ಶಿವಮೊಗ್ಗ: ನಗರದ ಸ್ವಚ್ಛತೆಯನ್ನು ಕಾಪಾಡುವಲ್ಲಿ ನಿರ್ಲಕ್ಷ್ಯ ವಹಿಸಿ, ಸಾರ್ವಜನಿಕರ ಸುಗಮ ಸಂಚಾರಕ್ಕೆ ಅಡ್ಡಿಪಡಿಸಿದ ಎಳನೀರು ವ್ಯಾಪಾರಿಯೊಬ್ಬರಿಗೆ ಶಿವಮೊಗ್ಗ ಮಹಾನಗರ ಪಾಲಿಕೆಯ ಅಧಿಕಾರಿಗಳು ವಿಭಿನ್ನ ರೀತಿಯಲ್ಲಿ ಬಿಸಿ ಮುಟ್ಟಿಸಿದ್ದಾರೆ. ಪದೇ ಪದೇ ಸೂಚನೆ ನೀಡಿದರೂ ಬದಲಾಗದ ವ್ಯಾಪಾರಿಯ ಜಾಗಕ್ಕೆ ಕಸವನ್ನೇ ಸುರಿಯುವ ಮೂಲಕ ಅಧಿಕಾರಿಗಳು ಶಿಸ್ತುಕ್ರಮ ಜರುಗಿಸಿದ್ದಾರೆ.
ಘಟನೆಯ ವಿವರ: ನಗರದ ಶುಭಮಂಗಳ ಕಲ್ಯಾಣ ಮಂದಿರದ ಮುಂಭಾಗವಿರುವ ಖಾಲಿ ಪ್ರದೇಶದಲ್ಲಿ ವ್ಯಕ್ತಿಯೊಬ್ಬರು ಎಳನೀರು ವ್ಯಾಪಾರ ಮಾಡುತ್ತಿದ್ದರು. ವ್ಯಾಪಾರವಾದ ನಂತರ ಉಳಿಯುತ್ತಿದ್ದ ಎಳನೀರು ಸಿಪ್ಪೆ ಹಾಗೂ ಬುರುಡೆಗಳನ್ನು ಅವರು ಅಲ್ಲೇ ಬಿಟ್ಟು ತೆರಳುತ್ತಿದ್ದರು. ದಿನಕಳೆದಂತೆ ಆ ಪ್ರದೇಶವು ಕಸದ ರಾಶಿಯಿಂದ ತಿಪ್ಪೆಯಂತಾಗಿ ಮಾರ್ಪಟ್ಟಿತ್ತು. ಎಳನೀರಿನ ಗಂಜಿಯನ್ನು ತಿನ್ನಲು ಸಾಕುಪ್ರಾಣಿಗಳು ಇಲ್ಲಿ ಜಮಾಯಿಸುತ್ತಿದ್ದರಿಂದ, ಕಸವು ರಸ್ತೆಯ ಉದ್ದಕ್ಕೂ ಹರಡಿ ಪರಿಸರ ಸಂಪೂರ್ಣವಾಗಿ ಹದಗೆಟ್ಟಿತ್ತು.
ಅಪಘಾತ ಮತ್ತು ದೂರು: ಈ ಕಸದ ರಾಶಿಯಿಂದಾಗಿ ರಸ್ತೆ ಸಂಚಾರಕ್ಕೆ ತೊಂದರೆಯುಂಟಾಗಿತ್ತು. ಇತ್ತೀಚೆಗೆ ಬೈಕ್ ಸವಾರರೊಬ್ಬರು ಈ ತ್ಯಾಜ್ಯದ ಮೇಲೆ ಜಾರಿ ಬಿದ್ದು ಗಾಯಗೊಂಡಿದ್ದರು. ಈ ಕುರಿತು ವ್ಯಾಪಾರಿಗೆ ಸ್ಥಳೀಯರು ಮತ್ತು ಪಾಲಿಕೆ ಸಿಬ್ಬಂದಿ ಹಲವಾರು ಬಾರಿ ಎಚ್ಚರಿಕೆ ನೀಡಿದ್ದರೂ, ಅವರು ಸ್ವಚ್ಛತೆಯ ಬಗ್ಗೆ ತಲೆಕೆಡಿಸಿಕೊಂಡಿರಲಿಲ್ಲ. ಇದರಿಂದ ಆಕ್ರೋಶಗೊಂಡ ಸಾರ್ವಜನಿಕರು ಮಹಾನಗರ ಪಾಲಿಕೆಗೆ ಅಧಿಕೃತವಾಗಿ ದೂರು ನೀಡಿದ್ದರು.
ಅಧಿಕಾರಿಗಳ ದಿಢೀರ್ ಕ್ರಮ: ಸಾರ್ವಜನಿಕರ ದೂರಿನನ್ವಯ ಕಾರ್ಯಪ್ರವೃತ್ತರಾದ ಪಾಲಿಕೆ ಅಧಿಕಾರಿಗಳು, ವ್ಯಾಪಾರಿಗೆ ನೇರವಾಗಿ ಪಾಠ ಕಲಿಸಲು ನಿರ್ಧರಿಸಿದರು. ಅವರು ಸಂಗ್ರಹಿಸಿದ್ದ ಕಸದ ರಾಶಿಯನ್ನು ಅವರ ವ್ಯಾಪಾರದ ಜಾಗದಲ್ಲೇ ಸುರಿದು ಬುದ್ಧಿ ಕಲಿಸಿದರು. ಅಧಿಕಾರಿಗಳ ಈ ಖಡಕ್ ನಡೆಯಿಂದ ಕಂಗಾಲಾದ ವ್ಯಾಪಾರಿಯು, ಕೂಡಲೇ ತನ್ನ ತಪ್ಪನ್ನು ಒಪ್ಪಿಕೊಂಡು ಸ್ಥಳವನ್ನು ಸ್ವಚ್ಛಗೊಳಿಸಲು ಮುಂದಾಗಿದ್ದಾನೆ. ಮುಂದಿನ ದಿನಗಳಲ್ಲಿ ನಗರದ ಸ್ವಚ್ಛತೆಗೆ ದಕ್ಕೆ ತಂದರೆ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಅಧಿಕಾರಿಗಳು ಈ ಮೂಲಕ ಎಚ್ಚರಿಸಿದ್ದಾರೆ.
