ಬೆಂಗಳೂರು: ರಾಷ್ಟ್ರೀಯ ಸ್ವಯಂಸೇವಕ ಸಂಘ (RSS) ಒಂದು ನೋಂದಣಿಯಾಗದ ಸಂಘಟನೆಯಾಗಿದ್ದು, ಅದರ ಹಿಂದೆ ಬೃಹತ್ ಮಟ್ಟದ ಅಕ್ರಮ ಹಣ ವರ್ಗಾವಣೆ (Money Laundering) ಜಾಲ ಅಡಗಿದೆ ಎಂದು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಸಚಿವ ಪ್ರಿಯಾಂಕ್ ಖರ್ಗೆ ನೇರ ವಾಗ್ದಾಳಿ ನಡೆಸಿದ್ದಾರೆ. ರವಿವಾರ ನಗರದ ಗಾಂಧಿ ಭವನದಲ್ಲಿ ನಡೆದ ವಿಶೇಷ ಸಾಹಿತ್ಯಿಕ ಸಮಾರಂಭವೊಂದರಲ್ಲಿ ಅವರು ಈ ಸ್ಪೋಟಕ ಹೇಳಿಕೆಗಳನ್ನು ನೀಡಿದರು.
ಪತ್ರಕರ್ತ ಇರ್ಷಾದ್ ಉಪ್ಪಿನಂಗಡಿ ಅವರು ರಚಿಸಿರುವ, ಕರಾವಳಿಯ ಕೋಮು ಸಂಘರ್ಷಗಳ ಕರಾಳ ಮುಖವನ್ನು ಅನಾವರಣಗೊಳಿಸುವ ‘ಕರಾವಳಿಯ ರಕ್ತ-ಕಣ್ಣೀರು’ ಕೃತಿಯನ್ನು ಬಿಡುಗಡೆಗೊಳಿಸಿ ಮಾತನಾಡಿದ ಸಚಿವರು, ಸಂಘ ಪರಿವಾರದ ವಿರುದ್ಧ ಹರಿಹಾಯ್ದರು.
ದೆವ್ವ ಮತ್ತು ನೆರಳಿನ ಹೋಲಿಕೆ:
ರಾಜಕೀಯ ಹೋರಾಟದ ಬಗ್ಗೆ ವಿಶ್ಲೇಷಿಸಿದ ಖರ್ಗೆ, “ನಾವು ಇಷ್ಟು ದಿನ ಬಿಜೆಪಿಯೊಂದಿಗೆ ಮಾತ್ರ ಗುದ್ದಾಡುತ್ತಿದ್ದೇವೆ. ಆದರೆ ಬಿಜೆಪಿ ಎಂಬುದು ಕೇವಲ ಒಂದು ನೆರಳು ಅಷ್ಟೆ. ಆ ನೆರಳಿಗೆ ಕಾರಣವಾಗಿರುವ ಅಸಲಿ ದೆವ್ವ ಆರ್ಎಸ್ಎಸ್ ಆಗಿದೆ. ದೇಶವನ್ನು ಉದ್ಧಾರ ಮಾಡಬೇಕೆಂದರೆ ನಾವು ಮೊದಲು ಈ ದೆವ್ವದ ವಿರುದ್ಧ ಹೋರಾಡಬೇಕಿದೆ,” ಎಂದು ಮಾರ್ಮಿಕವಾಗಿ ಹೇಳಿದರು.
ಹಣದ ಮೂಲದ ಬಗ್ಗೆ ಪ್ರಶ್ನೆ:
ಆರ್ಎಸ್ಎಸ್ನ ಆರ್ಥಿಕ ವ್ಯವಹಾರಗಳ ಬಗ್ಗೆ ಸುದೀರ್ಘ ಸಂಶೋಧನೆ ನಡೆಸುತ್ತಿರುವುದಾಗಿ ತಿಳಿಸಿದ ಅವರು, “ಸಂಘಕ್ಕೆ ಹರಿದು ಬರುವ ಹಣದ ಮೂಲ ಯಾವುದು? ಅಮೆರಿಕ ಮತ್ತು ಇಂಗ್ಲೆಂಡ್ ಸೇರಿದಂತೆ ವಿಶ್ವದಾದ್ಯಂತ ಹರಡಿರುವ 2500 ಕ್ಕೂ ಹೆಚ್ಚು ಅಂಗಸಂಸ್ಥೆಗಳಿಂದ ಬರುವ ಹಣ ಎಲ್ಲಿಗೆ ಹೋಗುತ್ತಿದೆ? ಗುರುದಕ್ಷಿಣೆ ಎಂದರೆ ಕೇಸರಿ ಧ್ವಜಕ್ಕೆ ನೀಡುವ ಕಾಣಿಕೆ ಎಂದು ಅವರು ಹೇಳುತ್ತಾರೆ. ಆದರೆ ಕಾನೂನಿನ ಅಡಿಯಲ್ಲಿ ಈ ವ್ಯವಹಾರಗಳಿಗೆ ಪಾರದರ್ಶಕತೆ ಇಲ್ಲದಿರುವುದು ಅಕ್ರಮ ಹಣ ವರ್ಗಾವಣೆಯ ಸಂಶಯವನ್ನು ಹುಟ್ಟುಹಾಕುತ್ತಿದೆ,” ಎಂದರು.
ನೋಂದಣಿ ಮತ್ತು ಕಾನೂನು ಸಮರ:
ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ತಮ್ಮದು ಕೇವಲ ವ್ಯಕ್ತಿಗಳ ಸಂಘಟನೆ ಎಂದು ಹೇಳಿಕೊಳ್ಳುವುದಕ್ಕೆ ತಿರುಗೇಟು ನೀಡಿದ ಸಚಿವರು, “ಬೆಂಗಳೂರು ಕ್ಲಬ್ ಕೂಡ ವ್ಯಕ್ತಿಗಳ ಸಂಸ್ಥೆಯೇ ಆಗಿದೆ. ಆದರೆ ಅದು ಕಾನೂನಿನ ಅಡಿಯಲ್ಲಿ ನೋಂದಣಿಯಾಗಿ ತೆರಿಗೆ ಪಾವತಿಸುತ್ತದೆ. ದೇಶದ ಪ್ರತಿಯೊಬ್ಬ ನಾಗರಿಕ ತೆರಿಗೆ ಮತ್ತು ಕಾನೂನಿಗೆ ಬದ್ಧನಾಗಿರುವಾಗ ಆರ್ಎಸ್ಎಸ್ ಮಾತ್ರ ಸಂವಿಧಾನದ ವ್ಯಾಪ್ತಿಯಿಂದ ಹೊರಗಿರುವುದು ಹೇಗೆ ಸಾಧ್ಯ? ಮುಂದಿನ ದಿನಗಳಲ್ಲಿ ಈ ಸಂಘಟನೆಯನ್ನು ಅಧಿಕೃತವಾಗಿ ನೋಂದಣಿ ಮಾಡಿಸಲು ನಾನು ಕಾನೂನುಬದ್ಧ ಹೋರಾಟ ನಡೆಸುತ್ತೇನೆ,” ಎಂದು ಪಣತೊಟ್ಟರು.
ಕೋಮುವಾದಿ ಸಂಘಟನೆಗಳು ಅದು ಆರ್ಎಸ್ಎಸ್ ಇರಲಿ ಅಥವಾ ಎಸ್ಡಿಪಿಐ ಇರಲಿ, ಸಂವಿಧಾನಕ್ಕೆ ವಿರುದ್ಧವಾಗಿ ವರ್ತಿಸಿದರೆ ರಾಜಕೀಯ ಇಚ್ಛಾಶಕ್ತಿಯಿಂದ ಅವುಗಳನ್ನು ಹತ್ತಿಕ್ಕುವುದು ಸಾಧ್ಯವಿದೆ ಎಂಬ ಭರವಸೆಯನ್ನು ವ್ಯಕ್ತಪಡಿಸಿದರು.
