ಹೊಸದಿಲ್ಲಿ: ಭಾರತದ ಹವಾಮಾನ ಮುನ್ಸೂಚನೆ ಕ್ಷೇತ್ರದಲ್ಲಿ ಬೃಹತ್ ತಂತ್ರಜ್ಞಾನ ಯುಗದ ಪ್ರಾರಂಭವಾಗಿದ್ದು, ಕೇಂದ್ರ ಸರ್ಕಾರ ಸೋಮವಾರ ನೂತನ “ಭಾರತ್ ಫೋರ್‌ಕಾಸ್ಟಿಂಗ್ ಸಿಸ್ಟಂ” (Bharat Forecasting System – BFS) ಅನ್ನು ಅಧಿಕೃತವಾಗಿ ಬಿಡುಗಡೆ ಮಾಡಲಿದೆ.
ಈ ಅತ್ಯಾಧುನಿಕ ವ್ಯವಸ್ಥೆಯನ್ನು ಪುಣೆಯ “ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟ್ರಾಪಿಕಲ್ ಮೀಟಿಯರಾಲಜಿ” (IITM) ಅಭಿವೃದ್ಧಿಪಡಿಸಿದ್ದು, ದೇಶದ ಹವಾಮಾನ ಸಂಶೋಧನೆ ಹಾಗೂ ಮುನ್ಸೂಚನೆ ವ್ಯವಸ್ಥೆಗೆ ಹೊಸ ದಿಕ್ಕು ನೀಡಲಿದೆ. ಇದರಲ್ಲಿ 66×6 ಕಿ.ಮೀ. ರೆಸಲ್ಯೂಶನ್ ಗ್ರಿಡ್ ಬಳಕೆಯಾಗುತ್ತಿದ್ದು, ಹಳೆಯ 12×12 ಕಿ.ಮೀ. ರೆಸಲ್ಯೂಶನ್‌ಗಿಂತ ಮುನ್ಸೂಚನೆಗಳನ್ನು ಹೆಚ್ಚು ನಿಖರವಾಗಿ ನೀಡಲಿದೆ.
ಈ ವ್ಯವಸ್ಥೆಯ ಭಾಗವಾಗಿರುವ “ಆರ್ಕ್” ಎಂಬ ಸೂಪರ್ ಕಂಪ್ಯೂಟರ್‌ನಲ್ಲಿ 11.77 ಪೆಟಾಫ್ಲಾಪ್ ಪ್ರೊಸೆಸಿಂಗ್ ಶಕ್ತಿ ಮತ್ತು 33 ಪೆಟಾಬೈಟ್‌ಗಳ ದತ್ತಾಂಶ ಸಂಗ್ರಹ ಸಾಮರ್ಥ್ಯವಿದೆ. ಹೀಗಾಗಿ ಹಿಂದಿನ “ಪ್ರತ್ಯುಷಾ ” ಸೂಪರ್ ಕಂಪ್ಯೂಟರ್‌ಗೆ ಬೇಕಾಗುವ 10 ಗಂಟೆಗಳ ಬದಲಿಗೆ ಕೇವಲ 4 ಗಂಟೆಗಳಲ್ಲಿ ದತ್ತಾಂಶ ವಿಶ್ಲೇಷಣೆ ಪೂರೈಸುವ ಸಾಮರ್ಥ್ಯ ಈ ವ್ಯವಸ್ಥೆಗೆ ಇದೆ.
ದೇಶದಾದ್ಯಂತ 40 ಡಾಪ್ಲರ್ ಹವಾಮಾನ ರಾಡಾರ್‌ಗಳ ಜಾಲದ ಮೂಲಕ ಸಂಗ್ರಹವಾಗುವ ಮಾಹಿತಿ ಬಳಸಿ, BFS ನಿಖರ ಹವಾಮಾನ ಮುನ್ಸೂಚನೆಗಳನ್ನು ನೀಡಲಿದ್ದು, ಪ್ರಕೃತಿ ವಿಕೋಪಗಳು, ಕೃಷಿ ನಿರ್ವಹಣೆ ಹಾಗೂ ಸಾರ್ವಜನಿಕ ಎಚ್ಚರಿಕೆಗಾಗಿ ಇದು ಭವಿಷ್ಯದಲ್ಲಿ ಬಹುಮುಖ್ಯ ಪಾತ್ರ ವಹಿಸಲಿದೆ.
ಭಾರತದ ಹವಾಮಾನ ವಿಜ್ಞಾನ ಕ್ಷೇತ್ರಕ್ಕೆ ಇದು ಮೈಲಿಗಲ್ಲಾಗಲಿದ್ದು, ಜಾಗತಿಕ ಮಟ್ಟದಲ್ಲಿಯೇ ಅತ್ಯಂತ ನಿಖರ ಮುನ್ಸೂಚನೆ ನೀಡುವ ವ್ಯವಸ್ಥೆಯಾಗಿ ಗುರುತಿಸಿಕೊಳ್ಳಲಿದೆ ಎಂದು ತಜ್ಞರು ಅಂದಾಜಿಸಿದ್ದಾರೆ.
