ಬೆಂಗಳೂರು : ಬುಧವಾರ ಮುಂಜಾನೆ ವಿಶ್ವದಾದ್ಯಂತ ಜನಪ್ರಿಯ ವಿಡಿಯೋ ಸ್ಟ್ರೀಮಿಂಗ್ ಪ್ಲಾಟ್ಫಾರ್ಮ್ ಆದ ‘ಯೂಟ್ಯೂಬ್’ (YouTube) ತಾಂತ್ರಿಕ ದೋಷದಿಂದಾಗಿ ಸ್ಥಗಿತಗೊಂಡಿದ್ದು, ಕೋಟ್ಯಂತರ ಬಳಕೆದಾರರು ತೊಂದರೆ ಅನುಭವಿಸಿದರು. ಪ್ರತಿದಿನ ಬೆಳಗ್ಗೆ ಎದ್ದ ತಕ್ಷಣ ಮೊಬೈಲ್ನಲ್ಲಿ ಭಕ್ತಿಗೀತೆಗಳನ್ನು ಕೇಳುವ ಅಥವಾ ಸುದ್ದಿಗಾಗಿ ಯೂಟ್ಯೂಬ್ ಅವಲಂಬಿಸಿರುವವರಿಗೆ ಈ ದಿಢೀರ್ ವ್ಯತ್ಯಯ ಬಿಗ್ ಶಾಕ್ ನೀಡಿದೆ.
ಬಳಕೆದಾರರು ಆಪ್ ಓಪನ್ ಮಾಡಿದ ಕೂಡಲೇ ಯಾವುದೇ ವಿಡಿಯೋಗಳು ಲಭ್ಯವಾಗದೆ, ‘ಸಮ್ಥಿಂಗ್ ವೆಂಟ್ ರಾಂಗ್’ (Something went wrong) ಎಂಬ ದೋಷದ ಸಂದೇಶ ಕಾಣಿಸಿಕೊಂಡಿದೆ. ಆರಂಭದಲ್ಲಿ ಅನೇಕರು ಇದು ತಮ್ಮ ವೈಯಕ್ತಿಕ ಇಂಟರ್ನೆಟ್ ಅಥವಾ ಮೊಬೈಲ್ ಸಮಸ್ಯೆ ಎಂದು ಭಾವಿಸಿದ್ದರು. ಆದರೆ, ಇದು ಜಾಗತಿಕವಾಗಿ ಎದುರಾದ ತಾಂತ್ರಿಕ ಸಮಸ್ಯೆಯಾಗಿತ್ತು. ಡೌನ್ ಡಿಟೆಕ್ಟರ್ (DownDetector) ವರದಿಯ ಪ್ರಕಾರ, ಕೇವಲ ಅಮೆರಿಕದಲ್ಲೇ ಸುಮಾರು 3,20,000 ಕ್ಕೂ ಹೆಚ್ಚು ಮಂದಿ ಈ ಸಮಸ್ಯೆಯ ಬಗ್ಗೆ ದೂರು ದಾಖಲಿಸಿದ್ದಾರೆ.
ಭಾರತದ ವಿವಿಧ ಭಾಗಗಳಲ್ಲೂ ಲಕ್ಷಾಂತರ ಜನರು ಯೂಟ್ಯೂಬ್ ಲೋಗೋ ಮಾತ್ರ ಕಾಣುತ್ತಿದ್ದು, ವಿಡಿಯೋ ಪ್ಲೇ ಆಗುತ್ತಿಲ್ಲ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಅಸಮಾಧಾನ ಹೊರಹಾಕಿದ್ದಾರೆ. ಸರ್ಚ್ ಎಂಜಿನ್ನಲ್ಲಿ ಯಾವುದೇ ಮಾಹಿತಿಯನ್ನು ಹುಡುಕಲು ಸಾಧ್ಯವಾಗದೆ ಇರುವುದು ಕಚೇರಿ ಕೆಲಸ ಮತ್ತು ಮನರಂಜನೆಗೆ ಅಡ್ಡಿಯುಂಟು ಮಾಡಿದೆ. ಪ್ರಸ್ತುತ ಯೂಟ್ಯೂಬ್ ತಂಡವು ಈ ಸಮಸ್ಯೆಯನ್ನು ಸರಿಪಡಿಸುವ ಕಾರ್ಯದಲ್ಲಿ ನಿರತವಾಗಿದೆ ಎಂದು ತಿಳಿದುಬಂದಿದೆ.
