ಪುಣೆ: ಮಹಾರಾಷ್ಟ್ರದ ಪುಣೆ ಮಹಾನಗರ ಪಾಲಿಕೆ (PMC) ಚುನಾವಣೆಯ ನಾಮಪತ್ರ ಸಲ್ಲಿಕೆಯ ವೇಳೆ ಸಿನಿಮಾ ಶೈಲಿಯ ವಿಲಕ್ಷಣ ಘಟನೆಯೊಂದು ನಡೆದಿದ್ದು, ಅಭ್ಯರ್ಥಿಯೊಬ್ಬರು ತನ್ನ ಎದುರಾಳಿಯ ಅಧಿಕೃತ ದಾಖಲೆಯನ್ನು ನುಂಗಿ ಹಾಕಿದ್ದಾರೆ.
ಏನಿದು ಘಟನೆ?
ಪುಣೆಯ ವಾರ್ಡ್ ಸಂಖ್ಯೆ 34ರಲ್ಲಿ ಏಕನಾಥ್ ಶಿಂದೆ ನೇತೃತ್ವದ ಶಿವಸೇನೆಯಿಂದ ಉದ್ಧವ್ ಕಾಂಬ್ಳೆ ಮತ್ತು ಮಚ್ಚಿಂದ್ರ ಧವಳೆ ಎಂಬ ಇಬ್ಬರು ಅಭ್ಯರ್ಥಿಗಳಿಗೆ ಪಕ್ಷವು ‘ಎ-ಬಿ ಫಾರ್ಮ್’ ನೀಡಿತ್ತು. ನಾಮಪತ್ರ ಸಲ್ಲಿಸುವ ಕೊನೆಯ ಹಂತದಲ್ಲಿ ಯಾರಿಗೆ ಅಧಿಕೃತ ಟಿಕೆಟ್ ಸಿಗಲಿದೆ ಎಂಬ ಗೊಂದಲ ಏರ್ಪಟ್ಟಿತ್ತು. ಈ ವೇಳೆ ಮಾತಿನ ಚಕಮಕಿ ನಡೆದು, ಉದ್ಧವ್ ಕಾಂಬ್ಳೆ ಅವರು ಮಚ್ಚಿಂದ್ರ ಧವಳೆ ಅವರ ಕೈಯಲ್ಲಿದ್ದ ಅಧಿಕೃತ ‘ಎಬಿ ಫಾರ್ಮ್’ ಅನ್ನು ಬಲವಂತವಾಗಿ ಕಿತ್ತುಕೊಂಡು, ಅದನ್ನು ಹರಿದು ಬಾಯಿಗೆ ಹಾಕಿ ನುಂಗಿದ್ದಾರೆ ಎಂದು ಆರೋಪಿಸಲಾಗಿದೆ.
ಪೊಲೀಸ್ ದೂರು ದಾಖಲು:
ಚುನಾವಣಾ ಪ್ರಕ್ರಿಯೆಗೆ ಅಡ್ಡಿಪಡಿಸಿದ ಮತ್ತು ಸರ್ಕಾರಿ ದಾಖಲೆಯನ್ನು ನಾಶಪಡಿಸಿದ ಆರೋಪದ ಮೇಲೆ ಉದ್ಧವ್ ಕಾಂಬ್ಳೆ ವಿರುದ್ಧ ಭಾರತಿ ವಿದ್ಯಾಪೀಠ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಈ ಆರೋಪವನ್ನು ನಿರಾಕರಿಸಿರುವ ಕಾಂಬ್ಳೆ, “ಧವಳೆ ಅವರೇ ಫಾರ್ಮ್ ಕಳ್ಳತನ ಮಾಡಿದ್ದಾರೆ” ಎಂದು ಮರು ಆರೋಪ ಮಾಡಿದ್ದಾರೆ.
ಎ-ಬಿ ಫಾರ್ಮ್ ಏಕೆ ಮುಖ್ಯ?
ಚುನಾವಣಾ ಆಯೋಗದ ನಿಯಮದಂತೆ, ರಾಜಕೀಯ ಪಕ್ಷವೊಂದು ತನ್ನ ಅಧಿಕೃತ ಅಭ್ಯರ್ಥಿಯನ್ನು ಘೋಷಿಸಲು ‘ಫಾರ್ಮ್ ಎ ಮತ್ತು ಬಿ’ ಕಡ್ಡಾಯ. ಈ ದಾಖಲೆ ಇಲ್ಲದಿದ್ದರೆ ಅಭ್ಯರ್ಥಿಯು ಪಕ್ಷದ ಅಧಿಕೃತ ಚಿಹ್ನೆಯಡಿ ಸ್ಪರ್ಧಿಸಲು ಸಾಧ್ಯವಿಲ್ಲ ಮತ್ತು ಅವರು ಸ್ವತಂತ್ರ ಅಭ್ಯರ್ಥಿಯಾಗಿ ಪರಿಗಣಿಸಲ್ಪಡುತ್ತಾರೆ.
ಪುಣೆ ಚುನಾವಣಾ ಕಣದಲ್ಲಿ ನಡೆದಿರುವ ಈ “ಫಾರ್ಮ್ ಯುದ್ಧ” ಈಗ ಇಡೀ ರಾಜ್ಯದಾದ್ಯಂತ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
