ಜಮ್ಮು : ಭಾರತದೊಂದಿಗೆ ಉತ್ತಮ ಸಂಬಂಧಗಳನ್ನು ಕೇವಲ ಮಾತಿನಲ್ಲಿ ಮಾತ್ರ ಪ್ರದರ್ಶಿಸುತ್ತಿರುವ ಪಾಕಿಸ್ಥಾನ, ತನ್ನ ಹಳೆಯ ಆಟವನ್ನೇ ಮುಂದುವರೆಸಿದೆ. ಜಮ್ಮು-ಕಾಶ್ಮೀರದ ಪೂಂಛ್ ಸೆಕ್ಟರ್‌ನ ಎಲ್‌ಒಸಿ ಬಳಿ ದೇಶದೊಳಗೆ ಉಗ್ರರನ್ನು ನುಸುಳಿಸಲು ಯತ್ನಿಸಿದ ಪಾಕಿಸ್ತಾನಿ ವ್ಯಕ್ತಿಯನ್ನು ಭಾರತೀಯ ಸೇನೆ ಬಂಧಿಸಿರುವ ಘಟನೆ ಇದಕ್ಕೆ ಸಾಕ್ಷಿಯಾಗಿದೆ.
ಬಂಧಿತ ವ್ಯಕ್ತಿಯನ್ನು ಪಿಒಕೆ ನಿವಾಸಿ ಮೊಹಮ್ಮದ್ ಆರೀಫ್ ಎಂದು ಗುರುತಿಸಲಾಗಿದೆ. ಆತನ ವಿಚಾರಣೆ ವೇಳೆ ಆತ ಉಗ್ರರ ಮಾರ್ಗದರ್ಶಕನಾಗಿದ್ದದ್ದನ್ನೂ ಒಪ್ಪಿಕೊಂಡಿದ್ದಾನೆ. ನಾಲ್ವರು ಜೈಶ್ ಎ ಮೊಹಮ್ಮದ್ ಉಗ್ರರನ್ನು ಭಾರತದಲ್ಲಿ ನುಸುಳಿಸಲು ಆರೀಫ್ ಸಹಾಯ ಮಾಡುತ್ತಿದ್ದ. ಆದರೆ ಗಡಿಯತ್ತ ಗಮನ ಹರಿಸಿಕೊಂಡಿದ್ದ ಭಾರತೀಯ ಸೇನೆ ಆತನು ನುಸುಳುತ್ತಿರುವಾಗಲೇ ಹಿಡಿದಿಟ್ಟಿದೆ. ಈ ವೇಳೆ ಉಗ್ರರು ಪಾಕ್ ಭಾಗದ ಆಳವಾದ ಕಮರಿಗೆ ಜಿಗಿದು ಪರಾರಿಯಾಗಿದ್ದಾರೆ.
ಸೈನಿಕರ ಪ್ರಕಾರ, ಕಮರಿಯಲ್ಲಿರುವ ರಕ್ತದ ಕಲೆಗಳು ಅವನು ಗಾಯಗೊಂಡಿರಬಹುದು ಎಂಬ ಅನುಮಾನಕ್ಕೆ ಕಾರಣವಾಗಿವೆ. ಪಾಕಿಸ್ತಾನಿ ಗಡಿಯಲ್ಲಿ ಸೇನೆಯ ಪೋಸ್ಟ್ ಇದ್ದ ಕಾರಣ, ಆ ಉಗ್ರರ ಮೇಲೆ ಗುಂಡಿನ ದಾಳಿ ಸಾಧ್ಯವಾಗಲಿಲ್ಲ ಎಂದು ಸೇನಾ ಮೂಲಗಳು ತಿಳಿಸಿವೆ. ಬಂಧಿತ ಆರೀಫ್ ಹೇಳಿಕೆ ಪ್ರಕಾರ, ಪಾಕ್ ಸೇನೆಯ ಆದೇಶದ ಮೇರೆಗೆ ಈ ತಂತ್ರ ಜಾರಿಯಲ್ಲಿತ್ತು.
ಸಾರ್ಕ್‌ಗೆ ಪರ್ಯಾಯ ರಚನೆ? ಚೀನ, ಪಾಕಿಸ್ಥಾನದ ಹೊಸ ಯತ್ನ
ಚೀನ, ಪಾಕಿಸ್ಥಾನ ಮತ್ತು ಬಾಂಗ್ಲಾದೇಶ ಇತ್ತೀಚೆಗೆ ಕುನ್ಮಿಂಗ್ ನಲ್ಲಿ ನಡೆದ ತ್ರಿಪಕ್ಷೀಯ ಸಭೆಯಲ್ಲಿ ದಕ್ಷಿಣ ಏಷ್ಯಾ ಪ್ರಾದೇಶಿಕ ಸಹಕಾರ ಸಂಘಟನೆಯಾದ ಸಾರ್ಕ್‌ಗೆ ಬದಲಿ ಸಂಘಟನೆ ಸ್ಥಾಪನೆ ಕುರಿತು ಚರ್ಚಿಸಿದ್ದಾರೆ ಎನ್ನಲಾಗಿದೆ. ಈ ನವೀನ ಸಂಘಟನೆಗೆ ಭಾರತ, ಶ್ರೀಲಂಕಾ, ಮಾಲ್ಡೀವ್ಸ್ ಮತ್ತು ಆಫ್ಘಾನಿಸ್ತಾನವನ್ನು ಕೂಡ ಸೇರಿಸಲು ಯೋಜನೆ ರೂಪಿಸಲಾಗಿದೆ.
ಭಾರತದ ವಿರುದ್ಧ ರಾಜತಾಂತ್ರಿಕ ಮಟ್ಟದಲ್ಲಿ ಒತ್ತಡ ಹೇರುವ ಉದ್ದೇಶವೇ ಈ ಹೊಸ ಬಳಗದ ಹಿಂದೆ ಇರುವ ಪ್ರಮುಖ ಕಾರಣವೆನ್ನಲಾಗುತ್ತಿದೆ. ಇಂಥ ಹುನ್ನಾರಗಳು ಭಾರತಕ್ಕೆ ಹೊಸ ಆತಂಕವನ್ನು ಉಂಟುಮಾಡಬಹುದಾದ ಸಾಧ್ಯತೆಯಿದೆ.
