ಹೆಬ್ರಿ : ಹೆಬ್ರಿ ರಾಮ ಮಂಟಪದ ಗಣಪತಿ ಸನ್ನಿಧಿಯಲ್ಲಿ 5 ದಿನ ತ್ರಿಕಾಲ ಮಹಾಪೂಜೆ , 48 ನಾರಿಕೇಳ ಗಣಯಾಗ , ರಂಗ ಪೂಜೆ ಇತ್ಯಾದಿ ಸೇವಾದಿಗಳು ವೇದ ಮೂರ್ತಿ ನಾಗರಾಜ್ ಜೋಯಿಸ್ ರವರ ನೇತೃತ್ವದಲ್ಲಿ ನಡೆದವು .
ಪ್ರಸನ್ನ ಬಲ್ಲಾಳ್ ಸಂಸ್ಮರಣಾ ವೇದಿಕೆಯಲ್ಲಿ ನಾಡಿನ ಪ್ರಸಿದ್ಧ ತಂಡದ ತುಳು ನಾಟಕ , ಮಸ್ತ್ ಮ್ಯಾಜಿಕ್, ಯಕ್ಷಗಾನ ಪ್ರದರ್ಶನ , ಸಾಂಸ್ಕೃತಿಕ ನೃತ್ಯ ಪ್ರದರ್ಶನ, ಭಕ್ತಿ ಸಂಗೀತ – ಭಜನಾಮೃತ , ಯಕ್ಷ ಗಾನ ವೈಭವ ಯಕ್ಷಾಮೃತ ನೆರೆದ ಕಲಾಭಿಮಾನಿಗಳ ಮನೆಸೂರೆಗೊಂಡಿತು ಮತ್ತು ಸರಣಿ ಕ್ರೀಡಾ , ಸಾಂಸ್ಕೃತಿಕ ಸ್ಪರ್ಧೆಗಳಲ್ಲಿ ವಿಜೇತರನ್ನು ಬಹುಮಾನ ನೀಡಿ ಪುರಸ್ಕರಿಸಲಾಯಿತು . 5 ದಿನಗಳ ಕಾಲ ನಡೆದ ಅನ್ನ ಸಂತರ್ಪಣೆಯಲ್ಲಿ ಸಹಸ್ರಾರು ಭಕ್ತರು ಅನ್ನ ಪ್ರಸಾದ ಸ್ವೀಕರಿಸಿದರು.
ಅಪರಾಹ್ನ ನಡೆದ ಸಮಾರೋಪ ಸಮಾರಂಭದಲ್ಲಿ ಡಾ.ಪ್ರದೀಪ್ ಕುಮಾರ್ ಹೆಬ್ರಿ ಇವರಿಗೆ ಸುವರ್ಣ ಪುರಸ್ಕಾರ ಗೌರವ ನೀಡಲಾಯಿತು . ಗೌರವ ಸ್ವೀಕರಿಸಿ ಮಾತನಾಡಿದ ಡಾ.ಪ್ರದೀಪ್ ಕುಮಾರ್ ಹೆಬ್ರಿಯವರು ವಿಧ್ಯಾರ್ಥಿಗಳು ಸೃಜನಾತ್ಮಕವಾಗಿ ರೂಪುಗೊಳ್ಳುವ ಕಾರ್ಯಕ್ರಮಗಳನ್ನು ಸಮಿತಿ ಹಮ್ಮಿಕೊಂಡು ಆ ಮೂಲಕ ಯುವಕರು ಸಮಾಜದ ಆಸ್ತಿಯಾಗಿ ಬೆಳೆಯಲು ಸಾಧ್ಯವಿದೆ ಎಂದು ತಿಳಿಸಿದರು.
ಸಮಾರಂಭದಲ್ಲಿ ಮಾಜಿ ಲೋಕಾಯುಕ್ತ ನ್ಯಾ ಸಂತೋಷ್ ಹೆಗ್ಡೆ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಮಾತಾನಾಡಿ ಮಾನವ ಮೊದಲು ಮಾನವೀಯತೆ ರೂಡಿಸಿಕೊಳ್ಳಬೇಕು ಮತ್ತು ದುರಾಸೆಯಿಂದ ಹೊರಬಂದು ತೃಪ್ತ ಜೀವನ ಸಾಗಿಸಲು ಸಾಧ್ಯವೆಂದು ತಿಳಿಸಿದರು.
ಸಮಿತಿಯ ಸ್ಥಾಪಕ ಅಧ್ಯಕ್ಷರಾದ ಅಮರನಾಥ್ ಹೆಗ್ಡೆ ಮತ್ತು ಕಾರ್ಯದರ್ಶಿ ಮೋಹನದಾಸ್ ನಾಯಕ್, ಸ್ಥಾಪಕ ಸದಸ್ಯರುಗಳನ್ನು ಗೌರವಿಸಲಾಯಿತು. ಸಮಿತಿಯ ಪ್ರಗತಿಗೆ ದುಡಿದು ಕೀರ್ತಿಶೇಷರಾದ ಹೆಸರಲ್ಲಿ ನೀಡುವ ಸುವರ್ಣ ಸ್ಮೃತಿ ಗೌರವವನ್ನು ಅಗಲಿದ ಮಹನೀಯರ ಕುಟುಂಬದ ಸದಸ್ಯರಿಗೆ ನೀಡಿ ಗೌರವಿಸಲಾಯಿತು. ದಾನಿಗಳನ್ನು ಸಮಿತಿಯ ಉಪಾಧ್ಯಕ್ಷರು , ಪದಾಧಿಕಾರಿಗಳನ್ನು, ಉಪ ಸಮಿತಿಯ ಸಂಚಾಲಕರು, ಸದಸ್ಯರುಗಳನ್ನು ಗೌರವಿಸಲಾಯಿತು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದ ಸುವರ್ಣ ಸಂಭ್ರಮ ಶ್ರೀ ಗಣೇಶೋತ್ಸವ ಸಮಿತಿ ಅಧ್ಯಕ್ಷ ಜನಾರ್ಧನ್ ಎಚ್ ರವರು ಮಾತಾನಾಡಿ ಹೆಬ್ರಿಯ ಸರ್ವರ ಸಹಕಾರ ಮತ್ತು ಪಾಲ್ಗೊಳ್ಳುವಿಕೆಯೊಂದಿಗೆ ಗಣೇಶೋತ್ಸವ ಯಶಸ್ವಿಯಾಗಿದ್ದು ನಿಮ್ಮ ಸಹಕಾರ ಮುಂದಿನ ದಿನಗಳಲ್ಲಿಯೂ ಹೀಗೆ ಇರಲಿ ಎಂದು ವಿನಂತಿದರು. ಜನಾರ್ಧನ್ ಎಚ್ ಅಧ್ಯಕ್ಷರು ಇವರನ್ನು ಹಾರ್ಧಿಕವಾಗಿ ಅಭಿನಂದಿಸಲಾಯಿತು.
ನಂತರ ನಡೆದ ಆಕರ್ಷಕ ಪುರ ಮೆರವಣಿಗೆಯಲ್ಲಿ ಕೊಂಬು , ಚೆಂಡೆ , ನಾಸಿಕ್ ಬ್ಯಾಂಡ್, ಕೀಲು ಕುದುರೆ , ಕೇರಳ ಸ್ಥಬ್ದ ಚಿತ್ರಗಳು , ಕೀಲು ಕುದುರೆ , ನಂದಿ , ಉಗ್ರ ನರಸಿಂಹ , ಹನುಮಂತ , ಆನೆ ಹೀಗೆ 17 ಕಲಾ ತಂಡಗಳು ಭಾಗವಹಿಸಿದ್ದರು. ಪ್ರಸಾದ್ ಶೆಟ್ಟಿ ಕಾರ್ಯಕ್ರಮ ನಿರ್ವಹಿಸಿ , ಪ್ರಧಾನ ಕಾರ್ಯದರ್ಶಿ ರಾಜೇಶ್ ಆಚಾರ್ಯ ಧನ್ಯವಾದ ಸಲ್ಲಿಸಿದರು.
