ಹೊಸದಿಲ್ಲಿ: ಭಾರತದ ಗಡಿ ಭದ್ರತಾ ಪಡೆ (BSF) ಪಾಕಿಸ್ಥಾನದ ವಿರುದ್ಧ ಜಮ್ಮು-ಕಾಶ್ಮೀರದ ಅಖ್ನೂರ್ ಕ್ಷೇತ್ರದಲ್ಲಿ ನಡೆಸಿದ ‘ಆಪರೇಷನ್ ಸಿಂದೂರ’ ಕಾರ್ಯಾಚರಣೆಯಲ್ಲಿ ಹೆಮ್ಮೆಯ ಸಾಹಸ ಪುಟ ಬರೆಯಲಾಗಿದೆ. ಪುರುಷ ಯೋಧರ ಜೊತೆಗೇ 7 ಮಹಿಳಾ ಯೋಧರ ತಂಡವು ಪಾಕಿಸ್ತಾನಿ ಶೆಲ್ ದಾಳಿಗೆ ಹೆದರದೆ ಮೂರು ದಿನ-ಮೂರು ರಾತ್ರಿ ಮುಂಚೂಣಿ ಶಿಬಿರಗಳನ್ನು ಯಶಸ್ವಿಯಾಗಿ ರಕ್ಷಿಸುವ ಮೂಲಕ ದೇಶದ ಗೌರವವನ್ನು ಎತ್ತಿ ಹಿಡಿದಿದೆ.
ಈ ತಂಡಕ್ಕೆ ನೇತೃತ್ವ ವಹಿಸಿದ್ದವರು ಸಹಾಯಕ ಕಮಾಂಡೆಂಟ್ ನೇಹಾ ಭಂಡಾರಿ. ಪಾಕ್ ದಾಳಿ ಆರಂಭವಾಗುತ್ತಿದ್ದಂತೆ, ಹಿರಿಯ ಅಧಿಕಾರಿಗಳು ಮಹಿಳಾ ಯೋಧರನ್ನು ಹಿಂದೆ ಸರಿಯುವಂತೆ ಸೂಚಿಸಿದರೂ, ನೇಹಾ ಮತ್ತು ತಂಡ ಧೈರ್ಯವಂತಿಕೆಯಿಂದ “ನಾವು ಹಿಂಜರಿಯಲ್ಲ” ಎಂದು ಸ್ಪಷ್ಟವಾಗಿ ನಿರಾಕರಿಸಿದರು. ಅವರ ಧೈರ್ಯಕ್ಕೆ ಮೇಲಾಧಿಕಾರಿಗಳೂ ಮೆಚ್ಚುಗೆ ವ್ಯಕ್ತಪಡಿಸಿದ್ದರು.
ಸಾಹಸ ಧೈರ್ಯದಿಂದ ನಿಂತ 7 ವೀರ ವನಿತೆಯರು :
ತಂಡದ ನೇತೃತ್ವ ವಹಿಸಿದ್ದ ಸಹಾಯಕ ಕಮಾಂಡೆಂಟ್ ನೇಹಾ ಭಂಡಾರಿ
ಪಂಜಾಬ್‌ನ ಮಂಜೀತ್ ಕೌರ್ ಮತ್ತು ಮಲ್ಕಿತ್ ಕೌರ್ — ಗೋಪುರ ಮತ್ತು ಬಂಕರ್‌ಗಳಲ್ಲಿ ನಿಗಾ
ಪಶ್ಚಿಮ ಬಂಗಾಳದ ಸ್ವಪ್ನಾ ರಥ್ ಮತ್ತು ಶಂಪಾ ಬಸಕ್
ಝಾರ್ಖಂಡ್‌ನ ಸುಮಿ ಕ್ಸೆಸ್
ಒಡಿಶಾದ ಜ್ಯೋತಿ ಬನಿಯಾನ್
ಈ ಮಹಿಳಾ ಸೈನಿಕರು ಪಾಕ್ ಶೆಲ್ ದಾಳಿ ವಿಫಲಗೊಳಿಸಿ, ಸಿಯಾಲ್‌ಟ್ ಪ್ರದೇಶದ ಶಿಬಿರಗಳನ್ನು ಪಾಕ್ ಸೈನಿಕರು ಬಿಟ್ಟು ಓಡಿಹೋಗುವಂತೆ ಮಾಡಿದರು. ಸಕ್ರೀಯ ಯುದ್ಧದಲ್ಲಿ ಮಹಿಳೆಯರ ಭಾಗವಹಿಸುವಿಕೆ ಭಾರತದ ಸೇನಾ ಇತಿಹಾಸದಲ್ಲಿ ಹೊಸ ಅಧ್ಯಾಯವಾಗಿದ್ದು, ಮುಂಚೂಣಿಯ ಕಾರ್ಯಾಚರಣೆಯಲ್ಲೂ ಮಹಿಳೆಯರು ಸಮರ್ಥರು ಎಂಬುದನ್ನು ಈ ಕಾರ್ಯಾಚರಣೆ ಸ್ಪಷ್ಟಪಡಿಸಿದೆ.
