ಟೆಹ್ರಾನ್: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ ಮತ್ತಷ್ಟು ದಟ್ಟವಾಗಿದ್ದು, ಇರಾನ್ನ ಪರಮಾಣು ನೆಲೆಗಳನ್ನು ಗುರಿಯಾಗಿಸಿಕೊಂಡು ಬೃಹತ್ ದಾಳಿ ನಡೆಸಲು ಅಮೆರಿಕ ಮತ್ತು ಇಸ್ರೇಲ್ ಜಂಟಿ ಸಿದ್ಧತೆ ನಡೆಸಿವೆ. 2003 ರ ಇರಾಕ್ ಆಕ್ರಮಣದ ನಂತರ ಅತಿ ದೊಡ್ಡ ಪ್ರಮಾಣದ ವಾಯುಪಡೆಯನ್ನು ಅಮೆರಿಕ ಈ ಪ್ರದೇಶದಲ್ಲಿ ಜಮಾವಣೆ ಮಾಡಿದೆ. ಅತ್ಯಾಧುನಿಕ 1, 2, 3 ಮತ್ತು 4 ನೇ ತಲೆಮಾರಿನ ಎಫ್-35, ಎಫ್-22, ಎಫ್-15 ಮತ್ತು ಎಫ್-16 ಯುದ್ಧ ವಿಮಾನಗಳ ಹಲವು ಸ್ಕ್ವಾಡ್ರನ್ಗಳು ಈಗಾಗಲೇ ನಿಯೋಜನೆಗೊಂಡಿವೆ.
ಜಿನೀವಾದಲ್ಲಿ ಪರಮಾಣು ನಿಯಂತ್ರಣಕ್ಕೆ ಸಂಬಂಧಿಸಿದ ರಾಜತಾಂತ್ರಿಕ ಮಾತುಕತೆಗಳು ವಿಫಲವಾದ ಹಿನ್ನೆಲೆಯಲ್ಲಿ ಈ ಮಿಲಿಟರಿ ಹೆಜ್ಜೆ ಇಡಲಾಗಿದೆ. ಕೇವಲ ವಾಯುಪಡೆ ಮಾತ್ರವಲ್ಲದೆ, ಸಮುದ್ರ ಮಾರ್ಗವಾಗಿಯೂ ಇರಾನ್ಗೆ ಬಿಸಿ ಮುಟ್ಟಿಸಲು ಅಮೆರಿಕದ 13 ಯುದ್ಧ ನೌಕೆಗಳು ಸಜ್ಜಾಗಿವೆ. ಇದರಲ್ಲಿ ಯುಎಸ್ಎಸ್ ಅಬ್ರಹಾಂ ಲಿಂಕನ್ ವಿಮಾನವಾಹಕ ನೌಕೆ ಹಾಗೂ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಹೊಡೆದುರುಳಿಸುವ 9 ವಿಧ್ವಂಸಕ ನೌಕೆಗಳು ಸೇರಿವೆ. ಈ ವಾರಾಂತ್ಯದಲ್ಲೇ ದಾಳಿ ನಡೆಯುವ ಸಾಧ್ಯತೆಗಳಿದ್ದು, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಂತಿಮ ಆದೇಶಕ್ಕಾಗಿ ಸೈನ್ಯ ಕಾಯುತ್ತಿದೆ. ಒಂದು ವೇಳೆ ದಾಳಿ ನಡೆದರೆ ಅದು ಈ ಹಿಂದಿನ ಸಂಘರ್ಷಗಳಿಗಿಂತಲೂ ತೀವ್ರ ಸ್ವರೂಪದ್ದಾಗಿರಲಿದ್ದು, ಇಡೀ ಮಧ್ಯಪ್ರಾಚ್ಯವನ್ನು ಯುದ್ಧದ ಬಾಯಿಗೆ ನೂಕುವ ಆತಂಕ ಎದುರಾಗಿದೆ.
