ಹಾವೇರಿ : ಮಾತೆಂದರೆ ಮಮತೆಗೂ ಮೀರಿದ ಭಾವನೆ. ಆದರೆ ಶಿಗ್ಗಾಂವಿಯಲ್ಲಿ ನಡೆದ ಈ ಘಟನೆ ತಾಯಿ–ಮಗ ಸಂಬಂಧಕ್ಕೂ ಅಪವಾದವಾಗಿದೆ. ತಾಯಿ ಜೀವಂತ ಇರುವಾಗಲೇ ಆಕೆ ಸಾವಿನ ಪ್ರಮಾಣಪತ್ರ ಪಡೆದು, ಆಸ್ತಿಯನ್ನು ತನ್ನ ಹೆಸರಿಗೆ ಪಡೆಯಲು ಯತ್ನಿಸಿದ ಪುತ್ರನನ್ನು ಶಿಗ್ಗಾಂವಿಯ ಪೊಲೀಸರು ಬಂಧಿಸಿದ್ದಾರೆ.
ಶೌಕತ್ ಅಲಿ (39) ಬಂಧಿತ ಆರೋಪಿ. ಈತ ಹುಬ್ಬಳ್ಳಿಯಲ್ಲಿ ಪತ್ನಿಯೊಂದಿಗೆ ಕಳೆದ 10 ವರ್ಷಗಳಿಂದ ವಾಸಿಸುತ್ತಿದ್ದನು. ಆದರೆ ಶಿಗ್ಗಾಂವಿಯಲ್ಲಿ ಈತನ ತಾಯಿ ಹೂರಾಂಬಿ ಜಂಗ್ಲಿ ಸಾಬ್ ಅವರ ಹೆಸರಿನಲ್ಲಿ ಇದ್ದ 2 ಎಕರೆ ಜಮೀನು ಜಂಟಿ ಖಾತೆಯಲ್ಲಿದ್ದು, ಅದನ್ನು ಸಂಪೂರ್ಣವಾಗಿ ತನ್ನದಾಗಿಸಿಕೊಳ್ಳಲು ಇವನು ಮಾಯಾಜಾಲ ಹರಡಿದ್ದ.
ತಮ್ಮ ಮರಣ ಪ್ರಮಾಣಪತ್ರ ಪಡೆಯಲು ಈತ ಪುರಸಭೆಯಲ್ಲಿ ಸುಳ್ಳು ದಾಖಲೆಗಳನ್ನು ಸಲ್ಲಿಸಿದ್ದಾನೆ. ಪುರಸಭೆ ಅಧಿಕಾರಿಯೊಬ್ಬರು ಈ ಮರಣ ಪ್ರಮಾಣಪತ್ರವನ್ನು ನೀಡಿದ್ದು, ಅವರ ವಿರುದ್ಧವೂ ನೋಟಿಸ್ ಜಾರಿ ಮಾಡಲಾಗಿದೆ.
ಇದಾದ ಬಳಿಕ ತಾಯಿ ಬದುಕಿದ್ದರೂ ತನ್ನ ಹೆಸರು ಮರಣ ಪ್ರಮಾಣಪತ್ರದಲ್ಲಿ ಇರುವುದನ್ನು ಕಂಡು ಪೊಲೀಸರಿಗೆ ದೂರು ನೀಡಿದ್ದಾರೆ. ಪೋಲಿಸ್ ಠಾಣೆಯಲ್ಲಿ ಶೌಕತ್ ಅಲಿ ವಿರುದ್ಧ ಕೇಸು ದಾಖಲಾಗಿದ್ದು ತನಿಖೆ ನಡೆಯುತ್ತಿದೆ.
