ಮಧುರೈ : ಸ್ವಯಂ ಘೋಷಿತ ರಾಷ್ಟ್ರವಾದ ‘ಕೈಲಾಸ’ ದೇಶದ ಸ್ಥಾಪನೆಯ ಮೂಲಕ ಚರ್ಚೆಗೆ ಗುರಿಯಾದ ವಿವಾದಿತ ಸ್ವಾಮಿ ನಿತ್ಯಾನಂದರವರು ಪ್ರಸ್ತುತ ಎಲ್ಲ ವಾಸಿಸುತ್ತಿದ್ದಾರೆ ಎಂಬ ಪ್ರಶ್ನೆಗೆ ಕೊನೆಗೂ ಸ್ಪಷ್ಟನೆ ದೊರೆತಿದೆ. ಮದ್ರಾಸ್ ಹೈಕೋರ್ಟ್‌ನ ಮಧುರೈ ಪೀಠ ಕೇಳಿದ್ದ ಪ್ರಶ್ನೆಗಳಿಗೆ ನಿತ್ಯಾನಂದರ ಶಿಷ್ಯೆಯಾದ ಅರ್ಚನಾ ಅವರು ಲಿಖಿತ ದಾಖಲೆಗಳೊಂದಿಗೆ ಉತ್ತರ ಸಲ್ಲಿಸಿದ್ದಾರೆ.
ಈ ಹಿಂದೆ ಮಧುರೈ ಅಧೀನಂಗೆ ನಿತ್ಯಾನಂದ ಪ್ರವೇಶಿಸದಂತೆ ಹೈಕೋರ್ಟ್ ಆದೇಶ ನೀಡಿತ್ತು. ಈ ಆದೇಶದ ವಿರುದ್ಧ ನಿತ್ಯಾನಂದ ಅವರು ಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದರು. ವಿಚಾರಣೆ ವೇಳೆ ನ್ಯಾಯಮೂರ್ತಿಗಳು ಹಲವು ತೀವ್ರ ಪ್ರಶ್ನೆಗಳನ್ನು ಮುಂದಿಟ್ಟಿದ್ದರು:
- ನಿತ್ಯಾನಂದರ ಕೈಲಾಸ ದೇಶ ಎಲ್ಲಿದೆ?
- ಅದು ನಿಜವಾಗಿಯೂ ಒಂದು ದೇಶವೇ?
- ಅಲ್ಲಿ ಪ್ರವೇಶಿಸಲು ಪಾಸ್‌ಪೋರ್ಟ್ ಅಥವಾ ವೀಸಾ ಬೇಕೇ?
- ಪ್ರಸ್ತುತ ನಿತ್ಯಾನಂದರು ಎಲ್ಲ ವಾಸಿಸುತ್ತಿದ್ದಾರೆ?
ಈ ಎಲ್ಲಾ ಪ್ರಶ್ನೆಗಳಿಗೆ ಪ್ರತಿನಿಧಿಯಾಗಿ ಹಾಜರಾದ ಅರ್ಚನಾ, ನಿತ್ಯಾನಂದರು ಪ್ರಸ್ತುತ ‘ಯುನೈಟೆಡ್ ಸ್ಟೇಟ್ಸ್ ಆಫ್ ಕೈಲಾಸ’ (United States of Kailasa) ಎಂಬ ಸ್ವಯಂ ಘೋಷಿತ ದೇಶದಲ್ಲಿ ವಾಸಿಸುತ್ತಿದ್ದಾರೆ ಎಂದು ಕೋರ್ಟ್‌ಗೆ ತಿಳಿಸಿದರು. ಈ ಕೈಲಾಸವು ಆಸ್ಟ್ರೇಲಿಯಾದ ಸಮೀಪದಲ್ಲಿರುವ ಒಂದು ಖಾಸಗಿ ದ್ವೀಪದಲ್ಲಿ ಸ್ಥಾಪನೆಯಾಗಿದೆ ಮತ್ತು ಇದು “ವಿಶ್ವಸಂಸ್ಥೆಯಿಂದ ಗುರುತಿಸಲ್ಪಟ್ಟಿದೆ” ಎಂಬುದಾಗಿ ಅವರು ದಾಖಲಿಸಿದ್ದಾರೆ.
ವಕೀಲರ ನೇಮಕಕ್ಕೆ ಅನುಮತಿ:
ಅದೇ ವೇಳೆ, ನಿತ್ಯಾನಂದರನ್ನು ಪ್ರತಿನಿಧಿಸಲು ಹೊಸ ವಕೀಲರನ್ನು ನೇಮಿಸಲು ಅವಕಾಶ ನೀಡುವಂತೆ ಅರ್ಚನಾ ಕೋರಿದ್ದು, ನ್ಯಾಯಪೀಠ ಆ ಕೋರಿಕೆಯನ್ನು ಪುರಸ್ಕರಿಸಿ ವಿಚಾರಣೆಯನ್ನು ಮುಂದೂಡಿದೆ.
ಇದರೊಂದಿಗೆ, ನಿತ್ಯಾನಂದರ ‘ಕೈಲಾಸ’ ಕುರಿತು ಬಹುಮಾನ್ಯ ಮಾಹಿತಿಗಳು ಕಾನೂನು ದಾಖಲೆಗಳ ಮೂಲಕ ಕೋರ್ಟ್ ಮುಂದಿದೆ. ಈ ವಿಷಯದ ಬಗ್ಗೆ ಇನ್ನೂ ಹೆಚ್ಚಿನ ಪರಿಶೀಲನೆ ಮತ್ತು ಅಂತಿಮ ತೀರ್ಮಾನಕ್ಕೆ ಹೈಕೋರ್ಟ್ ಮುಂದಿನ ದಿನಗಳಲ್ಲಿ ಬರಲಿದೆ.
