ಮುಂಬೈ: ಬಾಲಿವುಡ್ ನಟ ಪರೇಶ್ ರಾವಲ್ ಅವರ ಮುಂಬರುವ ಚಿತ್ರ “ದಿ ತಾಜ್ ಸ್ಟೋರಿ” ಯ ಪೋಸ್ಟರ್ ಈಗ ಭಾರೀ ವಿವಾದಕ್ಕೆ ತುತ್ತಾಗಿದೆ.
ಚಿತ್ರತಂಡವು ಬಿಡುಗಡೆಗೊಳಿಸಿದ್ದ ಮೋಷನ್ ಪೋಸ್ಟರ್ನಲ್ಲಿ ತಾಜ್ ಮಹಲ್ನ ಗುಮ್ಮಟದೊಳಗಿನಿಂದ ಶಿವನ ಪ್ರತಿಮೆ ಹೊರಹೊಮ್ಮುತ್ತಿರುವಂತೆ ಚಿತ್ರಿಸಲಾಗಿತ್ತು. ಈ ಚಿತ್ರಣವು ಸಾಮಾಜಿಕ ಜಾಲತಾಣಗಳಲ್ಲಿ ಪರ ಮತ್ತು ವಿರೋಧದ ಅಭಿಪ್ರಾಯಗಳನ್ನು ಹುಟ್ಟುಹಾಕಿದೆ.
“ಮೊಘಲರ ಕಾಲದ ಈ ಸಮಾಧಿಯನ್ನು ಹಿಂದೂ ದೇಗುಲದ ಮೇಲೆ ನಿರ್ಮಿಸಲಾಗಿದೆ ಎಂಬ ಯಾವುದೇ ಆಧಾರವಿಲ್ಲದ ಹೇಳಿಕೆ ಇಟ್ಟುಕೊಂಡು ಈ ಚಿತ್ರವನ್ನು ನಿರ್ಮಿಸಲಾಗಿದೆ” ಎಂದು ಕೆಲವರು ಆಕ್ಷೇಪ ವ್ಯಕ್ತಪಡಿಸಿ, ಚಿತ್ರತಂಡದ ವಿರುದ್ಧ ತೀವ್ರವಾಗಿ ಕಿಡಿಕಾರಿದ್ದಾರೆ.
ವಿವಾದದ ಬೆನ್ನಲ್ಲೇ ಪೋಸ್ಟರ್ ಅಳಿಸಿದ ನಟ
ವಿವಾದ ತೀವ್ರಗೊಳ್ಳುತ್ತಿದ್ದಂತೆಯೇ, ನಟ ಪರೇಶ್ ರಾವಲ್ ಅವರು ವಿವಾದಾತ್ಮಕ ಪೋಸ್ಟರ್ ಅನ್ನು ತಕ್ಷಣವೇ ಅಳಿಸಿದ್ದಾರೆ. ಅಲ್ಲದೆ, “ಈ ಚಿತ್ರವನ್ನು ಧಾರ್ಮಿಕ ವಿಷಯಗಳ ಬದಲಿಗೆ, ಕೇವಲ ಐತಿಹಾಸಿಕ ಆಧಾರದಲ್ಲಿ ನಿರ್ಮಿಸಲಾಗಿದೆ” ಎಂಬ ಚಿತ್ರತಂಡದ ಸಮರ್ಥನೆಯನ್ನು ಅವರು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದಾರೆ.
