ವಿವಿಧ ಕ್ಷೇತ್ರಗಳಲ್ಲಿ ಅನನ್ಯ ಸೇವೆ ಸಲ್ಲಿಸಿದ 70 ಗಣ್ಯ ವ್ಯಕ್ತಿಗಳಿಗೆ 2025 ರ ಸಾಲಿನ ಪ್ರತಿಷ್ಠಿತ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿಗಳನ್ನು ಘೋಷಿಸಲಾಗಿದೆ. ಕಲಾ, ಸಾಹಿತ್ಯ, ವಿಜ್ಞಾನ ಮತ್ತು ಸಮಾಜ ಸೇವೆಯಂತಹ 15 ಕ್ಕೂ ಹೆಚ್ಚು ವಿಭಾಗಗಳಲ್ಲಿ ಗಮನಾರ್ಹ ಸಾಧನೆ ಮಾಡಿದವರನ್ನು ರಾಜ್ಯ ಸರ್ಕಾರವು ಈ ಗೌರವಕ್ಕೆ ಆಯ್ಕೆ ಮಾಡಿದೆ. ಬಹುಮುಖ ಪ್ರತಿಭೆಯ ನಟ ಪ್ರಕಾಶ್ ರಾಜ್ ಮತ್ತು ಹೆಸರಾಂತ ಸಾಹಿತಿ ರಹಮತ್ ತರೀಕೆರೆ ಸೇರಿದಂತೆ ಅನೇಕ ಸಾಧಕರಿಗೆ ಈ ಬಾರಿ ಪ್ರಶಸ್ತಿ ಒಲಿದಿದೆ.
ಕಲೆ ಮತ್ತು ಸಾಹಿತ್ಯ ಕ್ಷೇತ್ರದಲ್ಲಿನ ಸಾಧಕರು
ಸಾಹಿತ್ಯ ಲೋಕದಲ್ಲಿ ಮಹತ್ವದ ಕೊಡುಗೆ ನೀಡಿದ ಪ್ರೊ. ರಾಜೇಂದ್ರ ಚೆನ್ನಿ (ಶಿವಮೊಗ್ಗ), ಡಾ. ಎಚ್.ಎಲ್ ಪುಷ್ಪ (ತುಮಕೂರು), ಪ್ರೊ ಅರ್ ಸುನಂದಮ್ಮ (ಚಿಕ್ಕಬಳ್ಳಾಪುರ), ತುಂಬಾವಾಡಿ ರಾಮಯ್ಯ (ತುಮಕೂರು), ಹ.ಮ. ಪೂಜಾರ (ವಿಜಯಪುರ) ಮತ್ತು ವಿಮರ್ಶಕ ರಹಮತ್ ತರೀಕೆರೆ (ಚಿಕ್ಕಮಗಳೂರು) ಅವರಿಗೆ ಪ್ರಶಸ್ತಿ ನೀಡಲಾಗಿದೆ.
ಚಲನಚಿತ್ರ ಮತ್ತು ಕಿರುತೆರೆ ವಿಭಾಗದಲ್ಲಿ ದಕ್ಷಿಣ ಕನ್ನಡದವರಾದ ಖ್ಯಾತ ನಟ ಪ್ರಕಾಶ್ ರಾಜ್ ಮತ್ತು ಕೊಡಗು ಮೂಲದ ವಿಜಯಲಕ್ಷ್ಮೀ ಸಿಂಗ್ ಅವರು ರಾಜ್ಯೋತ್ಸವ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.
ಸಂಗೀತ ಮತ್ತು ನೃತ್ಯ: ಸಂಗೀತದಲ್ಲಿ ದೇವೇಂದ್ರಕುಮಾರ ಪತ್ತಾರ್ (ಕೊಪ್ಪಳ), ಮಡಿವಾಳಯ್ಯ ಸಾಲಿ (ಬೀದರ್) ಮತ್ತು ನೃತ್ಯ ಕ್ಷೇತ್ರದಲ್ಲಿ ಪ್ರೊ. ಕೆ. ರಾಮಮೂರ್ತಿ ರಾವ್ (ಮೈಸೂರು) ಅವರ ಕೊಡುಗೆಯನ್ನು ಪರಿಗಣಿಸಲಾಗಿದೆ.
ಜನಪದ, ಯಕ್ಷಗಾನ ಮತ್ತು ರಂಗಭೂಮಿಯ ಕಲಾವಿದರು
ಸಾಂಪ್ರದಾಯಿಕ ಕಲೆಗಳಾದ ಜನಪದ ಕ್ಷೇತ್ರದಲ್ಲಿ 7 ಮಂದಿ, ಯಕ್ಷಗಾನದಲ್ಲಿ 3 ಮಂದಿ, ಮತ್ತು ರಂಗಭೂಮಿ, ಬಯಲಾಟದಲ್ಲಿ ತಲಾ 5 ಮಂದಿ ಸಾಧಕರನ್ನು ಗುರುತಿಸಲಾಗಿದೆ. ಜನಪದ ವಿಭಾಗದಲ್ಲಿ ಬಸಪ್ಪ ಭರಮಪ್ಪ ಚೌಡ್ಕಿ (ಕೊಪ್ಪಳ) ಮತ್ತು ಸಿಂಧು ಗುಜರನ್ (ದಕ್ಷಿಣ ಕನ್ನಡ) ಅವರಂತಹ ಕಲಾವಿದರು ಸೇರಿದ್ದಾರೆ. ಯಕ್ಷಗಾನದ ಅನನ್ಯ ಸೇವೆಗಾಗಿ ಕೋಟ ಸುರೇಶ ಬಂಗೇರ (ಉಡುಪಿ) ಮತ್ತು ಐರಬೈಲ್ ಆನಂದ ಶೆಟ್ಟಿ (ಉಡುಪಿ) ಅವರಿಗೆ ಪ್ರಶಸ್ತಿ ಲಭಿಸಿದೆ.
ರಂಗಭೂಮಿ ವಿಭಾಗದಲ್ಲಿ ಹಿರಿಯ ಕಲಾವಿದರಾದ ಎಲ್.ಬಿ.ಶೇಖ್ (ಮಾಸ್ತರ್) (ವಿಜಯಪುರ), ಹೆಚ್.ಎಂ. ಪರಮಶಿವಯ್ಯ (ಬೆಂಗಳೂರು ದಕ್ಷಿಣ) ಮತ್ತು ಮೈಮ್ ರಮೇಶ್ (ದಕ್ಷಿಣ ಕನ್ನಡ) ಅವರ ಪ್ರಯತ್ನಗಳನ್ನು ಗೌರವಿಸಲಾಗಿದೆ.
ವೈದ್ಯಕೀಯ, ಸಮಾಜ ಸೇವೆ ಮತ್ತು ಆಡಳಿತ
ಸಮಾಜದ ವಿವಿಧ ಸ್ತರಗಳಲ್ಲಿ ಕೆಲಸ ಮಾಡಿದವರನ್ನು ಗುರುತಿಸಿ, ಸಮಾಜ ಸೇವೆ ವಿಭಾಗದಲ್ಲಿ ಸೂಲಗಿತ್ತಿ ಈರಮ್ಮ (ವಿಜಯನಗರ) ಮತ್ತು ಡಾ. ಎನ್. ಸೀತಾರಾಮ ಶೆಟ್ಟಿ (ಉಡುಪಿ) ಸೇರಿ 5 ಜನರಿಗೆ ಪ್ರಶಸ್ತಿ ಲಭಿಸಿದೆ.
ವೈದ್ಯಕೀಯ ಕ್ಷೇತ್ರದಲ್ಲಿನ ಮಹತ್ವದ ಸಾಧನೆಗಾಗಿ ಡಾ. ಆಲಮ್ಮ ಮಾರಣ್ಣ (ತುಮಕೂರು) ಮತ್ತು ಡಾ. ಜಯರಂಗನಾಥ್ (ಬೆಂಗಳೂರು ಗ್ರಾಮಾಂತರ) ಅವರಿಗೆ ಪ್ರಶಸ್ತಿ ದೊರೆತಿದೆ. ಇನ್ನು, ನಿವೃತ್ತ ಐಎಎಸ್ ಅಧಿಕಾರಿ ಹೆಚ್. ಸಿದ್ದಯ್ಯ ಅವರಿಗೆ ಆಡಳಿತ ಕ್ಷೇತ್ರದಲ್ಲಿನ ಕೊಡುಗೆಗಾಗಿ ಗೌರವ ನೀಡಲಾಗಿದೆ.
ಕೃಷಿ, ಪರಿಸರ, ವಿಜ್ಞಾನ ಮತ್ತು ಮಾಧ್ಯಮ
ಸಮಾಜದ ಮೂಲಭೂತ ಕ್ಷೇತ್ರಗಳಲ್ಲಿನ ಕೆಲಸಕ್ಕೆ ಹೆಚ್ಚಿನ ಮನ್ನಣೆ ನೀಡಲಾಗಿದೆ. ಕೃಷಿ ವಿಭಾಗದಲ್ಲಿ ಡಾ. ಎಸ್.ವಿ. ಹಿತ್ತಲಮನಿ (ಹಾವೇರಿ) ಮತ್ತು ಎಂ ಸಿ ರಂಗಸ್ವಾಮಿ (ಹಾಸನ) ಅವರಿಗೆ ಪ್ರಶಸ್ತಿ ಲಭಿಸಿದೆ.
ಪರಿಸರ ಸಂರಕ್ಷಣೆಗೆ ಶ್ರಮಿಸಿದ ರಾಮೇಗೌಡ (ಚಾಮರಾಜನಗರ) ಮತ್ತು ಮಲ್ಲಿಕಾರ್ಜುನ ನಿಂಗಪ್ಪ (ಯಾದಗಿರಿ) ಅವರಿಗೆ ಪರಿಸರ ಪ್ರಶಸ್ತಿ ದೊರೆತಿದೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ವಿಭಾಗದಲ್ಲಿ ರಾಮಯ್ಯ (ಚಿಕ್ಕಬಳ್ಳಾಪುರ) ಮತ್ತು ಏರ್ ಮಾರ್ಷಲ್ ಫೀಲೀಫ್ ರಾಜಕುಮಾರ್ (ದಾವಣಗೆರೆ) ಅವರಿಗೆ ಗೌರವ ಲಭಿಸಿದೆ. ಮಾಧ್ಯಮ ಕ್ಷೇತ್ರದಲ್ಲಿನ ಸೇವೆಗಾಗಿ ಕೆ.ಸುಬ್ರಮಣ್ಯ (ಬೆಂಗಳೂರು), ಬಿ.ಎಂ ಹನೀಫ್ (ದಕ್ಷಿಣ ಕನ್ನಡ) ಮತ್ತು ಅಂಶಿ ಪ್ರಸನ್ನಕುಮಾರ್ (ಮೈಸೂರು) ಅವರಿಗೆ ಪ್ರಶಸ್ತಿ ನೀಡಲಾಗಿದೆ.
ಹೊರನಾಡು ಮತ್ತು ಇತರೆ ಕ್ಷೇತ್ರಗಳು
ಕರ್ನಾಟಕದ ಹೊರಗೆ ಸಾಧನೆ ಮಾಡಿದ ಹೊರನಾಡು/ಹೊರದೇಶ ವಿಭಾಗದಲ್ಲಿ ಪಿ ವಿ ಶೆಟ್ಟಿ (ಮುಂಬೈ) ಮತ್ತು ಜಕರಿಯ ಬಜಪೆ (ಸೌದಿ) ಅವರನ್ನು ಗುರುತಿಸಲಾಗಿದೆ.
ಶಿಕ್ಷಣ, ಕ್ರೀಡೆ, ನ್ಯಾಯಾಂಗ, ಶಿಲ್ಪಕಲೆ, ಚಿತ್ರಕಲೆ ಮತ್ತು ಕರಕುಶಲ ಸೇರಿದಂತೆ ಉಳಿದ ಕ್ಷೇತ್ರಗಳ ಸಾಧಕರ ಪಟ್ಟಿ ಕೆಳಗಿನಂತಿದೆ:
- ಶಿಕ್ಷಣ: ಡಾ. ಎಂ.ಆರ್. ಜಯರಾಮ್ (ಬೆಂಗಳೂರು), ಡಾ. ಎನ್ ಎಸ್ ರಾಮೇಗೌಡ (ಮೈಸೂರು) ಸೇರಿ 4 ಮಂದಿ.
- ಕ್ರೀಡೆ: ಆಶೀಶ್ ಕುಮಾರ್ ಬಲ್ಲಾಳ್ (ಬೆಂಗಳೂರು), ಡಾ. ಬಬಿನಾ ಎನ್.ಎಂ (ಯೋಗ) (ಕೊಡಗು) ಸೇರಿ 3 ಮಂದಿ.
- ನ್ಯಾಯಾಂಗ: ನ್ಯಾ. ಶ್ರೀ ಪಿ.ಬಿ. ಭಜಂತ್ರಿ (ಬಾಗಲಕೋಟೆ).
- ಶಿಲ್ಪಕಲೆ/ಚಿತ್ರಕಲೆ/ಕರಕುಶಲ: ಬಸಣ್ಣ ಮೋನಪ್ಪ ಬಡಿಗೇರ (ಯಾದಗಿರಿ), ಬಿ. ಮಾರುತಿ (ವಿಜಯನಗರ) ಮತ್ತು ಎಲ್. ಹೇಮಾಶೇಖರ್ (ಮೈಸೂರು) ಸೇರಿದಂತೆ ಒಟ್ಟು 4 ಮಂದಿ.
ಈ ಪ್ರಶಸ್ತಿಗಳನ್ನು ನವೆಂಬರ್ 1 ರಂದು ಕರ್ನಾಟಕ ರಾಜ್ಯೋತ್ಸವದ ಸಂದರ್ಭದಲ್ಲಿ ಮುಖ್ಯಮಂತ್ರಿಗಳು ಪ್ರದಾನ ಮಾಡಲಿದ್ದಾರೆ.
