ಬೆಂಗಳೂರು: ರಾಜ್ಯದ ಸರ್ಕಾರಿ, ಅನುದಾನಿತ ಹಾಗೂ ಅನುದಾನರಹಿತ ಪ್ರಾಥಮಿಕ ಮತ್ತು ಪ್ರೌಢಶಾಲೆಗಳ 2025-26ನೇ ಶೈಕ್ಷಣಿಕ ವರ್ಷದ ವೇಳಾಪಟ್ಟಿಯನ್ನು ಶಾಲಾ ಶಿಕ್ಷಣ ಇಲಾಖೆ ಪ್ರಕಟಿಸಿದೆ. ಮೇ 29ರಿಂದ ಶಾಲೆಗಳು ಪುನರಾರಂಭವಾಗಲಿದ್ದು, ಮೊದಲ ಅವಧಿ ಸೆಪ್ಟೆಂಬರ್ 19ರ ತನಕ ಇರಲಿದೆ. ದಸರಾ ರಜೆ ಸೆಪ್ಟೆಂಬರ್ 20ರಿಂದ ಅಕ್ಟೋಬರ್ 7ರವರೆಗೆ ಘೋಷಿಸಲಾಗಿದೆ. ಎರಡನೇ ಅವಧಿ ಅಕ್ಟೋಬರ್ 8ರಿಂದ ಏಪ್ರಿಲ್ 10ರವರೆಗೆ ಇರುತ್ತದೆ. ಬೇಸಿಗೆ ರಜೆ ಏಪ್ರಿಲ್ 28ರಿಂದ ಆರಂಭವಾಗಲಿದೆ.
ಒಟ್ಟು ಶೈಕ್ಷಣಿಕ ವರ್ಷದಲ್ಲಿ 365 ದಿನಗಳ ಪೈಕಿ 123 ದಿನ ರಜೆಗಳು, 242 ದಿನ ಶಾಲಾ ಕರ್ತವ್ಯದ ದಿನಗಳಾಗಿರಲಿವೆ. ಈ 242 ದಿನಗಳಲ್ಲಿ:
- 178 ದಿನ ಕಲಿಕಾ ದಿನಗಳಾಗಿ,
- 26 ದಿನ ಪರೀಕ್ಷೆ ಹಾಗೂ ಮೌಲ್ಯಮಾಪನ ಕಾರ್ಯಕ್ಕಾಗಿ,
- 22 ದಿನ ಪಠ್ಯೇತರ ಚಟುವಟಿಕೆಗಳಿಗಾಗಿ,
- 10 ದಿನ ಫಲಿತಾಂಶ ವಿಶ್ಲೇಷಣೆಗೆ,
- 4 ದಿನ ಸ್ಥಳೀಯ ರಜೆಗಳಿಗೆ ಮೀಸಲಿಡಲಾಗಿದೆ.
ಅದೇ ವೇಳೆ, 2025ರ ಏಪ್ರಿಲ್ 8ರಂದು ಪ್ರಾಥಮಿಕ ಶಾಲೆಗಳಲ್ಲಿ ಹಾಗೂ ಏ.9ರಂದು ಪ್ರೌಢಶಾಲೆಗಳಲ್ಲಿ ಪೋಷಕರ ಸಭೆ ಹಾಗೂ ಫಲಿತಾಂಶ ಪ್ರಕಟಣೆ ನಡೆಯಲಿದೆ. ಏ.14ರಂದು ಡಾ. ಬಿ.ಆರ್. ಅಂಬೇಡ್ಕರ್ ಜಯಂತಿಯನ್ನು ಎಲ್ಲಾ ಶಾಲೆಗಳಲ್ಲಿ ಆಚರಿಸುವಂತೆ ಸೂಚಿಸಲಾಗಿದೆ.
