ಶಿವಮೊಗ್ಗ:“ಒಬ್ಬನ ಹತ್ಯೆಗೆ ಪ್ರತೀಕಾರವಾಗಿ ಮತ್ತೊಬ್ಬನ ಹತ್ಯೆ ನಡೆಯುವಂತಾ ಪರಿಸ್ಥಿತಿ ಬಂದರೆ, ಸಮಾಜದಲ್ಲಿ ಬದುಕುವುದೇ ಕಷ್ಟವಾಗುತ್ತದೆ,” ತಾವು ಶಿಸ್ತು ಹಾಗೂ ಶಾಂತಿಯ ಸ್ಥಾಪನೆಗೆ ಕಟಿಬದ್ಧ ಎಂದು ಹೇಳಿಕೊಂಡಿರುವ ಸಚಿವ ದಿನೇಶ್ ಗುಂಡೂರಾವ್, ಕೋಮುವಾದದ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “ಶಿವಮೊಗ್ಗದಲ್ಲಿ ಕೊಲೆಯಾಗಿರುವ ಸುಹಾಸ್ ಶೆಟ್ಟಿ ಒಬ್ಬ ರೌಡಿಶೀಟರ್ ಆಗಿದ್ದು, ಎರಡು ಕೊಲೆ ಪ್ರಕರಣಗಳಲ್ಲಿ ಭಾಗಿಯಾಗಿದ್ದ. ಈಗ ಆತನ ಹತ್ಯೆಯ ಪ್ರತೀಕಾರವಾಗಿ ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳದಲ್ಲಿ ಅಬ್ದುಲ್ ರೆಹಮಾನ್ ಹತ್ಯೆ ಮಾಡಲಾಗಿದೆ. ಮತ್ತೊಬ್ಬ ವ್ಯಕ್ತಿ ಗಾಯಗೊಂಡಿದ್ದಾರೆ. ಇಂಥ ಪ್ರತೀಕಾರದ ಸರಣಿಯಿಂದ ಸಮಾಜದಲ್ಲಿ ಅಶಾಂತಿ ಏರ್ಪಡುತ್ತಿದೆ,” ಎಂದು ಹೇಳಿದ್ದಾರೆ.
ಪೊಲೀಸರ ತನಿಖೆ ಪ್ರಗತಿಯಲ್ಲಿದೆ:
“ಕೊಲೆ ಆರೋಪಿಗಳ ಬಗ್ಗೆ ಪ್ರಾಥಮಿಕ ಸುಳಿವು ಪೊಲೀಸರಿಗೆ ದೊರಕಿದ್ದು, ಶೀಘ್ರದಲ್ಲೇ ಬಂಧನ ನಡೆಯಲಿದೆ. ತನಿಖೆಯ ನಂತರವೇ ನಿಖರ ಮಾಹಿತಿ ಲಭ್ಯವಾಗಲಿದೆ,” ಎಂದು ಗುಂಡೂರಾವ್ ತಿಳಿಸಿದರು.
ಕೋಮುವಾದಿ ವಾತಾವರಣಕ್ಕೆ ಸಂಘ ಪರಿವಾರವೇ ಕಾರಣ:
“ದಕ್ಷಿಣ ಕನ್ನಡದಲ್ಲಿ ಕೋಮುವಾದದ ವಾತಾವರಣ ಕಟ್ಟುವ ಕೆಲಸಕ್ಕೆ ಬಿಜೆಪಿ ಹಾಗೂ ಸಂಘ ಪರಿವಾರದ ಸಂಘಟನೆಗಳು ಕಾರಣವಾಗಿವೆ. ಒಂದು ಶವ ಸಿಕ್ಕರೂ ರಾಜಕೀಯ ಮಾಡುವುದು ಇವರ ಧೋರಣೆ. ಅವರು ಮುಸಲ್ಮಾನರು ಎಂದರೆ ನಕಾರಾತ್ಮಕ ನೋಟದಿಂದಲೇ ನೋಡುತ್ತಾರೆ. ಇದರಿಂದ ಸಮಾಜದಲ್ಲಿ ತಾರತಮ್ಯ ಹಾಗೂ ಅಶಾಂತಿ ಹುಟ್ಟುತ್ತಿದೆ,” ಎಂದು ಅವರು ಟೀಕಿಸಿದರು.
ಬರ್ಬರ ಹತ್ಯೆ ಖಂಡನೀಯ:
“ಇದು ಅಮಾನವೀಯ ಹಾಗೂ ಬರ್ಬರ ಹತ್ಯೆ. ಇಂಥ ಕೃತ್ಯಗಳು ಸಮಾಜದಲ್ಲಿ ಭಯ ಹಾಗೂ ಭದ್ರತೆ ಕೊರತೆಯ ಪರಿಸ್ಥಿತಿ ನಿರ್ಮಿಸುತ್ತವೆ. ಸಮಾಜದ ಮನಸ್ಸನ್ನು ಪರಿವರ್ತಿಸಬೇಕಾಗಿದೆ . ಹತ್ಯೆ ಮಾಡಿದವರು ಯಾರು ಎಂಬುದು ಪ್ರಮುಖವಲ್ಲ, ಕಾನೂನು ತಪ್ಪಿದರೆ ಶಿಕ್ಷೆಯೂ ತಪ್ಪದು,” ಎಂದು ಸ್ಪಷ್ಟಪಡಿಸಿದರು.
ಟಾಸ್ಕ್‌ ಫೋರ್ಸ್ ರಚನೆಗೆ ಸರ್ಕಾರ ಸಜ್ಜು:
“ದಕ್ಷಿಣ ಕನ್ನಡದಲ್ಲಿ ಈಗಾಗಲೇ ಸೆಕ್ಷನ್ 144 ಜಾರಿಯಲ್ಲಿದೆ. ವಿಶೇಷ ಟಾಸ್ಕ್‌ ಫೋರ್ಸ್ ರಚನೆಯ ಬಗ್ಗೆ ಚಿಂತನೆ ನಡೆಯುತ್ತಿದೆ. ಆ್ಯಂಟಿ ಕಮ್ಯೂನಲ್ ಫೋರ್ಸ್ ರಚನೆಯು ಈಗ ಅನಿವಾರ್ಯವಾಗಿದೆ. ಪ್ರಚೋದನಾತ್ಮಕ ಭಾಷಣಗಳ ಮೇಲೆ ಕೇಸ್ ದಾಖಲಾಗಿದೆ. ಹಿಂಸಾತ್ಮಕ ಚಟುವಟಿಕೆಗಳನ್ನು ಹಿಂದುತ್ವದ ಹೆಸರಿನಲ್ಲಿ ತಡೆಯುವುದು ಅನಿವಾರ್ಯವಾಗಿದೆ,” ಎಂದು ಸಚಿವರು ತಿಳಿಸಿದರು.
ಬಿಜೆಪಿಯ ಹಿಂದುತ್ವ ರಾಜಕಾರಣ ಭಯ ಹುಟ್ಟಿಸುತ್ತಿದೆ:
“ಹಿಂದುತ್ವದ ಹೆಸರಿನಲ್ಲಿ ರಾಜಕೀಯ ಬಲ ಪಡೆದು ಮರಳು ದಂಧೆ ಮಾಡುವವರು, ರೌಡಿಗಳು ಸಹ ಇದರ ಪ್ರಯೋಜನ ಪಡೆಯುತ್ತಿದ್ದಾರೆ. ಇಂಥವರೆಲ್ಲರನ್ನು ಕಾನೂನಿನಡಿ ತರಬೇಕಾಗಿದೆ. ಶರಣ್ ಪಂಪವೆಲ್ ನೀಡಿರುವ ಬಂದ್ ಕರೆ ಕೂಡ ಪ್ರಚೋದನಾತ್ಮಕವಾಗಿದೆ,” ಎಂದೂ ಅವರು ಹೇಳಿದರು.
“ವಿಷ ತುಂಬಿದ ಭಾಷಣಗಳಿಂದ ಸಮಾಜಕ್ಕೆ ಶಾಂತಿ ಸಿಗದು. ಮಾನವೀಯತೆ, ತರ್ಕ, ನ್ಯಾಯ, ಈ ಮೌಲ್ಯಗಳನ್ನೇ ನಾವು ಬೆಳೆಸಬೇಕು” ಎಂದು ಅವರು ಹೇಳಿದರು.
