ಬೆಂಗಳೂರು: ನಟ ಕಮಲ್ ಹಾಸನ್ ಅಭಿನಯದ ‘ಥಗ್ ಲೈಫ್’ ಸಿನಿಮಾವನ್ನು ಕರ್ನಾಟಕದಲ್ಲಿ ಬಿಡುಗಡೆ ಮಾಡದಂತೆ ಹೈಕೋರ್ಟ್ ತಾತ್ಕಾಲಿಕ ತಡೆ ನೀಡಿದ್ದು, ವಿವಾದ ಇತ್ಯರ್ಥವಾಗುವವರೆಗೆ ಸಿನಿಮಾ ಬಿಡುಗಡೆಗೆ ಅವಕಾಶವಿಲ್ಲ ಎಂದು ಆದೇಶಿಸಿದೆ.
ಚಿತ್ರದ ಬಿಡುಗಡೆಗೆ ಸಂಬಂಧಿಸಿದಂತೆ ಸಲ್ಲಿಕೆಯಾಗಿದ್ದ ರಿಟ್ ಅರ್ಜಿಯ ವಿಚಾರಣೆ ಜೂನ್ 3ರಂದು ಹೈಕೋರ್ಟ್ ಏಕಸದಸ್ಯ ಪೀಠದ ಮುಂದೆ ನಡೆಯಿತು. ವಿಚಾರಣೆ ವೇಳೆ, ನ್ಯಾಯಮೂರ್ತಿಗಳು ಮಧ್ಯಾಹ್ನ 2.30ರ ತನಕ ವಕೀಲರಿಗೆ ನಿಲುವು ಸ್ಪಷ್ಟಪಡಿಸಲು ಗಡುವು ನೀಡಿದ್ದರು. ಇದೀಗ ಕೋರ್ಟ್ ರಾಜ್ಯ ಸರ್ಕಾರದ ಅಡ್ವೊಕೆಟ್ ಜನರಲ್‌ಗೆ ಸೂಚನೆ ನೀಡಿ, ಮುಂದಿನ ವಿಚಾರಣೆಯನ್ನು ಜೂನ್ 10ಕ್ಕೆ ಮುಂದೂಡಿದೆ.
ಚಿತ್ರ ನಿರ್ಮಾಪಕರ ಪರ ವಕೀಲರಾದ ಧ್ಯಾನ್ ಚಿನ್ನಪ್ಪ ಅವರು, ಕಮಲ್ ಹಾಸನ್ ಫಿಲ್ಮ್ ಚೇಂಬರ್‌ಗೆ ಬರೆದ ಪತ್ರವನ್ನು ನ್ಯಾಯಾಧೀಶರ ಮುಂದೆ ಓದಿದ್ದರು. ಆದರೆ ಪತ್ರದಲ್ಲಿ ‘ಒಂದು ಪದ’ ಸೇರಬೇಕೆಂಬುದು ಮುಖ್ಯವಾಗಿದೆ ಎಂದು ನ್ಯಾಯಾಲಯ ತಿಳಿಸಿದ್ದು, “ಅವರು ಕ್ಷಮೆ ಕೇಳಿದರೆ ಎಲ್ಲಾ ಸರಿಯಾಗಬಹುದು” ಎಂಬ ಮಾತುಗಳನ್ನು ನ್ಯಾಯಾಧೀಶರಾದ ನಾಗಪ್ರಸನ್ನ ಹೇಳಿದ್ದಾರೆ. ಇದಕ್ಕೆ ಪ್ರತಿಯಾಗಿ ಚಿನ್ನಪ್ಪ ಅವರು, ಕಲಾವಿದನ ದೃಷ್ಟಿಕೋಣದಿಂದ ಪತ್ರ ಬರೆದಿದ್ದು, ಯಾವುದೇ ದುರುದ್ದೇಶ ಅವರಿಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
“ಜನರ ಭಾವನೆಗೆ ತುತ್ತಾಗುವಂಥ ವಿಚಾರಗಳಲ್ಲಿ ಎಚ್ಚರತೆ ಅಗತ್ಯ. ಕಮಲ್ ಹಾಸನ್ ಆಗಲಿ, ಯಾರೇ ಆಗಲಿ, ಜನರ ಭಾವನೆಗೆ ಧಕ್ಕೆ ಉಂಟುಮಾಡಬಾರದು” ಎಂದು ನ್ಯಾಯಾಲಯ ತೀವ್ರವಾಗಿ ಎಚ್ಚರಿಕೆ ನೀಡಿದೆ.
ಚಿತ್ರದ ನಿರ್ಮಾಪಕರು ಕೂಡ, ವಿಚಾರಣೆ ಅಂತಿಮವಾಗುವವರೆಗೆ ‘ಥಗ್ ಲೈಫ್’ ಸಿನಿಮಾ ಕರ್ನಾಟಕದಲ್ಲಿ ಬಿಡುಗಡೆ ಮಾಡುವುದಿಲ್ಲ ಎಂಬ ತೀರ್ಮಾನಕ್ಕೆ ಬಂದಿದ್ದು, ನ್ಯಾಯಾಲಯದ ಸಲಹೆಯಂತೆ ವಿಚಾರಣೆ ಪೂರ್ಣವಾಗುವವರೆಗೆ ತಾಳ್ಮೆಯಿಂದ ನಡೆದುಕೊಳ್ಳಲು ನಿರ್ಧರಿಸಿದ್ದಾರೆ.
