ನವದೆಹಲಿ : ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಹೊಸದಾಗಿ ಫಾಸ್ಟ್‌ಟ್ಯಾಗ್ ಆಧಾರಿತ ವಾರ್ಷಿಕ ಪಾಸ್ ಅನ್ನು ಪರಿಚಯಿಸಿದೆ. ಆಗಸ್ಟ್ 15, 2025ರಿಂದ ಜಾರಿಗೆ ಬರುವ ಈ ಹೊಸ ಯೋಜನೆಯು ಖಾಸಗಿ ವಾಹನಗಳಿಗೆ ಪ್ರತ್ಯೇಕವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಕೇಂದ್ರ ಸಚಿವ ನಿತಿನ್ ಗಡ್ಕರಿ ತಿಳಿಸಿದ್ದಾರೆ.
₹3,000ಕ್ಕೆ 1 ವರ್ಷ ಅಥವಾ 200 ಟ್ರಿಪ್‌ಗಳು!
ಈ ಪಾಸ್ ನಿಂದ ಕಾರು, ಜೀಪ್ ಹಾಗೂ ವ್ಯಾನ್ ಮಾದರಿಯ ಖಾಸಗಿ ವಾಹನಗಳು ದೇಶದಾದ್ಯಂತ ಟೋಲ್ ಪ್ಲಾಜಾಗಳಲ್ಲಿ ತೊಂದರೆರಹಿತವಾಗಿ ಸಂಚರಿಸಬಹುದು. ರೂ.3,000 ಪಾವತಿಸಿದರೆ ಒಂದು ವರ್ಷ ಅಥವಾ 200 ಬಾರಿ ಪ್ರಯಾಣ (ಯಾವುದು ಮೊದಲು ಸಾದ್ಯವಾಗುತ್ತದೆಯೋ ಅದು) ಮಾಡಲು ಅವಕಾಶ ದೊರೆಯಲಿದೆ.
ಪ್ರಯೋಜನಗಳು :
- ಈ ಪಾಸ್ ದೇಶದ ಎಲ್ಲಾ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸುಗಮ, ವೇಗದ, ದಟ್ಟಣೆ ರಹಿತ ಪ್ರಯಾಣಕ್ಕೆ ಸಹಾಯ ಮಾಡಲಿದೆ.
- ಇದರ ಮೂಲಕ ಟೋಲ್ ಪ್ಲಾಜಾಗಳಲ್ಲಿ ಕಾಯುವಿಕೆ ಕಡಿಮೆಯಾಗುವುದು, ಪಾವತಿ ವಿವಾದಗಳು ಮತ್ತು ಸಮಯದ ನಷ್ಟ ತಪ್ಪುವ ಸಾಧ್ಯತೆ ಇದೆ ಎಂದು ಗಡ್ಕರಿ ತಿಳಿಸಿದ್ದಾರೆ.
ಎಲ್ಲಿ ಲಭ್ಯ?
ಪಾಸ್ ಸಕ್ರಿಯಗೊಳಿಸಲು ಹಾಗೂ ನವೀಕರಿಸಲು NHAI, MoRTH ವೆಬ್‌ಸೈಟ್‌ಗಳು ಮತ್ತು ರಾಜಮಾರ್ಗ್ ಯಾತ್ರಾ ಅಪ್ಲಿಕೇಶನ್ ಮೂಲಕ ಶೀಘ್ರದಲ್ಲೇ ಲಿಂಕ್‌ಗಳನ್ನು ಬಿಡುಗಡೆ ಮಾಡಲಾಗುತ್ತದೆ.
60 ಕಿ.ಮೀ ವ್ಯಾಪ್ತಿಯಲ್ಲಿರುವ ಟೋಲ್ ಸಮಸ್ಯೆಗಳಿಗೆ ಪರಿಹಾರ :
ಸುತ್ತಲಿನ ಟೋಲ್ ಪ್ಲಾಜಾಗಳ ಬಗೆಯ ದೀರ್ಘಕಾಲದ ಸಮಸ್ಯೆಗಳಿಗೆ ಇದು ಪರಿಹಾರ ನೀಡಲಿದೆ. ವ್ಯವಹಾರ ಸರಳತೆ, ಸಮಯದ ದಕ್ಷತೆ, ಚಾಲಕರಿಗೆ ಅನುಕೂಲತೆ ಎಂಬ ಮುಖ್ಯ ಗುರಿಯನ್ನು ಈ ಯೋಜನೆ ಹೊಂದಿದೆ.
