ಗೆ ಎದ್ದ ತಕ್ಷಣ 1 ಅಥವಾ 2 ಲೋಟ ನೀರು ಕುಡಿದು, ಉಪಾಹಾರ ಸೇವಿಸಿದ 1 ಗಂಟೆಯ ನಂತರ ಚಹಾ ಸೇವಿಸುವುದು ಆರೋಗ್ಯಕ್ಕೆ ಹಿತಕರ.
