ನವದೆಹಲಿ : ಅಮೆರಿಕದ ಆಂತರಿಕ್ಷ ತಂತ್ರಜ್ಞಾನ ಕ್ಷೇತ್ರದ ಅಗ್ರಗಣ್ಯ ಸಂಸ್ಥೆ ಸ್ಪೇಸ್ ಎಕ್ಸ್‌ಗೆ ಸೇರಿದ ಎಲಾನ್ ಮಸ್ಕ್ ಅವರ ಸ್ಟಾರ್ ಲಿಂಕ್ ಸಂಸ್ಥೆಗೆ ಭಾರತದಲ್ಲಿ ಸೆಟಲೈಟ್ ಕಮ್ಯೂನಿಕೇಶನ್ ಸೇವೆ ನೀಡಲು ದೂರಸಂಪರ್ಕ ಇಲಾಖೆಯಿಂದ (DoT) ಪರವಾನಿಗೆ ನೀಡಲಾಗಿದೆ ಎಂದು ಪಿಟಿಐ ವರದಿ ತಿಳಿಸಿದೆ.
ಇದರಿಂದ ಭಾರತದಲ್ಲಿ ಸೆಟಲೈಟ್ ಮೂಲಕ ಇಂಟರ್ನೆಟ್ ಸೇವೆ ನೀಡಲು ಅನುಮತಿ ಪಡೆದ ಮೂರನೇ ಕಂಪನಿಯಾಗಿ ಸ್ಟಾರ್ ಲಿಂಕ್ ಹೊರಹೊಮ್ಮಿದೆ. ಈಗಾಗಲೇ 2022ರಿಂದಲೇ ಈ ಸೇವೆ ನೀಡಲು ಸ್ಟಾರ್ ಲಿಂಕ್ ಪ್ರಯತ್ನಿಸುತ್ತಿತ್ತು. ಆದರೆ ರಾಷ್ಟ್ರೀಯ ಭದ್ರತಾ ಅಂಶದ ಪರಿಶೀಲನೆಯ ಹಿನ್ನೆಲೆಯಲ್ಲಿ ಲೈಸೆನ್ಸ್ ನಿರ್ಧಾರ ವಿಳಂಬವಾಗಿತ್ತು ಎಂದು ಮೂಲಗಳು ತಿಳಿಸಿವೆ.
ಡಿಓಟಿ ಮೂಲಗಳ ಪ್ರಕಾರ, ಕಂಪನಿಗೆ 15-20 ದಿನಗಳೊಳಗೆ ಪ್ರಾಯೋಗಿಕ ತರಂಗಾಂತರ ಹಂಚಿಕೆ (trial spectrum allocation) ಕೂಡಾ ನೀಡಲಾಗಲಿದೆ.
ಇದರ ಜೊತೆಗೆ, ಅಮೆಜಾನ್ ಸಂಸ್ಥೆಯ ಕೈಪರ್ ಯೋಜನೆ ಕೂಡಾ ಲೈಸೆನ್ಸ್ ನಿರೀಕ್ಷೆಯಲ್ಲಿ ಇದ್ದು, ಭಾರತದಲ್ಲಿ ಸೆಟಲೈಟ್ ಇಂಟರ್ನೆಟ್ ಸ್ಪರ್ಧೆ ತೀವ್ರವಾಗಲಿದೆ ಎನ್ನಬಹುದು.
ಈ ಹಿಂದೆ 2025ರ ಮಾರ್ಚ್‌ನಲ್ಲಿ, ಭಾರ್ತಿ ಏರ್‌ಟೆಲ್ ಸ್ಟಾರ್ ಲಿಂಕ್ ಸಹಿತ ಸ್ಪೇಸ್ ಎಕ್ಸ್ ಜತೆಗೆ ಸಹಭಾಗಿತ್ವ ಮಾಡಿಕೊಂಡು, ಭಾರತದಲ್ಲಿ ಹೈಸ್ಪೀಡ್ ಇಂಟರ್ನೆಟ್ ಸೇವೆ ಆರಂಭಿಸಲು ಉದ್ದೇಶಿಸಿದ್ದಾಗಿ ಘೋಷಿಸಿತ್ತು. ಆದರೆ ಆ ಒಪ್ಪಂದವನ್ನು ಕಾರ್ಯರೂಪಕ್ಕೆ ತರುವ ಮೊದಲು ಭಾರತೀಯ ಸರ್ಕಾರದ ಪರವಾನಿಗೆ ಪಡೆಯುವುದು ಅನಿವಾರ್ಯವಾಗಿತ್ತು.
ಇದರ ಬೆನ್ನಲ್ಲೇ, ರಿಲಯನ್ಸ್ ಜಿಯೋ ಕೂಡಾ ಸ್ಟಾರ್ ಲಿಂಕ್ ಜೊತೆ ಸಹಯೋಗ ಹೊಂದಲು ಮುಂದಾಗಿದೆ ಎಂದು ಮೂಲಗಳು ತಿಳಿಸಿವೆ.
